དྲན།

ཁམས་བཟང་མོ།

དེ་རིང་གི་ཉི་མའི་འོད་ཟེར་ངའི་ཁང་བའི་གྲུ་བཞིའི་ནང་དུ་འཕྲོས་ཚེ། ང་རང་གཞི་ནས་གཉིད་ལས་སད་སོང་། ཧ་ལམ་ཞོགས་ཟས་དང་ཉིན་གུང་ཟ་མ་གཉིས་ལྷན་གཅིག་ཏུ་ཟོས་པ་འདྲ། དེའང་རང་ཉིད་ཀྱི་ངལ་གསོ་དུས་ཚོད་བཀོད་སྒྲིག་བྱས་མེད་པའི་རྟགས་མཚོན་རེད།

ངས་གཞི་ནས་རང་ཉིད་ཀྱི་མ་འོངས་དང་ཁོ་བོའི་མ་འོངས། ཡང་ན་ཁོ་ཚོས་མ་འོངས་པའང་དྲན་པ་ཡིན།

སླར་ཡང་ཆུ་ཚོད་གཅིག་ཙམ་ཉལ་བ་ཡིན། གཉིད་ལས་སད་པས་ཁང་བའི་གྲུ་བཞིའི་རི་རྒྱབ་ཏུ་འཆམ་འཆམ་ལ་སོང་བ་ཡིན། ངའི་རི་རྒྱབ་ཀྱི་ཡུལ་ལྗོངས་དང་མི་སྣ། འདབ་ཆགས་དང་རྩི་ཤིང་། རྟ་ནོར་ལུག་སོགས་ཅི་འདྲ་ཞིག་ཡིན་ནམ་དྲན་བཞིན་ལམ་ལ་ཆས། སྐབས་དེར་དུས་ངས་དྲན་པ་ནི་གལ་ཏེ་རི་རྒྱབ་ཏུ་ངའི་མ་འོངས་ཡིན་ན་ཅི་མ་རུང་། ངས་རྐང་ལམ་ཕྲ་མོ་འདི་ལ་དགའ་འབོད་དང་མདུན་དུ་བསྐྱོད་འདོད། གལ་ཏེ་རི་རྒྱབ་ཏུ་ཁོ་བོའི་མ་འོངས་པ་ཞིག་ཡིན་ན་ཅི་མ་རུང་ངམ། ངས་ཀྱང་ཁོ་བོ་དང་ལྷན་གཅིག་ཏུ་ཡུལ་ལྗོངས་འགྱུར་ལྡོག་གི་དཀའ་ཚེགས་ཁྲོད་དུ་རྒྱབ་སྐྱོར་དང་དཀའ་གནད་སེལ་འདོད། ཡང་ན་གལ་ཏེ་རི་འདིའི་རྒྱབ་ཏུ་ཁོ་ཚོས་མ་འོངས་འཚོ་བའི་ཁ་ཕྱོགས་ཤིག་ཡིན་ན་ཅི་རུང་། ངས་སླར་ཡང་སེམས་རུམ་ནས་ཁོ་ཚོས་དཀའ་ཚེགས་དག་རང་ཉིད་ཀྱི་མགོན་སྐྱབས་ལ་སྐྱབས་འཇུག་ཞུ་འདོད། གང་ལྟར་རི་འདིའི་རྒྱབ་ཏུ་ངས་སླར་ཡང་རི་རྒོད་པོ་ཞིག་ལས་མཐོང་མ་སོང་།

དེ་ནས་ངས་ཕྱི་དྲོ་ཞེས་པའི་མཛའ་གཞས་ཤིག་ལ་ཉན་བཞིན་ཉན་བཞིན་ས་རུབ་པའི་དུས་ཚོད་ལ་སྒུག ཏག་ཏག་དུས་ཚིད་དེ་ལ་སླེབས་སོང་། ང་རང་ཆུང་བྱིས་པ་འདྲ་དར་ཆགས་སུ་ཡར་མར་ལྡིང་བ་ཡིན། རང་ཉིད་ཀྱི་ལྭ་བ་ཡོད་ཚད་ཀྱི་མ་གཞིའི་ཁ་མདོག་ལ་ན་འདམ་གྱིས་རི་མོ་དུ་མ་བྲིས་སོང་། དེ་ནི་མི་ཚོགས་ཁྲོད་ཀྱི་ང་ཚོའི་ཕན་ཚུན་ལ་བཅངས་བའི་བརྩེ་སེམས་ཤིག་དང་ཁ་བརྡའི་ཁྲོད་དུ་སྐད་ཆའི་སྒྱུ་རྩལ་ཞིག་དང་གཉིས་སུ་མ་མཆིས།

དགའ་བའི་བར་མཚམས་ནས་རང་ཉིད་ཀྟི་དྲན་བྱ་ནི་དྭངས་གཙང་གི་ཤོག་བུ་དཀར་པོ་ཞིག་ཏུ་གྱུར། དེ་ནི་ཡུན་རུང་དུ་རེ་སྒུག་གི་སེམས་ཀྱི་འཚོ་བ་ཉག་གཅིག་ཡིན། ང་ནི་ཚེ་སྲོག་གསོན་པའི་ཕུང་པོ་དང་བསམ་བློའི་སྣ་ཚོགས་ཀྱིས་བཏུམས་ཡོད་སྟབས། ངས་ཉིན་མཚན་ལ་དབྱེ་བའི་རྣམ་འགྱུར་ལས་རང་ཉིད་ཀྱི་དྲན་ཞེས་པའི་ཚོར་སྣང་འདི་བོར་མ་མྱོངས།

