བླ་མ་རྗེ་བཙུན་སྒྲོལ་མའི་ལྷ་ཚོགས་ལ།།
ཕྱག་འཚལ་སྐྱབས་མཆི་བདག་ཅག་སྒོ་གསུམ་གྱིས།།
བྱ་བ་གང་བརྩམ་ཡིད་ལ་སྨོན་པ་ལྟར།།
ལྷུན་གྱིས་འགྲུབ་པའི་རླུང་རྟའི་དངོས་གྲུབ་སྩོལ།།
祝自己心想事成

བརྗེད་དུ་མེད་པའི་མི

------ ཨ་ལགས་ཆོབ་ཚེ།
དྲན་པའི་ལོ་ཟླ་གཉེར་མའི་རྐང་ལམ་དུ།།
​སུ་ཡི་མིག་ལ་རྒས་རྟགས་སྟོན་པ་ནི།།
རྣམ་དག་ནང་གི་ཁ་དོག་འགྱུར་མེད་ལས།།
སྒྱུ་མའི་མེ་ཏོག་སྐྱེས་སུ་འབུལ་བ་མིན།།

ཁྱེད་རང་གློ་བུར་གཤེགས་པའི་ཞོགས་པ་ནས།།
ཉི་འོད་ལས་ཡང་གྲང་རླུང་ལྡན་པ་དང་།།
ཕ་མ་ཡིན་ཡང་རྒྱུས་མེད་སོང་བ་སོགས།།
དུས་བཞི་དགུན་དུ་བྱུང་བའི་གཏམ་རྒྱུད་རིང་།།

ཨ་ཡས་ཟེར་ནས་ལོ་ངོ་ཉེར་ལྔར་འབོད།།
ཨ་མྱེ་ཟེར་ནས་ལོ་ངོ་བཅུ་བཞིར་འབོད།།
འབོད་པའི་སྐད་སང་གཉོམ་པོ་ཆུ་ལ་སྐུར།།
ཆུ་མིག་ཅ་ཅོའི་ངུ་སྐད་སྙིང་ལ་ཟུག།

དོ་ནུབ་ཟླ་འོད་གྲིབ་མས་མ་སྒྲིབ་ཅིང་།།
ཁྱི་ལྡོམ་ཟུག་སྐད་མཐོ་རུ་མ་སོང་མོད།།
ཡུན་རིང་སོང་བའི་སྙིང་ཁྲག་དྲོན་མོ་ཞིག།
ཁ་ནས་མི་སྐྱུགས་གཟེར་རྒོད་བཟོད་མ་བྱུང་།།

འདི་ཕྱི་གནམ་ས་གྱེས་པའི་གདུང་བའི་གཏམ།།
སུ་ལ་གསང་དུ་ཡོད་པ་གཅིག་མཚུངས་ཀྱང་།།
ང་ལ་ཕྱི་ནང་མེད་པས་དམར་རྗེན་དུ།།
ཁྲོམ་ལ་སྟོང་འབོད་ཤོར་བ་དགོངས་དག་ཞུ།།

