ནར་སོན་པའི་དོན་གྲུབ།

ཉིན་ཁ་ཤས་རིང་ལྷ་སར་ཁ་བ་ཅུང་མཐུག་ཙམ་བབས་པས་གནམ་གཤིས་ཀྱང་གྲང་ངར་ཇེ་ཆེ་གྱུར། དོན་གྲུབ་མལ་ལས་ལངས་རྗེས་སྔར་བཞིན་ཞོགས་ཟས་བོད་ཐུག་དང་ཇ་མངར་བཏུང་ལ་བྲེལ་བཞིན། ནམ་རྒྱུན་གྱི་ཇ་རོགས་ཁ་ཤས་ལ་ཁ་པར་བཏང་རུང་མཉམ་དུ་འགྲོ་མཁན་མེད་པས། གཅིག་པུར་འུར་ཟིང་ཆེ་བའི་ཇ་ཁང་གི་སྒོ་རྭའི་ནང་དུ་བོད་ཐུག་འཐུང་ནས་སྡོད་སྐབས། ཁ་བའི་འདབ་མ་ཐར་ཐོར་བར་སྣང་དུ་དལ་བར་རྒྱུ་བ་མཐོང་འཕྲལ་དོན་གྲུབ་ཀྱིས་མྱུར་དུ་ཇ་ཁང་གི་ནང་དུ་འཛུལ་ནས་སྒེའུ་ཁུང་འགྲམ་གྱི་འདུག་གནས་ཤིག་ཏུ་བསྡད། ཇ་མངར་འཐུང་ཞོར་སྒེའུ་ཁུང་ནས་ཕྱི་རུ་ལྟ་སྐབས་ཁ་བའི་འདབ་མ་སྔར་བཞིན་ཐར་ཐོར་ལས་མི་འབབ་རུང་། སྔར་གྱི་འུར་ཟིང་གི་རྣམ་པ་ཡོངས་སུ་ཡལ་ནས་ཕལ་ཆེ་བ་དོན་གྲུབ་དང་འདྲ་བར་ཇ་ཁང་ནང་དུ་འཛུལ་ནས་ཕྱི་རུ་གྲང་ངར་ཡང་ཆེ་ཁ་བ་ཡང་མཐུག་པོ་འབབ་བཞིན་འདུག་ཅེས་བརྗོད་ནས་གཅིག་གི་ངོར་གཅིག་གིས་བལྟས་ནས་བསྡད་འདུག འོན་ཀྱང་སྒོ་རྭའི་ནང་དུ་སྔར་བཞིན་ཇ་འཇུང་བཞིན་གླེང་མོལ་ལ་གནས་པའི་ན་གཞོན་དང་ཁ་བའི་འདབ་མའི་རྗེས་སུ་དེད་ནས་རྩེད་མོར་གཡེང་བའི་བྱིས་པ་དག་གི་ཕྱོགས་སུ་དོན་གྲུབ་ཀྱི་མིག་གི་འདྲེན་བྱེད་དབང་མེད་དུ་ཤོར་སོང་།

