གྲོགས་ངན་སྤངས་པས་དགའ་བ།
࿐བྱང་མེ།
སྔོན་གྱི་ལས་དང་ཕྲལ་གྱི་རྐྱེན་ངན་ལས།།
སྡིག་པའི་གྲོགས་པོ་བརྒྱ་སྟོང་མང་བོར་ཕྲད།།
དམ་ཆོས་ཐོས་པའི་གོ་སྐབས་མང་དུ་བཅོམ།།
འདི་འདྲ་སྙིང་ལ་དྲན་ན་སྐྱོ་བ་ལ།།

སྡིག་པའི་གྲོགས་དང་ཕྲད་ན་དར་ལྕོགས་འདྲ།།
མ་རབས་སྤྱོད་པར་འཇུག་ལ་རང་ཚུགས་མེད།།
དེའི་ཕྱིར་བློ་དང་ལྡན་ཞིང་བཟང་བོའི་མིས།།
རྣམ་ཀུན་གྲོགས་ངན་འདི་ལ་གཟབ་པར་མཛོད།།

སྡིག་པའི་གྲོགས་དང་ལྷན་དུ་ཚོགས་གྱུར་ན།།
བསྟོད་རྒྱུ་རང་དང་བཤད་རྒྱུ་གཞན་སྐྱོན་ཡིན།།
དུས་ཀུན་ཁ་མཆུ་འགོང་བོ་སྣ་ཚོགས་པ།།
ཆུ་བོའི་རྒྱུན་བཞིན་འདྲེན་འདི་སྡིག་གྲོགས་ཡིན།།

སྡིག་པའི་གྲོགས་དང་མཉམ་དུ་རྩོད་པའི་ཚེ།།
ཕན་ཚུན་བློ་སྐྱེད་ལེན་ལ་མི་འཇུག་པར།།
རང་རྒྱལ་གཞན་ཕམ་སྨྱོན་པའི་ཟློས་གར་གྱིས།།
གཞན་རྒྱུད་བསྲེགས་ཤིང་རང་གི་ལེགས་ཚོགས་འཇོམས།།

དེ་ཕྱིར་ཁོག་རྒྱ་མེད་པའི་སྡིག་གྲོགས་ལ།།
ཅི་བསམ་དོན་མེད་རྩོད་པ་སྣ་ཚོགས་ཀྱིས།།
ལས་ལ་འཇུག་པ་བདུད་ཀྱི་གཡབ་མོ་ཡིན།།
དེ་དང་ལྷན་དུ་མ་རྩོད་ཆོས་ཀྱི་གྲོགས།།

སྡིག་པའི་གྲོགས་དང་མཉམ་དུ་འགྲོ་བའི་ཚེ།།
ཆོས་བཞིན་འདུལ་བཞིན་སོང་ན་མི་མཛེས་ལ།།
ཅིའི་ཀྱང་སྤྱོད་པ་འཆལ་བའི་ངན་སྤྱོད་གྱིས།།
སོང་ན་སྡིག་གྲོགས་གང་ཡིན་དེ་དགའ་འོ།།

འདི་ནི་སྡིག་གྲོགས་རྣམས་ཀྱི་སྒོ་གསུམ་ལ།།
གདོད་ནས་ཞུགས་པའི་རང་བཞིན་བཅོས་མིན་ཡིན།།
དེ་ཕྱིར་ཆོས་བཞིན་འདུལ་བཞིན་བྱེད་འདོད་པའི།།
དམ་པའི་རིགས་རྣམས་འདི་ལ་ཐུགས་སྣང་མཛོད།།

སྡིག་པའི་གྲོགས་དང་ལྷན་དུ་བགྲོ་བའི་ཚེ།།
གཞན་གྱི་དོན་ལྡན་གཏམ་ལ་ཉན་ས་མེད།།
རང་གི་ཤེས་མེད་ཅ་ཅོའི་མཚང་གཏམ་ལ།།
བདེན་ཁ་མེད་ན་ཕ་རོལ་དམའ་འབེབས་བྱེད།།

དེའི་ཕྱིར་ཆོས་ལ་མཁས་པའི་སྐྱེ་བོ་རྣམས།།
བླང་དོར་ཡོད་པའི་བགློ་གླེང་ཞིག་བསམ་ན།།
ཅི་ཡང་མེད་པའི་གྲོགས་ངན་ལ་མ་རྩོད།།
འདི་ནི་ཆགས་སྡང་འཕེལ་བའི་སྣ་འདྲེན་ཡིན།།

