ལོ་སར་བཟང་།

གསེར་གྱི་ཟོམ་ཆུང་ནང་གི །
དུང་ཞེན་འོ་ཁའི་སྤྲིས་མ། །
ཁྱེད་ལ་བཤོས་སུ་བསྟབས་ཡོད། །
ཞལ་གྱིས་བཞེས་རོགས་གནོངས་དང་། །

རྟེན་ཁེབས་རྙིང་བའི་ཐོག་གི །
བྱིན་ཆགས་གཡང་གི་རུ་མ། །
ཁ་བཏགས་ཉིན་མོ་བདེ་ལེགས། །
ཁྱེད་ཀྱི་མགུལ་ལ་སྒྲོན་ཡོད་། །

ལྷ་རྫས་གསེར་སྐྱེམས་གཙང་མ། །
མཆོད་སྐྱོགས་ནང་ལ་ལྟེམ་ཡོད།
ཁྱིམ་གྱི་ཕུག་ལ་གཤམ་ཡོད། །
འགོ་བའི་ལྷ་ལ་ཕུལ་ཡོད། །

རྒན་པ་ཚེ་ཐག་རིང་བའི་བཀྲ་ཤིས་ཤོག
གཞོན་པ་འདབ་ལག་རྒྱས་པའི་བཀྲ་ཤིས་ཤོག

སྐུ་ལ་གེགས་མེད་ཚེ་ཡི་བཀྲ་ཤིས་ཤོག
གསུང་ལ་འགག་མེད་དབྱངས་ཀྱི་བཀྲ་ཤིས་ཤོག

སེམས་ལ་གནོད་མེད་ཞི་བའི་བཀྲ་ཤིས་ཤོག
ལུས་ལ་ཟུག་མེད་བདེ་བའི་བཀྲ་ཤིས་ཤོག

ལོ་ཟླ་ཞོད་འཇགས་ཡོང་པའི་བཀྲ་ཤིས་ཤོག
གཞིས་བྱེས་ནང་མི་འཛོམས་པའི་བཀྲ་ཤིས་ཤོག

སྤྱི་ལོ་༢༠༢༤ལོ་བོད་ཤིང་ཕོ་འབྲུག་གི་ལོའི་ལོ་སར་ལ། བདག་དྲྭ་མིང་ལྷམ་མཐིལ་རྡོག་པས་ལོ་སར་གྱི་རྟེན་འབྲེལ་ཞུ། གནམ་ལོ་གསར་པའི་ནང་དུ་ཁྱིམ་ཚང་བདེ་ཞིང་སྐྱིད་པ། ཅི་བསམ་ལྷུན་གྱིས་གྲུབ་པ། བྱ་བ་ལམ་འགྲོ་ཡོང་བ། ལུས་སེམས་བདེ་སྐྱིད་ལྡན་པ། བཀྲ་ཤིས་བདེ་ལེགས་ཡོང་བའི་སྨོན་འདུན་ཞུ། སྤུན་ཟླ་ཚོ། ལོ་སར་བཟང་། བཀྲ་ཤིས་བདེ་ལེགས།

༄༅། །གངས་རིའི་ལྷ་གཅིག་ཕྱག་ན་པདྨོ་དང་། །
འགྲོ་བའི་དོན་མཛད་སྣང་བ་མཐའ་ཡས་གཙོས། །
བརྒྱད་ལྡན་སྒྲུབ་བརྒྱུད་ཤིང་རྟ་ཆེ་རྣམས་ཀྱི། །
མཁས་གྲུབ་བྱེ་བའི་སྐུ་ཚེ་རབ་བརྟན་ཏེ། །
གངས་རིའི་སྨག་ཆེན་སླར་ཡང་འཇོམས་པར་ཤོག །

རྟེན་འབྲེལ།

སྤྲིན་དཀར་གཡང་དུ་འཁོར་བའི་དབུས་སུ་རྩེན། །

སིང་སིང་སྙན་པའི་སྒྲ་བརྒྱ་ཐེངས་གསུམ་སྒྲོགས། །
སྦྲང་ཆར་བསིལ་མ་འབེབས་པའི་རྟེན་འབྲེལ་ཅན། །

འབྲུག་ལོ་གསར་པར་བཀྲ་ཤིས་སྨོན་འདུན་ཞུ