དུས་ཚོད་ཀྱི་འཁོར་ལོ་བར་མེད་དུ་འཁོར་ཞིང་། ལོ་ཟླ་ཡི་ཆུ་བོ་ཕྱིར་བཟློག་དཀའ་བས། ད་ཆ་མི་འདོད་བཞིན་དུ་ཉེར་ལྔའི་ལང་ཚོ་ཡོལ་བའི་དོན་གྲུབ་ཀྱིས་ཁ་བའི་འདབ་མའི་རྗེས་སུ་སྙེགས་ནས་གང་འདོད་དུ་རྩེད་མོར་རོལ་བའི་བྱིས་པ་དག་ལ་ཅེར་བཞིན་སྔོན་ཆད་རང་ཉིད་ཀྱང་མིག་སྔུན་གྱི་བྱིས་པ་ལྟར་རང་དང་ན་མཉམ་གྱི་བྱིས་པ་དང་ལྷན་དུ་བག་ཕེབས་ངང་འཚོ་བ་རོལ་མྱོང་བ་དྲན་ལ། བཅོས་མིན་གྱི་དགོད་སྒྲ་དང་འགྲོགས་པའི་ལྷད་མེད་ཀྱི་འཛུམ་མདངས་དག་ཅི་ལ་མི་དྲན། བུར་རྡོག་དང་ཀ་ར་ཆུང་ངུ་ལས་མེད་རུང་མཉམ་དུ་ལོངས་སྤྱོད་པའི་བྱིས་པ་སྣབས་ལུད་དེ་དག་ཅིས་ཀྱང་དྲན་སྲིད། དོན་གྲུབ་ཀྱིས་དེ་ལྟར་བྱིས་དུས་དང་འབྲེལ་བའི་སྤྲོ་སྣང་གིས་ཕྱུག་པའི་བྱ་བ་མང་པོ་ཞིག་དྲན་རུང་ཁོའི་སེམས་པ་ནི་ཕྱི་ཡི་གནམ་གཤིས་ལྟར་གྲང་བསིལ་བསིལ་དུ་གྱུར། སླར་ཡང་ཕྱིར་དྲན་གྱི་འཇིག་རྟེན་དུ་ཉུལ་སྐབས་དོན་གྲུབ་ཀྱིས་ན་གཞོན་དུས་ཀྱི་རང་ཉིད་མཐོང་ལ། ད་དུང་ཁོའི་གཞན་དྲིང་མི་འཇོག་པའི་སྤོབས་པ། ཁ་སེམས་གཅིག་མཐུན་གྱི་བྱ་སྤྱོད། ཚུལ་འཆོས་ཀྱིས་མ་བསླད་པའི་རང་གཤིས། སྐྱིད་སྡུག་མཉམ་མྱོང་གི་སྤུན་ཟླ་དག་དྲན་བཞིན་ཇ་མངར་ཕོར་པ་གང་འཐུང་རུང་རོ་མངར་བའི་བྲོ་བ་མྱོང་མ་ཐུབ། ནར་སོན་པའི་དོན་གྲུབ་ལ་མཚོན་ན་ཁོའི་ཕྱིར་དྲན་གྱི་འཇིག་རྟེན་ནས་མཐོང་བ་དག་རང་ཉིད་ཡིན་རུང་ཁོས་བྱ་བ་འདི་དག་རང་ཉིད་དང་འབྲེལ་བ་ཡོད་པར་སེམས་མི་ཕོད། དོན་གྲུབ་ཀྱིས་འདི་རྣམས་ནར་སོན་པའི་ཡོན་དུ་ཡོངས་སུ་ཕུལ་ཟིན།

ལོ་ངོ་ཉེར་ལྔའི་རིང་དོན་གྲུབ་ཀྱིས་མི་སྣ་མང་པོ་ཞིག་གི་ཟློས་གར་ཁྲབས་ཟིན་ནས་ད་ཆ་རང་ཉིད་ཀྱི་འཚོ་བ་ལ་འཇུག་སོང་། ནར་སོན་པའི་འཇིག་རྟེན་དུ་རང་ཉིད་ཀྱིས་ངོས་མི་ཟིན་པའི་མི་བུ་ཞིག་དུ་གྱུར་ནས་འཚོ་བ་རོལ་སོང་། ཡང་ན་སྔར་རང་ཉིད་ཡིད་མུག་པའི་མི་བུ་ཞིག་གི་འཚོ་བ་འཇུག་སོང་།

ངེད་༼ལྷོ་སྤྲིན་རིག་གཞུང་ཞབས་ཞུས༽་རེབ་འདིར་ཀུན་མཁྱེན་རྣམ་གཉིས་ཀྱི་སྙན་རྩོམ་ཆེད་བཏུས་ཀྱིས་དེབ་ཅིག་བཟོས་ཡོད། འདི་ཡང་ཀུན་མཁྱེན་རིན་པོ་ཆེའི་མཛད་འཕྲིན་གྱི་ཆ་ཤས་ལ་སྲིད་ཞུ་ཙམ་དུ་འགྱུར་བའི་གསོལ་སྨོན་དང་བཅས། [合十][合十][合十]

ཧ་ཅང་དྲང་པོ་བྱ་བའང་མ་ཡིན་ཏེ། །
ཧ་ཅང་དྲང་ན་གཞན་གྱི་བརྙས་ཁ་འོང་།

།
ཧ་ཅང་འཁྱོག་པོ་བྱ་བའང་མ་ཡིན་ཏེ། །
ཧ་ཅང་འཁྱོག་ན་མི་གྲལ་རྩིས་ཐང་ཆུང་། །
ཧ་ཅང་འཇམ་པོ་བྱ་བའང་མ་ཡིན་ཏེ། །
ཧ་ཅང་འཇམ་ན་དགྲ་མགོ་རང་ལ་ལྡང་། །
ཧ་ཅང་རྩུབ་མོ་བྱ་བའང་མ་ཡིན་ཏེ། །
ཧ་ཅང་རྩུབ་ན་ཀུན་དང་དགྲ་རུ་འགྱུར། །
དེ་ཕྱིར་དྲང་དང་འཇམ་ཚོད་རན་པ་སྟེ། །
དཔེར་ན་སྦྲུལ་ཆེན་ཐང་ལ་བགྲོད་པ་ལྟར།
དྲང་དགོས་གནས་ལ་དྲང་པོར་བྱ་བ་དང་། །
འཁྱིལ་དགོས་གནས་ལ་འཁྱིལ་བར་བྱ་བ་རིགས། །ཞེས་ཛམ་མིང་པས།