རང་ཉིད་ཀྱི་དྲན་པ་ནི་ཁ་སང་ངེད་གཉིས་ཀྱི་མ་འོངས་འཚོ་བའི་ཁ་ཕྱོགས་ཙམ་གླེང་བ་དེ་རེད།

འོན་ཀྱང་།

དགུན་ཟླ་མ་གཞི་ནས་གྲང་ངར་གྱིས་བཟི་ཡོད་པས་ངའི་སེམས་ལ་ཁོ་བོའི་སྐད་ཆ་རེ་རེའི་འདར་སིག་སིག་ཏུ་བྱས་སོང་། ཡང་ན་ཁོ་ཚོ་ནི་འཁྲབ་སྟོན་པ་ཞིག་གི་དཔང་ཡིག་མེད་ནའང་ཇི་འདྲིའི་ཕུལ་དུ་བྱུང་བའི་འཁྲབ་སྟོན་པ་ཞིག་ཏུ་གྱུར་འདུག་གམ། རང་ཉིད་ཀྱི་དྲན་འདི་བོར་བཞིན་བོར་བཞིན་འཁྲབ་སྟོན་པ་ཞིག་དང་སྐད་ཆ་ལ་སྒྱུ་རྩལ་ལྡན་མཁན་ཞིག་བྱེད་དྲན། དེ་ནི་དེང་རབས་མི་ཚོགས་ཁྲོད་དུ་མེད་དུ་མི་རུང་བའི་ཡོན་ཏན་ཞིག་འདྲ།

ཉེ་ཆར་གྱི་འཚོ་བ་ནི་དེ་རིང་གི་རི་རྒྱབ་དེའི་སྦས་པའི་ཡུལ་ལྗོངས་ཤིག་ཡིན་ན་ཅི་མ་རུང་ངམ། རང་ཉིད་ཀྱི་དྲན་ལ་སུ་གང་གིས་ཀྱང་འགོག་མི་ནུས། དཔེར་ན་ཁོ་བོ་དང་ཁོ་ཚོས་ཀྱང་འགོག་ཐུབ་བྲལ། དེ་ནི་རང་ཉིད་ཀྱིས་རང་ཉིད་ལ་སྟོང་བསམ་གྱི་རྨི་ལམ་རིང་མོ་སད་མེད་པས། ད་གཟོད་མུ་མཐུད་དུ་སྟོང་བསམ་ལ་ངས་ཚེ་སྲོག་གསོན་པོ་ཞིག་གི་སྙན་ངག་འབྲི་ཆོག

མི་ཡི་དྲན་པའི་འཛིན་སྟོབས་ཀྱི་ནུས་པ་ཟེར་བ་འདི་ནི་ཅི་འདྲའི་ཁྱད་ཚར་བ་ཞིག་རེད་ཨང་།

དྲན་པའི་ཁུག་སོར་ཉར་ཡོད་པའི་ཕྱིར་དྲན་དེ་དག་ལས་ཕལ་ཆེ་བ་མོག་པོར་གྱུར་བའམ་ཡང་ན་བྱུང་རིམ་ཆ་ཚང་གི་སྒྲིག་གཞི་ཐ་ཐོར་དུ་གྱུར་ཡོད་པ་ཤ་སྟག་ཡིན་མོད།

དེ་ལས་ལྡོག་སྟེ།

གནས་སྐབས་ཤིག་གམ་ཡང་ན་རྣམ་པ་ཕྲ་མོ་ཙམ། ཡང་ན་མི་ཞིག་གི་དགོད་ཉམས་ཤིག

འགུལ་སྐྱོད་ཆུང་ངུ་ཞིག

དབང་པོ་ལྔ་གང་རུང་གི་མྱོང་སྣང་ཕྲ་མོ་ཞིག

རྣམ་འགྱུར་ཞིག

སྐད་ཆ་ཚིག་གཅིག་སོཊ་བྱེ་བྲག་གི་བྱུང་བ་ཕྲ་མོའི་རིཊ་ནི་ཤིན་ཏུ་གསལ་པོའི་སྒོ་ནས་དུས་ནམ་ཡང་ཕྱིར་དྲན་དུ་འཁྱུག་ཙམ་གྱིས་གསལ་ལྷང་ངེར་འཆར་ཡོང་།

⚡

ང་ཚོ་ཀུ་རེ་ལྟ་བུའི་འཁོར་བ་འདིར་འཚོ་བཞིན་ཡོད་པས།
ཧ་ཅང་ནན་ཏན་ཡིན་ཁུལ་གྱིས་རང་གིས་རང་ལ་གཟེབ་དྲྭ་བཟོ་དགོས་དོན་མེད།

࿐རྫོང་སར་མཁྱེན་བརྩེ་ནས། https://t.cn/A6ceCH11