བོད་རྒྱལ་ལོ་༢༡༥༡-༡-༡༩ཉིན་ཁང་རྙིང་དུ།
​

འཛམ་གླིང་གི་གནས་ཚུལ་མི་ཤེས་པས་བྱིས་པ་ཚོ་འུར་སྐད་མཐོ་བ་རེད།

མཁས་དབང་ཚུལ་ཁྲིམས་བློ་གྲོས།
ཟིན་བྲིས་པ། མཐུ་སྟོབས་དབང་རྒྱལ་དང་ཆོས་རྗེ།

སྒོམ་རྒྱག་དགོས་པའི་གནད་དོན་གྱི་རྩ་བ་དེ་གང་རེད་ཅེ་ན། སྤྱི་ཚོགས་ཀྱི་ཐོག་ནས་དཔལ་འབྱོར་ཁོ་ན་ལ་བསམ་བློ་བཏང་བཞག་པའི་རྒྱུ་མཚན་གྱིས་མི་རྣམས་ཀྱི་སེམས་ལ་སྡུག་བསྔལ་ཆེན་པོ་ཡོང་བ་དང་། སེམས་སྟོང་པར་གྱུར་ནས་མི་མང་པོ་ཞིག་གིས་མི་ཚེ་ཡི་སྙིང་དོན་ཅི་ཞིག་ཡིན་ཧ་མི་གོ། ཅི་ཞིག་བྱེད་དགོས་མི་ཤེས་པར་མཐའ་མཇུག་ལ་ཉལ་ཐ་འཐེན། འཁྲུལ་སྣང་འདྲ་མིན་སྐྱེ་བྱེད་ཀྱི་དུག་ཟེར་དགོས་ན་འདྲ་སྨན་ཟེར་དགོས་ན་འདྲ་གང་ལྟར་དེ་འདྲ་འཐུང་། སྒོར་མོ་ཅུང་ཙམ་ཡོད་པ་དེས་ཅི་ལས་འདི་ལས་མེད་ནས་ཤོ་རྒྱན་འདྲ་མིན་མང་པོ་སྐུག།མདོར་ན་སྤྱི་ཚོགས་དེ་དེ་འདྲའི་རྙོག་གྲ་ཅན་ཞིག་ཏུ་འགྱུར་འགྲོ་དུས་མི་རྣམས་ཀྱིས་སྒོམ་རྒྱག་རྒྱུ་དྲན་ཡོང་བ་རེད།

དེ་ལ་སྤྱི་ཚོགས་ཀྱི་ཐོག་ནས་འགྱུར་བ་གཏོང་དགོས་རེད་མ་གཏོགས་སྒོམ་རེ་བརྒྱབ་ནས་བསྡད་ན་བཟི་སྨན་འཐུངས་བ་དང་འདྲ་འདྲ་རེད་ཟེར་ནས་སྐྱོན་བརྗོད་བྱེད་མཁན་མང་པོ་ཡོད་ཀི། དེ་བདེན་པ་རེད། སྤྱི་ཚོགས་ཀྱི་ཐོག་ནས་འགྱུར་བ་གཏོང་མ་ཐུབ་ན་སྒོམ་ཇི་ཙམ་བརྒྱབ་ཀྱང་དོན་གྱི་ཐོག་ནས་སེམས་ཀྱི་སྡུག་བསྔལ་དང་། སྤྱི་ཚོགས་ཀྱི་རྙོག་གྲ་ཐམས་ཅད་ཇེ་བས་ཇེ་མང་དུ་འགྲོ་ཡི་རེད། དེ་ཡིན་དུས་ནུབ་ཕྱོགས་ཀྱིས་མ་འོངས་པ་ལ་ནང་ཆོས་ཀྱི་ནང་ནས་སྒོམ་དང་མཉམ་དུ་ལྟ་བ་དང་། སྤྱོད་པ་འགའ་ཤས་ག་ལེར་ལེན་ས་ཡོད་ཀི། དེ་བླངས་སོང་ན་ཁོ་རང་ཚོའི་སྤྱི་ཚོགས་དེ་ཡག་པོ་ཡོང་ས་ཡོད་འདུག། །དེས་ན་ལས་རྒྱུ་འབྲས་ཁས་ལེན་མཁན་ཞིག་ཡིན་ན་འདྲ། མི་ལེན་མཁན་ཞིག་ཡིན་ན་འདྲ། ནང་པའི་ཆོས་འདི་ཚེ་ཕྱི་མ་མ་ཟད་ཚེ་འདི་ལའང་ཕན་ཐོགས་ཅན་ཞིག་ཡིན་པ་དེའི་ཐོག་ནས་ཤེས་ཀྱི་རེད།

ཅང་མི་ཤེས་མཁན་ཚོས་ཆོས་ཟེར་བ་དེ་སྤྱི་ཚོགས་ཡར་རྒྱས་མི་འགྲོ་སྤྱད་ཅིག་རེད་ཟེར་ནས་ལུང་མང་པོ་ཞིག་དྲངས་ཁུལ་བྱས་པ་རེད། མ་འོངས་པ་ལ་ཟེར་མི་ཤེས་མོད། འོན་ཀྱང་། ལོ་བཅོ་ལྔ་ཉི་ཤུའི་ནང་ལ་ནུབ་ཕྱོགས་ཟེར་བ་དེ་སྔོན་ཐོན་རེད། དེས་ཀྱང་ཁ་ཚུར་འཁོར་ནས་སྒོམ་ཉམས་ལེན་བྱེད་རྒྱུ་དང་། བྱམས་སྙིང་རྗེ་བསྒོམ་རྒྱུ་དེ་ཚོར་རིན་ཐང་ཡོད་པ་ཧ་གོ་སྟེ་ཆོས་ཀྱི་ནང་ནས་ཕར་བླངས་པ་རེད། རེད་དེ། ཅང་མི་གོ་མཁན་ཚོས་ཆོས་ཟེར་བ་འདི་དགོས་གལ་ཅན་ཞིག་དང་། ཡར་རྒྱས་འགྲོ་བྱེད་ཅིག་ག་ལ་ཡིན་ཏེ། སྡུག་པོ་ཞིག་ཏུ་འདྲུད་བྱེད་ཅིག་ཡིན་སྣང་སྐྱེས་ནས་དེ་ལྟར་ཟེར་གྱིན་ཡོད་པ་རེད། དེ་ཚོས་འཛམ་བུ་གླིང་གི་ལོ་རྒྱུས་དང་གནས་ཚུལ་མ་གོ་དུས་ཐུགས་ཁག་ཡོད་མ་རེད།

