࿐དགེ་ལྡན་བསྟན་པའི་ཆུ་འགོ་མདོ་སྨད་བྱ་ཁྱུང་དགོན་གྱི་འཇམ་མགོན་བདག་ཉིད་ཆེན་པོ་སྐུ་ན་གཞོན་པའི་སྐབས་ཀྱི་འཇམ་དབྱངས་སྒྲུབ་གནས་ཨ་ར་པ་ཙའི་རང་བྱུང་གི་སྒྲུབ་ཁང་།

ཕེབས་པར་སྔ་སོང་།

དག་པའི་ཞིང་ན་བཞུགས་པའི་ཆོས་ཀྱི་རྗེ།།
སློབ་བུ་བྱ་རྒྱལ་རྒོད་པོ་ཁྱུང་ཆེན་བཞིན།།
གཅིག་འཕུར་གཉིས་འཕུར་ཁྱེད་ཀྱི་ཞིང་དུ་ཕེབས།།
ད་རང་ཕེབས་པར་སྔ་སོང་མཆེད་གྲོགས་ལགས།།

དེ་རིང་ཉི་མའི་གུང་ཇ་མ་རག་གོང་།།
ལག་འཕྲིན་བརྒྱུད་ནས་སྐད་ཆ་ངན་པ་ཞིག །
མཆེད་གྲོགས་དམ་པ་ཞིང་དུ་གཤེགས་ཚུལ་སོགས།།
རང་གི་རྣ་བར་ཐོས་ཚེ་སེམས་ལ་གཟེར།།

མཆེད་གྲོགས་ཁྱེད་ནི་བོད་པའི་མ་མ་ཞིག།
ཁྱེད་ཀྱིས་བསྐྲུན་པའི་སློབ་གྲྭ་གྲངས་མེད་ཞིག།
ཁྱེད་ཀྱི་བཀའ་དྲིན་སྐྱོངས་ནས་གསོ་སྐྱོང་བྱས།།
ཁྱེད་ཀྱི་ལྷག་བསམ་ནམ་ཡང་བརྗེད་མི་སྲིད།།

མཆེད་གྲོགས་ཁྱེད་ནི་བླ་མ་དག་མ་ཞིག།
ཁྱེད་ཀྱིས་བསྐྲུན་པའི་བཤད་སྒྲུབ་གྲངས་མེད་ཞིག།
ཐོས་བསམ་སྒོམ་བསྒྲུབ་བསྟན་པའི་རྒྱལ་མཚན་བཙུགས།།
ཁྱེད་ཀྱི་མཛད་རྗེས་ནམ་ཡང་བརྗེད་མི་སྲིད།།

མཆེད་གྲོགས་ཁྱེད་ནི་བོད་མི་དག་མ་ཞིག །
ཁྱེད་ཀྱིས་བསྐྲུན་པའི་རིག་གནས་སྲོལ་རྒྱུན་ཁང་།།
ང་ཚང་གངས་ཅན་བོད་ལ་ཞབས་རྗེས་བཞག།
ཁྱེད་ཀྱི་སྙིང་སྟོབས་ནམ་ཡང་བརྗེད་མི་སྲིད།།

མཆེད་གྲོགས་ཁྱེད་ནི་གྲྭ་སྐྱང་དཀྱིས་མ་ཞིག།
དཀར་ཟས་རིང་ལུགས་ཕྱི་དྲོའི་ཁ་ཟས་སྤོང་།།
སྡོམ་དང་དམ་ཚིག་སྲུང་བཞིན་མི་ཚེ་འདའ།།
ཁྱེད་ཀྱི་ལོ་རྒྱུས་རྡོ་རིང་ཞིག་ཀྱངབསྐྲུན།།

མཆེད་གྲོགས་ཁྱེད་ནི་བོད་པ་ཚང་གི་རྒྱན།།
མཆེད་གྲོགས་ཁྱེད་འདྲ་བོད་ལ་ཡོད་ན་དགའ།།
མཆེད་གྲོགས་ཁྱེད་ལ་དགའ་ཞིང་ཁྱེད་ལ་དུང་།།
མཆེད་གྲོགས་ཁྱེད་ལ་མྱ་ངན་སྙིང་ནས་ཞུ།།

༢༠༢༤ ༢ ༤ མཚན་མོ་ལ་མཆེད་གྲོགས་དམ་པ་སྤྲུལ་གཡུང་དྲུང་བཀྲ་ཤིས་ལགས་རྐྱེན་ལམ་དུ་ཤོར་ཚུལ་ཐོས་ནས་སེམས་གཏིང་ནས་ཕངས་བཞིན་རོང་ཆེན་སྐལ་བཟང་དབང་འདུས་ནས་གུས་ཕུལ།

སྐྱེ་བ་ཀུན་ཏུ་ཡང་དག་བླ་མ་དང་། །
འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །
ས་དང་ལམ་གྱི་ཡོན་ཏན་རབ་རྫོགས་ནས། །
རྡོ་རྗེ་འཆང་གི་གོ་འཕང་མྱུར་ཐུབ་ཤོག །

གཞན་ཡང་བདག་གིས་བགྱིས་དང་བགྱིད་འགྱུར་བའི། །
ལེགས་པར་སྤྱད་པ་ཇི་སྙེད་མཆིས་པ་ཀུན། །
ཁྱོད་ཀྱིས་དགྱེས་བཞིན་རྗེས་སུ་འཛིན་པ་དང་། །
བཀའ་བཞིན་སྒྲུབ་པ་ཁོ་ནས་རྒྱུར་གྱུར་ཅིག །

སྟོན་པ་བླ་ན་མེད་པའི་བསྟན་པ་དང་། །
མཇལ་བ་འདི་འདྲ་བླ་མའི་དྲིན་ཡིན་པས། །
དགེ་བ་འདི་ཡང་འགྲོ་བ་མ་ལུས་པ། །
བཤེས་གཉེན་དམ་པས་འཛིན་པའི་རྒྱུ་རུ་བསྔོ། །