ཧཱུྃ་མགོན་པོའི་བཀའ་ཉན་ཀུན་གྱི་གཙོ་བོ་ཁྱོད།།
            མུན་པའི་མདོག་ཅན་སྲིན་པོ་ཁྲོས་པའི་ཞལ།།
            མེ་ལྕེ་བསྐྱོད་ལྟའི་སྐྲ་བརྫེས་མཆེ་བ་གཙིགས།།
            ཕྱག་གཡས་དགྲ་བགེགས་སྲོག་གཅོད་གྲི་གུག་གདེངས།།
            གཡོན་པ་གདུག་པའི་སྙིང་ཁྲག་གཙོ་ལ་སྟོབ།།
            སྟོང་གསུམ་བགྲོད་ཕྱིར་དོམ་ནག་སྨྱོན་པ་ཆིབས།།
            བལྟས་པ་ཙམ་གྱིས་ས་གསུམ་སྔངས་བྱེད་པ།།
            བདུད་འདུལ་ཆེན་པོ་ཀྵེ་ཏྲ་པཱ་ལ་ཁྱོད།།
            དམ་རྫས་བྱིན་གྱིས་བརླབས་པའི་གཏོར་མ་དང་།།
            བདུད་རྩི་ལྔ་ལྡན་བཏུང་བ་འདི་བཞེས་ལ།།
            རྡོ་རྗེ་འཆང་དབང་དཔལ་ལྡན་བླ་མ་དང་།།
            མྱུར་མཛད་ཡེ་ཤེས་མགོན་པོའི་བཀའ་བཞིན་དུ།།
            སངས་རྒྱས་བསྟན་པ་བསྲུང་ལ་མ་གཡེལ་བར།།
            ཆོས་བཞིན་སྒུབ་པའི་རྣལ་འབྱོར་བདག་ཅག་སྐྱོངས།།
            བཤད་སྒྲུབ་མཐུན་རྐྱེན་ཡིད་བཞིན་བསྒྲུབ་པ་དང་།།
            གདུག་པའི་དགྲ་བགེགས་མ་ལུས་ཚར་གཅོད་མཛོད།།
                                ࿐མཁས་གྲུབ་དགེ་ལེགས་དཔལ་བཟང་པོའི་གསུང་ངོ་།།

࿐འགྱུར་དེབ་འདིར། ལྕམ་མོ་ཅུས་ལིས་དཀའ་ཁག་སྣ་མང་ལ་མགོ་མི་སྒུར་བར<བགེགས་དང་བར་ཆད་སྲོག་གི་ངར>དུ་བསྒྱུར་ཐུབ་པའི་དཔའ་མཛངས་རྟུལ་ཕོད་ཀྱི་རང་གཤིས་དང་། རང་དབང་སྒེར་ཚུགས་ཀྱི་སྙིང་སྟོབས། ཕོ་ལན་རྒྱལ་ཁབ་ལ་ཨུ་རུ་སུས་བཙན་འཛུལ་བྱས་ཏེ་རང་གི་ཡི་གེ་སློབ་མཚམས་བཀག་ནའང་། རིགས་དོན་ལ་ཤ་ཞེན་ཆེ་བའི་ཕོ་ལན་མི་དམངས་ཀྱིས་མེས་རྒྱལ་སྲུང་སྐྱོབ་དང་ཡི་གེ་སླར་གསོ་ཡོང་ཕྱིར་མངོན་ལྐོག་གང་རུང་ནས་ཡི་གེ་སློབ་པའི་ཤ་ཞེན་དེས་ང་ལ་ཡར་སྐུལ་ཐེབས།

འགྱུར་རྩལ་གྱི་ཆ་ནས་ས་བཅད་མ་སྟོང་ཙམ་དུ་གླེང་ན། བོད་མིའི་སྐད་སྲོལ་དང་མཐུན་པར་ལོ་ཙཱ་བྱས་འདུག་ལ། སྐབས་དང་སྐབས་སུ་ཐོན་པའི་སྙན་ངག་གི་རྗོད་པ་རྣམས། ཚིག་ཉམས་ཆེ་ཞིང་ངག་སྐྱོར་བདེ་ལ། བློ་ངོར་ཡང་འབྱོར་སླ་བས་ཡིག་བསྒྱུར་གྱི་རྨ་ཤུལ་མཐོང་དཀའ།

