“ཆོས་ཕུང་སྤྲིན་གྱི་ལུས་ཕྲའི་ཕང་བ་ནས། །
རྒྱལ་བ་གཉིས་པའི་བསྟན་པ་འབྲུག་གི་སྒྲ། །
བཟང་པོའི་བསྐལ་པ་དབྱར་དུས་ཇི་སྲིད་དུ། །
མི་འགྱུར་རྡོ་རྗེའི་དཔལ་དུ་འགྲུབ་གྱུར་ཅིག །”
ཟ་ཧོར་གྱི་བཙུན་པ་༧ ངག་དབང་བློ་བཟང་རྒྱ་མཚོས།

འདི་ནས་བརྩིས་པའི་མི་ལོ་བཞི་བརྒྱ་ལྔ་བཅུའི་མཚམས་སུ་སྐུ་འཁྲུངས་བའི་ཇོ་ནང་པ་རྗེ་བཙུན་ཏཱ་ར་ནཱ་ཐའི་གསུང་རྩོམ«བདག་ཉིད་ཀྱི་རྣམ་ཐར་ངེས་པར་བརྗོད་པའི་དེབ་གཏེར་མ་བཅོས་ལྷུག་པའི་རྟོགས་བརྗོད།»ཞེས་པ་རུ། “ ངེད་ལ་ཆུང་ངུའི་དུས་ནས་ཡུལ་སྤྱོད་ཉིད་ཀྱིས་ཉ་ཕག་སྒོང་གསུམ་དང་སྲོག་ཆགས་སྣ་ཚོགས་པའི་ཤ་ཟོས་པས་དེ་ལྟ་བུའི་ཟས་གྲིབ་ཀྱིས་བསྒྲིབས་པ་ཡིན་ནམ། རིག་པའི་འཇུག་སྒོ་འདི་ལ་དཔག་ན།

…… ཟས་ཀྱིས་སྒྲིབ་རྒྱུ་རང་ཅི་ཡོད་ཤར་བ་སྙམ་མོད། ལར་ནི་རྟེན་འབྲེལ་མཐའ་ཡས་པས་དེ་འདྲ་ཨང་སྲིད་པ་འདུག ”ཅེས་དང་།

གཞན་ཡང་སྔོན་དཔང་ལོ་ཆེན་པོ་སྐུ་ཆུང་ངུའི་དུས་ལུག་གི་འོ་མས་གསོས་པས་རྣམ་དཔྱོད་ཀྱི་ཕྱེད་འགྲིབས་པའི་གཏམ་རྒྱུད་ཀྱང་ཡོད།

ཉེ་རབས་དབང་རྩའི་ཚན་རིག་པ་དག་གི་ལྟ་དགོངས་དང་དཔྱདའབྲས་སོགས་ལས་བྱུང་བ་ལྟར་ན།

ཤ་དང་སྒོང་བ་འོ་མ་གསུམ་ནི་དགག་བྱའི་བཟའ་བཏུང་དུ་བགྲང་འདུག་པ་དང་དེས་མིའི་ལུས་ལ་བསྐྱེད་པའི་གནོད་པ་ནི་གོང་དུ་བཀོད་པ་བཞིན་རང་རེའི་མེས་པོ་གོང་མ་རྣམས་ཀྱིས་མི་ལོ་བཞི་བརྒྱ་ལྔ་བརྒྱའི་གོང་ནས་མྱོང་བ་དང་དཔྱད་པས་ཕུ་ཐག་བཅད་ཟིན་པ་དག་དང་གཅིག་ཏུ་སོང་འདུག་པ་མཐོང་དུས།

བློ་གྲོས་དང་ཤེས་བྱའི་རྩལ་ལ་ཐོགས་པ་མེད་པའི་མེས་པོ་དག་གི་རྣམ་དཔྱོད་དང་འཇོན་ཐང་ལ་ང་རྒྱལ་སྐྱེ་འོང་བ་ཞིག་མ་རེད་དམ།