མདོར་ན་སྒོ་གསུམ་བྱ་བ་གང་བྱེད་ཀྱང་།།
བློ་ཁོག་མེད་ཅིང་དམ་པའི་ཡོན་ཏན་རྣམས།།
གང་ཡང་མེད་པའི་སྐྱེ་བོ་ཕལ་ཆེར་དང་།།
མཉམ་དུ་འགྲོགས་ན་དུག་གསུམ་འཕེལ་བའི་རྒྱུ།།

དེ་ཕྱིར་སྐྱིད་ལ་སྡུག་པའི་འཇིག་རྟེན་འདིར།།
གྲོགས་ངན་འདུ་ཚོགས་རབ་ཏུ་མང་བ་ལས།།
གྲོགས་གཅིག་མེད་པར་གཅིག་པུར་གནས་དགོས་ཀྱང་།།
ང་ནི་དགའ་བ་གཡང་གི་རུ་མ་ཡིན།།

འདི་ནི་ཕྲན་བུ་གྲོགས་ངན་མང་བོ་དང་།།
མཉམ་དུ་འདྲེས་ཤིང་འགྲོགས་པའི་སྡོམ་ཚིག་ཡིན།།
སྡོམ་ཚིག་འདི་དང་མི་འགལ་དམ་བཅའ་ཡིན།།
འདིས་ཀྱང་གྲོགས་ངན་སྤངས་པས་བདག་ཡིད་མགུ།།

ཁྱོད་ནི། རུས་པ་གངས་ལས་གྲུབ་པའི་རྡུང་ལེན་མཁན་པོ་ཞིག
ཁྱོད་ནི། མགྲིན་པའི་རྩ་མདུད་གྲོལ་བའི་གླུ་ཡི་བང་མཛོད་ཅིག
ཁྱོད་ནི། བོད་པའི་རང་ཚུགས་མ་བོར་བའི་ཨ་མདོའི་ཕོ་རྒོད་ཅིག
ཁྱོད་ནི། གྲགས་སྙན་དང་རྒྱུ་ནོམ་གྱིས་བསླུ་བྲིད་མ་ཐེབས་པའི་བོད་པ་ངོ་མ་ཞིག

࿐ལྡོང་ཡོན་ཏན་རྒྱ་མཚོས།

࿑ གངས་ལྗོངས་ཁུ་བྱུག་སྔོན་མོའམ་རྡུང་ལེན་མཁན་བདུད་བྷེ་ལགས་མི་ཡུལ་དང་བྲལ་ནས་ལོ་འཁོར་བརྒྱད་འཁོར་བར་རྗེས་དྲན་དང་མྱ་ངན་ཞུ།

2016.2.27——2024-2-27

࿐ལམ་རིམ་རྣམ་གྲོལ་ལག་བཅངས་ལས།
སྒོམ་གྱི་འགོ་ཀུན་སློང་འཆོས་པ་དང་། ལམ་རིམ་གྱི་འགོ་དལ་འབྱོར། ཆོས་ལག་ལེན་གྱི་འགོ་ལས་འབྲས་ནས་ཚུགས་པ་ཡིན།ལས་འབྲས་ཀྱི་ཚུལ་འདི་སྟོང་ཉིད་ལས་ཀྱང་ཕྲ་ཞིང་དཔོག་དཀའ་སྟེ། སྟོང་ཉིད་ཀྱི་དོན་ཕྲ་ཞིབ་ཉན་རང་དགྲ་བཅོམ་པས་ཀྱང་རྟོགས་ཤིང་སྟོན་ནུས་ལ། ལས་འབྲས་ཀྱི་ཚུལ་ཕྲ་མོ་སངས་རྒྱས་ཁོ་ནའི་སྤྱོད་ཡུལ་ལུང་ཚད་མ་ཁོ་ནས་གཞལ་དགོས་པས་ན། ལས་འབྲས་འདི་ཤིན་ཏུ་ཕྲ་བས་སྡིག་པ་ཆུང་ངུ་ནས་འཛེམ་དགོས། ཞེས་གསུངས་སོ། །