༤༽ལྷིང་འཇགས་ཀྱི་སྒེའུ་ཁུང་ལས་རྨི་ལམ་གྱི་གསང་བ་ཁུར་བའི་ཕྱི་རོལ་གྱི་འཇིག་རྟེན་མཐོང་ཐེངས་རེར། བདག་གིས་ཚེ་སྲོག་གི་རྒྱུ་བ་ཧ་ཅང་མང་པོ་ཞིག་གི་སྐྱེ་འཇིག་ལ་བསམ་བློ་ཡང་ཡང་འཁོར། འདི་ནི་མི་ཕབ་ལ་ཞིག་གི་ནང་སེམས་ཀྱི་འཕོ་འགྱུར་ཙམ་ལས་ཅི་ཡང་མིན་སྲིད་ཀྱང་། ཧ་ཅང་མགྱོགས་དྲག་པའི་ལོ་ཟླའི་འཁོར་བསྐྱོད་ཁྲོད་ནས་ཚེ་སྲོག་གི་སྐྱེ་འཕོ་ནི་དེ་བས་ཀྱང་མགྱོགས་པ་ང་ཚོའི་གཞི་ནས་ཚོར་གྱིན་མེད་པ་འདྲ། གང་ལྟར་མུན་རུབ་ཐེངས་རེར་ཚེ་སྲོག་གི་འགྲུལ་བཞུད་ད་དུང་མཚམས་བཞག་པ་གསལ་བོར་མཐོང་བ་ནི་ཆོས་ཉིད་ཅིག་རེད།

ཟབ་པའི་རིག་གནས་ཁུང་དུ་སྦས་ཁུལ་གྱི།།
དཔྱོད་པའི་མདའ་མོའི་གཟུར་གནས་མངའ་ཚུལ་གྱི།།
ཆོས་མིན་ཐུབ་པའི་བསྟན་པ་སྤེལ་མཁན་གྱི།།
མགོ་རེག་བཤད་མཁས་ཅན་ཚོ་སྨྱོན་པ་རེད།།

གནས་ལུགས་ཕྲ་མོའི་རང་བཞིན་ཤེས་ཁུལ་གྱི།།
གཞུང་ལུགས་ཟབ་མོ་དགོངས་དོན་མ་རྟོགས་པར།།
རང་ཉིད་ཀུན་ལས་མཛངས་པའི་ང་རྒྱལ་གྱི།།
མཐོ་མཐོ་གནམ་ལྷ་ལྟ་མཁན་སྨྱོན་པ་རེད།།

མདོར་ན་རང་གཞན་དྲིན་ཤེས་རྨོངས་པ་ཡི།།
ཚུལ་མིན་གཞན་ནོར་ཧམ་གྱིས་སྤྱད་པ་སོགས།།
ཤེས་མེད་བླུན་པོའི་ཚོགས་རྣམས་འདི་ག་ནས།།
ང་ཉིད་སྨྱོན་པའི་གྲལ་གྱི་མགོ་མ་ཡིན།།

བདག་གི་ཡབ་ཆེན་གཙོས་པའི་ནུ་བོ་དང་། ཨ་ཁུ་སོགས་ཀྱིས་མདོ་སྨད་སྣང་ཞིག་དགོན་ཆེན་དུ་ཆོ་འཕྲུལ་སྨོན་ལམ་ཆེན་མོའི་དུས་བཟང་དང་འབྲེལ་ཏེ། ཆོལ་གསུམ་བོའུ་རྟའི་རྒྱལ་པོ་ཁྲིད་ནས། བོའུ་པ་ཞིག་གི་ཚུལ་བཟུང་བའི་རྣམ་པ་དེས།

མྱི་རྟ་གཉིས་ཀྱི་རླུང་རྟ་སྔར་ལས་དར་ཞིང་རྒྱས་པའི་སྨོན་འདུན་དང་། ཁྱིམ་གྱི་དཔག་བསམ་ནོར་བུ་ལ།། གང་བཏབ་སྨོན་འབྲས་རབ་སྨིན་ཞིང་།། བདེ་ཞིང་སྐྱིད་པའི་འཚོ་བ་འདི།། ནམ་ཡང་རྟག་ཅིང་བརྟན་པར་སྨོན།།