འགོས་ལོ་གཞོན་ནུ་དཔལ་གྱི་རྣམ་ཐར་དུ།

ལོ་ཙཱ་བ་ཉིད་ཆུང་ངུའི་དུས་ནས་ཤ་མི་བཞེས་པའི་དམ་བཅའ་བཞག་ཅིང་།

སྐུ་ཚེ་གང་བོར་ཤ་མ་བཞེས་ཞེས་གསུངས་འདུག

རྣམ་དཔྱོད་ནི་ཕུལ་དུ་བྱུང་བས།

པཎ་ཆེན་ནགས་རིན་གྱིས་ཀྱང་བོད་ན་འགོས་ལོ་ལྟ་བུའི་ཤེས་རབ་ཅན་ཞིག་མ་མཐོང་གསུངས།

དེར་དཔགས་པས་ཀྱང་རྩི་ཤིང་དང་འབྲུ་རིགས་ཀྱི་བཟའ་བཏུང་ནི་ཆེས་རང་བྱུང་དང་གནོད་མེད་དུ་བསྟན་པ་ངང་གིས་གྲུབ་བོ་སྙམ།

____ རེ་ཀིས།

_______གྲུབ་བརྒྱའི་གཙུག་རྒྱན་མིད་ལ་བཞད་པ་རྡོ་རྗེ་མཁྱེན།

ཨོཾ་ཨཱཿ

གུ་རུ་ཧ་ས་བཛྲ་ཧཱུྃ།
གངས་དང་སྨུག་པས་བཟུང་བའི་རི་སུལ་དུ། །
འཇིགས་མེད་བག་ཡངས་རྒྱུ་ཞིང་འཚོ་བ་ཡི། །
སྲབ་མེད་སེང་ཆེན་མཁའ་ལ་མཆོང་འདྲ་བ། །
འཛམ་གླིང་གྲུབ་པའི་འཁོར་བསྒྱུར་མིད་ལ་རྗེ། །

འཕགས་པའི་ཡུལ་ནས་པཎ་ཆེན་ནཱ་རོ་པས། །
གངས་ལ་ཉི་མ་ཤར་འདྲའི་སྐྱེས་བུ་ཞེས། །
གསུང་གིས་བསྔགས་ཏེ་དབུ་ལྕོག་དུད་པའི་ཡུལ། །
གངས་ཅན་གྲུབ་བརྒྱའི་གཙུག་རྒྱན་མིད་ལ་རྗེ། །

བློ་ལས་འདས་པའི་དཀའ་སྤྱད་སྙིང་རུས་དང་། །
མོས་གུས་ཟབ་མོས་དབེན་པའི་རི་སུལ་ནས། །
སྐུ་ཚེ་ཧྲིལ་པོ་སྒོམ་སྒྲུབ་གནད་ལ་གཞོལ། །
སྒྲུབ་བརྒྱུད་བསྟན་པའི་རྒྱན་གཅིག་མིད་ལ་རྗེ། །

ཆོས་བརྒྱད་འགོང་བོ་རྡོག་པའི་འོག་ཏུ་བརྫིས། །
ལྟོ་གོས་གཏམ་གསུམ་ཆུ་དང་རླུང་ལ་བསྐུར། །
སྐུ་ཚེ་ཧྲིལ་པོ་དབེན་པར་སྒྲུབ་ལ་གཞོལ། །
རྣམ་དག་ཆོས་པའི་གཙུག་རྒྱན་མིད་ལ་མཆོག །

རྗེ་བཙུན་མར་པ་གཏན་གྱི་སྐྱབས་སུ་བཟུང་། །
བཀའ་བཞིན་སྒྲུབ་པའི་མཆོད་པས་རྒྱུན་དུ་མཆོད། །
བྱིན་རླབས་སྟོབས་ཀྱིས་བསྟན་འགྲོའི་དོན་ཆེན་གྲུབ། །
རྣལ་འབྱོར་དབང་ཕྱུག་ཁྱེད་ཉིད་རྗེས་སུ་དྲན། །

གཅིག་པུ་རི་ལ་སྒོམ་པའི་སྒོམ་བསྲན་ཅན། །
སྣང་སྲིད་དཔེ་རུ་ཤར་བའི་རྣལ་འབྱོར་བ། །
རྟོགས་པས་རང་རྒྱུད་གྲོལ་བའི་རས་པ་ཁྱོད། །
ནམ་ཡང་ཡིད་ཀྱི་གཏིང་ནས་དྲན་ཞིང་གུས། །

ཞེས་རྗེ་མིད་ལ་བཞད་པའི་རྡོ་རྗེའི་འདས་མཆོད་ཉིན་སྒོམ་སྡེ་སྦྱིན་པས་དད་གུས་དང་བཅས་སྨྲས་པ་དགེའོ། །