དངོས་གཙོ་དང་རིག་གནས་གསར་བརྗེ་མ་གཏོགས་ཅི་ཡང་མ་གོ་བའི་དགེ་རྒན་ཚོས་དེ་ལྟར་ཟེར་འདུག་དུས་དེ་དག་གི་ཁར་བརྒྱུགས་ཏེ་སློབ་མ་ཚོས་ཀྱང་ཡིན་སྣང་སྐྱེས་ནས་ཟེར་འོང་བ་རེད། དེ་ལ་སྤྲོ་རྩ་བ་ཉིད་ནས་ལང་ཉན་མ་རེད། མ་འོངས་པར་དུས་ཚོད་ཅུང་ཙམ་དགོས་རེད་མ་གཏོགས་ཁོང་ཚོས་ག་ལེར་གོ་ཡོང་གི་རེད། སུ་ཞིག་ཡིན་ཡང་ཡར་རྒྱས་འགྲོ་ཡི་རེད། དེ་འོག་ན་བཤད་འདུག །ང་ཚོ་ཚང་མས་དེ་དག་ཧ་གོ་དགོས་རྒྱུ་ཞིག་རེད།

འགྲན་རྩོད་མང་པོ་ཞིག་ཡོད་སྟབས་སེམས་ཀྱི་ཟུག་རྔུ་དང་སྡུག་བསྔལ་མང་པོ་བྱུང་ཞིང་། དེ་བྱུང་དུས་གོང་དུ་བཤད་པ་ལྟར་དེ་དག་སེལ་ཐབས་གཞན་མེད་པར་གོ་ནས་སྒོམ་རྒྱག་རྒྱུ་དེ་དྲན་བཞག་པ་རེད། རང་གཅིག་པུ་ཧ་ལས་པ་ཞིག་ཡིན། གཞན་ཚང་མ་སྡུག་པོ་ཞིག་རེད་ཟེར་ནས་གཞན་ལ་སྐྱོན་བརྗོད་བསྡད་དུས་མགོན་སྐྱབས་ལྷ་སྲུང་རྣམས་ཀྱི་ནུས་པ་ཟད་ནས་སྲུང་མི་ཐུབ་པར་འགྱུར་འགྲོ་ཡི་རེད་ཅེས་གསུངས་པ་རེད།

དེ་ལ་སོགས་པའི་རྒྱུ་རྐྱེན་གྱིས། །
རང་གི་ཕུན་ཚོགས་འཇོམས་པ་ཡི། །
མི་གཙང་རྫིང་བུར་གནས་བཞིན་དུ། །
ལྷ་བརྒྱ་ཀླུ་སྟོང་བོས་ན་ཡང་།།
དྲུང་དུ་འདུ་བ་ཤིན་ཏུ་དཀའ། །
ཞེས་གསུངས་ཏེ།