སྒྱུར་བ་བོ་ཁོང་ནི། སྐད་རིགས་གསུམ་ལ་དབང་འབྱོར་བའི་ཤེས་ལྡན་པ་རབ་ཀྱི་གྲས་སུ་གཏོགས་ཤིང་། ལས་ཞོར་གྱི་ཁོམ་གླགས་ཅི་རིགས་ཆུད་མི་འཛའ་བར་ཡིག་སྒྱུར་ལས་ཀའི་སྟེང་ལ་བབས་ཏེ་གྲུབ་འབྲས་གཟུགས་ཅན་དུ་བྱུང་བ་ལ་རྗེས་སུ་ཡི་རངས་དང་། འགྱུར་དེབ་འདིའི་མཚན་བྱང་ལ«ལྕམ་མོ་ཅུས་ལིའི༼རང་རྣམ༽»ཞེས་གསོལ་བ་ལས་ཀྱང་། ཁོ་རང་ལྕམ་མོ་ཅུས་ལིའི་མཛད་པ་ལ་དགའ་བ་དང་སྤྲོ་བ། དད་པ་བཅས་ཡོད་པ་རྟོགས་ཐུབ།

མཇུག་ཏུ། སྒྱུར་མཁན་གྱིས། <དེབ་འདིས་ཁ་བ་རི་བའི་གཞོན་སྐྱེས་དག་ལ་ཧུར་སེམས་བསྐྱེད་ཅིང་། འཚོ་བའི་ལམ་ཁ་ནས་སྙིང་སྟོབས་དང་ཡིད་ཆེས་ཤིག་སྩོལ་ཐུབ་པར་སྨོན>ཞེས་པ་ལྟར། ཀློག་མཁན་ངས་ཀྱང་ཀུན་ལ་ཕན་ཐོགས་པར་གྱུར་ཅིག་ཅེས་སྨོན་ནོ། །

࿐དྲན་པའི་ཡོལ་བའི་ངོས་སུ་དམའ་འབྲིང་ལོ་རིམ་གཉིས་པ་ནས་བཟུང་ཏེ་ལོ་རེ་བཞིན་ཕ་ཡུལ་མདོ་སྨད་ཤར་ཕྱོགས་ཀྱི་ཆོས་སྡེ་ཆེན་མོ་ཀླུ་ཚང་དགོན་ཆེན་མོའི་གླིང་སྨད་ཀྱི་གྲྭ་ཤག་འདི་ནས་རིག་པའི་གནས་མཐའ་དག་ལ་མངའ་བརྙེས་པའི་དགེ་བའི་བཤེས་གཉེན་ཆེན་མོ་༧རྒྱ་གྲོལ་ལམ་ཤེས་རབ་བསྟན་དར་སོགས་ཀྱི་ཞབས་ལ་གཏུག་ནས་ས་ལམ་གྲུབ་མཐའ་དང་ལམ་རིམ། སྤྱོད་འཇུག སུམ་རྟགས། སྒྲ་རིག་པ། བསྡུས་གྲྭ། སྙན་ངག། ལོ་རྒྱུས་སོགས་གཙོས་པའི་གཞུང་རྣམས་བག་ཆགས་ཙམ་བཞག་མྱོང་བའི་ཁུལ་བྱས། ༢༠༡༥ལོ་ཡས་མས་ཙམ་ལོ་རེར་བཞིན་གནས་འདིར་ཡོང་པའི་སྐལ་བ་མ་ལྡན་ཡང་། ལོ་གཉིས་གསུམ་ནང་ལ་ཐེངས་ཤིག་ཅིས་ཀྱང་འདིར་ཡོང་ནས་དགེ་བའི་བཤེས་གཉེན་རྣམས་དང་གཞན་བློ་ཁ་མཐུན་པའི་ཆོས་གྲོགས་ཁ་ཤས་དང་ལྷན་ཏུ་ཁ་བརྡ་ཀློད། གུ་རེ་རྩེ། རྒྱ་ཇ་འཐུང་། ཟ་མ་ཟ་བ་སོགས་ལས་སྣ་ཚོགས་བྱས་པ་ཡིན། དེ་རིང་ཡང་བསྐྱར་གནས་འདིར་ཡོང་ནས་དགེ་བའི་བཤེས་གཉེན་རྣམས་ལ་ཁམས་བདེ་འཚམས་ཞུས་པ་ཡིན་ལ། ཕྱིར་ལམ་དུ་ཆས་དུས་དགེ་བའི་བཤེས་གཉེན་ཆེན་མོ་༧རྒྱ་གྲོལ་ལགས་ནས་བསམ་པའི་རྒྱགས་ཕྱེ་གྱ་ནོམ་པ་ཞིག་གིས་སྐྱེལ་མ་ཞུས།