ཕོ་མོ་འདྲ་མཉམ་མ་རེད།

 རྩོམ་པ་པོ། འཇུ་སྐལ་བཟང་།
ཕར་ལ་མ་བརྟག་མིག་མདའ་ལན་གཅིག་ཤོར་བས།།
ཚུར་ལ་མཛེས་འཛུམ་ལྕགས་ཀྱུས་སྙིང་ཤ་འབིགས་བྱེད།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་ཆོ་འཕྲུལ་ཁྱོད་ཚོ་ལྷག་རེད།།

ཕར་ལ་གླེན་གཏམ་བདེན་པ་ཚིག་གཅིག་བཤད་པས།།
ཚུར་ལ་ཚེ་གཅིག་ལག་མགོ་གཏོང་བ་མི་གནངས།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་ཕྱི་ཐག་ཁྱོད་ཚོ་རིང་རེད།།

ཕར་ལ་ཁང་མིག་གྲུ་བཞི་ཙམ་ཞིག་སྤྲད་པས།།
ཚུར་ལ་གཞིས་ཁྱིམ་དྲོན་མོ་དངོས་ཤིག་བྱིན་འོང་།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་སྒྱུ་འཕྲུལ་ཁྱོད་ཚོར་མངའ་རེད།།

ཕར་ལ་ལྡམ་ལྡུམ་ཤ་རུག་ཤས་ཙམ་སྤྲད་པས།།
ཚུར་ལ་རོ་བཅུད་ཟས་སྣ་ཐང་མར་བརྡལ་བྱུང་།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་མིག་འཕྲུལ་ཁྱོད་ཚོ་མཁས་རེད།།

ཕར་ལ་ཉག་ཉོག་ལད་ལུད་ཐང་གང་བྱོས་པས།།
ཚུར་ལ་གཙང་མཛེས་གྲ་དག་ཁྱིམ་གང་བསྒྲིགས་འདུག།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་དགའ་ཚལ་ཁྱོད་ཚོས་བསྐྲུན་རེད།།

ཕར་ལ་ནག་ནོག་རྫབ་རྫོབ་རྒྱབ་གང་ཕུད་པས།།
ཚུར་ལ་གཙང་སྒྲོས་སྤུས་ལྡན་ལུས་གང་བསྐོན་བྱུང་།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་བཟའ་འདང་ཁྱོད་ཚོ་ཆེ་རེད།།

ཕར་ལ་རྒྱན་གོས་རང་ཉིད་འབྱོར་ཙམ་སྤྲས་པས།།
ཚུར་ལ་འཕྱོར་སྒེག་མིག་གིས་མི་བཟོད་སྟེར་མཁན།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་མཛེས་སྡུག་ཁྱོད་ཚོར་རྫོགས་རེད།།

ཕར་ལ་སྡུག་རབས་བསྔལ་རབས་རུམ་གང་བླུགས་ན།།
ཚུར་ལ་སེམས་གསོ་ལུས་མཉེད་མལ་གང་སྟེར་ནུས།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་དགའ་སྐྱིད་ཁྱོད་ཚོས་སྟེར་རེད།།

ཕར་ལ་དགའ་བའི་དྲོད་ཐིག་ཡུད་ཅིག་བྱིན་པས།།
ཚུར་ལ་བསམ་འགྲུབ་བུ་ཆུང་བུབས་གཅིག་སྤྲོད་ནུས།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་རྫུ་འཕྲུལ་ཁྱོད་ཚོར་ཡོད་རེད།།

ཕར་ལ་ཕྲུ་གུ་དམར་འབྱར་འབུ་ཙམ་སྤྲད་པས།།
ཚུར་ལ་སྨྲ་ཤེས་དོན་གོའི་མི་ཞིག་གསོས་འདུག།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་བུ་དུང་ཁྱོད་ཚོ་བཟང་རེད།།

ཕར་ལ་ཨ་མ་ཨ་ཡས་ལན་གསུམ་བོས་པས།།
ཚུར་ལ་བུ་ཚའི་ཕྱིར་དུ་མི་ཚེ་འབུལ་ནུས།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་སེམས་བསྐྱེད་ཁྱོད་ཚོ་འཕགས་རེད།།