དེ་ལ་སོགས་པའི་རྒྱུ་རྐྱེན་གྱིས་རང་གི་ཕུན་ཚོགས་གཞོམ་པར་འགྱུར་ཞེས་གསུངས་པ་རེད། དེ་རིང་ཁ་རྩང་གི་སྤྱི་ཚོགས་དེ་རྙོག་གྲ་ཅན་སྡུག་པོ་ཞིག་ཏུ་འགྱུར་འགྲོ་ཡི་ཡོད་རེད། མ་འོངས་པར་ཅུང་ཙམ་ཡར་རྒྱས་འགྲོ་རྒྱུ་ཨེ་ཡོད་མི་ཤེས་མ་གཏོགས་ཧ་ལས་པ་དཀའ་མོར་འགྱུར་གྱི་ཡོད་རེད། ཕྱི་ནས་ཕར་བལྟས་ན་ཧ་ལས་པ་ཡར་རྒྱས་རེད། འོན་ཀྱང་ནང་ནས་རྙོག་གྲ་མང་པོ་བུད་དེ་དཀའ་མོར་འགྱུར་གྱིན་ཡོད་རེད་འཛམ་བུ་གླིང་འདིར་བདེ་འཇགས་ཀྱི་སྣང་བ་ཅུང་ཙམ་ཡང་མེད་པར་འགྱུར་གྱིན་ཡོད་པ་རེད། ང་ཚོས་དེ་འདྲ་ཞིག་ཅང་ཡིན་དོན་ཨེ་ཡོད་ཟེར་ན། སྤྱི་ཚོགས་ཀྱི་གནས་ཚུལ་མ་གོ་བའི་རྒྱུ་མཚན་གྱིས་རེད། དེ་གོ་འོང་དུས་མཐའ་མཇུག་ལ་ངོ་མ་སྙིང་པོ་ཅན་ཞིག་ཡོད་ན་ཆོས་རེད་མ་གཏོགས་དེ་ལས་གཞན་ཅི་ཡང་མི་འདུག་བསམ་རྒྱུའི་ངེས་པ་རྙེད་ཡོང་གི་རེད།

དེ་ཡན་ཆད་ལ་ཡར་རྒྱས་འགྲོ་རྒྱུ་མེད་ས། འདིའི་ནང་ལ་མེད་ན་བདེ་བ་ཅན་འདྲ་ལ་ཡོད་ན་མ་གཏོགས་ས་གོ་ལའི་ཐོག་ལ་འདི་ལས་ལྷག་མེད་པ་དེ་དག་ལ་ལྟ་འོང་དུས་རྙོག་གྲ་དག་དག་རེད། འོན་ཀྱང་ཕྱོགས་ཁ་ཤས་ནས་བཤད་ན་ཡག་པོ་ཡོད་རེད། ཆ་ཚང་སྡུག་པོ་དག་དག་རེད་ཟེར་ན་དེའི་མིང་ལ་སྐྱོ་སྣང་རིང་ལུགས་པ་ཟེར་གྱི་རེད། དེ་ཡང་འགྲེལ་བཤད་རྒྱག་ལུགས་ཕྱིན་ཅི་ལོག་པ་ཞིག་རེད། ཡིན་ཡང་རྙོག་གྲ་ཧ་ལས་པ་མང་པོ་རེད། དེ་ཡིན་དུས་མཐའ་མཇུག་ལ་རང་རང་གིས་ཆོས་བསྒྲུབས་ནས་སེམས་ཀྱི་ཐོག་ནས་ཡར་རྒྱས་རེ་འགྲོ་ཨེ་ཐུབ་བལྟས་ན་སྙིང་པོ་ངོ་མ་དེ་རེད་མ་གཏོགས་མི་འདུག་བསམ་རྒྱུའི་ངེས་པ་རྙེད་ཡོང་གི་རེད།

སྤྱི་ཚོགས་ཀྱི་གཏིང་ཟབ་མོ་ཞིག་མ་གོ་ན་དེ་འདྲ་བསམ་ཡོང་གི་རེད་མ་གཏོགས་གཏིང་ངོ་མ་གོ་ན་དེ་འདྲ་རེད། མི་སྐྱ་ཕོ་མོ་ཚོས་ལ་ཁའི་རི་དྭགས་དང་། ལུང་ཁོག་གི་སྒོ་ཟོག་བསད་པ་ལ་སོགས་པའི་མི་དགེ་བ་མང་པོ་བསྒྲུབས་ནས་ལྷ་འབོད་ཀླུ་འབོད་མང་པོ་ཞིག་བྱེད་ཁུལ་བྱེད་ཀྱི་རེད། འོན་ཀྱང་། མི་གཙང་གི་རྫིང་བུར་གནས་བཞིན་དུ་ལྷ་ཚོ་འདིར་ཚུར་ཤོག་ཅེས་འབོད་པ་དང་མཚུངས་པས་དྲུང་དུ་འདུ་ཡི་མ་རེད་ཅེས་གསུངས་པ་རེད།