མཐོ་སྒང་དབེན་ཁྲོད་ཀྱི་ཁུ་སིམ་དྲགས་པའི་སུན་སྣང་གིས་གྲོགས་པོ་ཚོ་ཁྲ་ཁྲ་ཟིང་ཟིང་གི་གྲོང་ཁྱེར་དུ་འགྲོ་འདོད་སྐྱེ་རུ་འཇུག་ལ།
ངོ་གདོང་ན་འཛུམ་བག་རྫུན་མ་རྐྱང་རྐྱང་གིས་འཚོ་བའི་གྲོང་ཁྱེར་གྱི་མི་དག་གིས།
བཅོས་མ་མི་དགོས་པའི་མཐོ་སྒང་གི་མི་དང་དྭངས་གཙང་གི་མཁའ་དབུགས་ལ་ཡིད་སྨོན་འཆོར་བཞིན་ཡོད་པ་སུ་ཡིས་ཤེས་སམ།

ཨ་མ་ལ་བྱང་ཆུབ་སེམས་དཔའ་ལྟར་སེམས་ཅན་ཐམས་ཅད་སྒྲོལ་བའི་ཐུགས་བསྐྱེད་མེད་མོད། འོན་ཀྱང་བུ་ཕྲུག་ལ་བདེ་སྐྱིད་ཐོབ་ཆེད་རང་མི་ཚེ་དེ་བུད་ཤིང་བཞིན་སྦར་བཞིན་ཡོད། ཨ་མའི་བརྩེ་བ་ནི་ལན་ལ་རེ་བ་མེད་པའི་བརྩེ་བ་ཡིན་ཞིང་། དེ་ལ་བུ་ཕྲུག་གིས་རིན་དོད་ཅི་ཡང་གཏོང་མི་དགོས་ལ། ཕར་ལ་དགྲ་བོར་བལྟས་ཀྱང་ཚུར་ལ་བྱམས་ཀྱིས་སྐྱོང་བར་བྱེད། བུ་ཕྲུག་གི་དྲུང་དུ་ཨ་མ་ནི་ཁྱིམ་བདག་གཅིག་དང་མི་འདྲ་བ་གཡོག་མོ་ཞིག་དང་འདྲ། ངས་ཨ་མ་ཕལ་མོ་ཆེས་བུ་ཕྲུག་གི་ཆེད་རང་སྲོག་བློས་འདོར་བ་ལ་ཐེ་ཚོམ་མེད་པ་ཡིད་ཆེས་ཡོད། འདི་ནི་ལྷ་སྒྲུང་མིན་ལ་སྟོང་བསམ་མིན་པར་དངོས་ཡོད་འཚོ་བའི་ནང་གི་ཨ་མ་རེ་རེའི་ལུས་སྟེང་ནས་མངོན་གྱི་ཡོད། འབྱོར་ཕྱུག་གི་ཁ་དོག་མི་འདྲ་ཞིང་། ཐོབ་ཐང་དང་བདེ་སྐྱིད་མི་མཚུངས་མོད། བུ་ཕྲུག་ལ་བཅངས་པའི་ནང་སེམས་ཀྱི་བརྩེ་བ་དེ་ཨ་མ་ཚང་མ་གཅིག་མཚུངས་ཡིན། ལྷག་ཏུ་དབུལ་པོ་དང་གཉོམ་ཆུང་གི་ཨ་མ་དེ་དག་གིས་བུ་ཕྲུག་གི་ཆེད་དུ་མྱོང་བའི་སྡུག་བསྔལ་དང་སེམས་ཚེགས་དེ་དེ་ལས་ཀྱང་ཡིད་དབང་འཕྲོག་པ་ཞིག་ཏུ་མཐོང་།

དུས་དེར།
སྒེའུ་ཁང་ནང་ནས་བསིལ་རླུང་འཇམ་པོ་ཞིག་དལ་གྱིས་ལྡང་ནས་དཔེ་དེབ་ཀྱི་ཁ་སུམ།
ཕྱི་རོལ་གྱི་ཟླ་བ་དང་རི་ཆུ་ནགས་གསུམ་ལྷང་འཇགས་སུ་གནས། བར་ཐག་རིང་བའི་སྲང་ལམ་ན་གློག་འོད་དཀར་སེར་དམར་ལྗང་དང་། རླངས་འཁོར་མང་པོ་ཞིག་ཀྱང་ཡར་འགྲོ་མར་འགྲོ་བྱེད་ཀྱིན་འདུག
སྐབས་དེར།
ངའི་ཟླ་འོད་ལ་དར་གུས་ཕུལ་ནས་རང་བྱུང་ཁམས་ལ་གྱེས་ཕྱག་ཕུལ། ཟླ་འོད་ཀྱིས་ང་ལ་མུན་ནག་གི་ནང་ནས་འོད་ཟེེར་མཐོང་བ་བཞིན། ང་ལ་མ་འོངས་པ་ལ་རེ་བ་དང་ཡིད་ཆེད་ཀྱིས་ཁེངས་སུ་བཅུག
ལོ་ཟླ་དེ་དག་དང་དུས་ཚོད་འདི་དག་གི་རིང་ལ། ངའི་རྒྱུན་དུ་ཕུགས་བསམ་དང་འདུན་པ་གི་ཆེད་དུ། གཞན་གྱི་མྱི་ཁ་དང་ཕྲག་དོག་ལ་འཇབ་རྒོད་བྱས་པ་དང་། ཡང་སྐབས་རེ་སྣང་མེད་དུ་འཇོག་པའང་ཡོད།