ཕར་ལ་གྱོས་པོ་སྒྱུག་མོ་ཁྱིམ་གང་བསྟར་བས།།
ཚུར་ལ་ཁ་འཇམ་ཚིག་དྲོའི་ཕོར་བ་འདེགས་མཁས།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་མ་དུང་ཁྱོད་ཚོ་ཟབ་རེད།།

ཕར་ལ་རི་དྭགས་རི་ཤོར་ལྷས་གང་བསྐོར་བས།།
ཚུར་ལ་མར་དང་འོ་མའི་རྒྱ་མཚོ་བསྐྱིལ་བྱུང་།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་གཞིས་འཛིན་ཁྱོད་ཚོ་འཇོན་རེད།།

ཕར་ལ་ཞིང་གོག་སྐམ་པོ་རྣང་གཅིག་སྤྲད་པས།།
ཚུར་ལ་ལྗང་མྱུག་སྔོན་མོ་མུ་གང་བསྙོར་འདུག།།
བསམ་གྱིས་མི་ཁྱབ་བུད་མེད་སྒྱུ་མ་འདི་རེད།།
འདྲ་མཉམ་མ་རེད་ཚེགས་ཡུན་ཁྱོད་ཚོས་ཐེག་རེད།།

བུད་མེད་གནམ་གྱི་ཕྱེད་ཀར་བསྔགས་པ་ཡོད་ཀྱང་།།
རྒན་བྱིས་ཕལ་བའི་ཁྱིམ་ན་བུད་མེད་མེད་ན།།
སུམ་ཆའི་གཉིས་ཀྱི་གནམ་དེ་རྡིབས་པར་འདུག་པས།།
ཨ་མ་ཆུང་མ་བུད་མེད་ཀུན་ཀྱང་རླབས་ཆེ།།

ང་དང་ང་འདྲ་འདུལ་ཁྲིམས་རྒྱང་ཐག་རིང་ཞིང་།།
ཐོབ་དང་འབྱོར་སོགས་ངོ་སོ་མཐུན་རྐྱེན་ཕྲ་བས།།
འཁོར་ངན་ཁྲོད་ན་ཚེ་འདིར་བུད་མེད་ཚོ་དང་།།
ནང་རྒྱུས་ཆེ་ཕྱིར་གསུམ་བརྒྱད་ལེགས་སྐྱེས་འདི་བྲིས།།

མི་ཚེ་ནི་འཚོ་བའི་བསྡུས་གཟུགས་ཀྱིས་གྲུབ་པའི་
སྣང་བརྙན་གྱི་མེ་ལོང་ཞིག་ཡིན་ཙང་།
ང་ཚོས་རང་ཉིད་ཀྱི་རྫོགས་མཐའ་བྲལ་བའི་འགྲུལ་བཞུད་
ལམ་ཁར་དེད་ནས་མདུན་དུ་བསྐྱོད་དགོས།[太阳][鲜花]

#. སྤྲོ་སྣང་ཞིག

ལང་ཚད་ལངས་།
ཟ་ཚད་ཟོས།
རྒྱུག་ཚད་བརྒྱུགས།
འདོན་ཚད་བཏོན།
ལྟ་ཚད་བལྟས།
འགྲོ་ཚད་སོང་།
སྡོད་ཚད་བསྡད།
ཉན་ཚད་མཉན།
འཆད་ཚད་བཤད།
གང་དྲན་སྤྱད།
ཉུལ་ཚད་ཉུལ།
རྨོངས་ཚད་རྨོངས།
སེལ་ཚད་བསལ།
ཀླད་མགོ་དྭངས།
ལས་དོན་བསྒྲུབས།
ཕུགས་བསམ་མཆོངས།
རི་ཆུ་བསྐྱོད།
ཉི་ཟླ་རོལ།
ཉལ་ཚད་ཉལ།
སྔར་ཉིན་ལྷག།
དེ་བཞིན་རྒྱུ།
/………………….
ཚད་དེ་རང་གི་མ་ཤེས་ན།།
ལེགས་ཉེ་འབྱེད་པའི་བློ་རང་མེད།།
——————————-
དཔྱོད་ལྡན་རིག་མྱུར་ཅིག་ཡིན་ན།།
སྔ་ཕྱི་འགལ་མེད་རང་སྤྱོད་ཅིག།