ཆོས་མང་གསན་ཀྱང་ཆོས་གཅིག་ཉམས་སུ་མ་བླངས།།
ཡེ་ཤེས་ལྷ་ཚོགས་སྒོམ་ཡང་ལྷ་གཅིག་མ་འགྲུབ།།
རྟེན་འདིའི་ཡིད་ལུས་ཕྱི་མའི་རྐྱེན་དངོས་སོང་ན།།
བར་དོའི་གནས་སུ་འཁྲུལ་ནས་འཁྱམ་ཉན་འདུག་གོ།

གནའ་བོའི་ཡ་རབས་ཀྱི་ལུགས་སྲོལ་རྣམས་ཉམས་ཤིང་དེང་དུས་ཀྱི་སྤྱོད་ཚུལ་ངན་པ་དག་སྤང་ལ་ཤྭ་མོ་རྡོར་བ་བཞིན་རང་རེའི་ཡུལ་གྲུ་རྣམས་སུ་མཆེད་ཅིང་འཕེལ་བཞིན་ཡོད་པའི་དུས་འདིར་སྐྱེས་ཆེན་ཚོས་མཛད་པའི་ལུགས་ཀྱི་བསྟན་བཅོས་དག་འཆད་སྤེལ་སོགས་བྱེད་ཐུབ་ཚེ་ཡ་རབས་ཀྱི་སྤྱོད་བཟང་རྣམས་ངམ་ངམ་ཤུགས་ཀྱིས་རྒྱུད་ལ་སྐྱེ་ཞིང་མ་རབས་ཀྱི་སྤྱོན་ངན་སྣ་ཚོགས་པ་ཞིག་གི་སྒོ་ཤུགས་ཀྱིས་བཀག་ཐུབ་པས་ད་ལྟ་ཉིད་ནས་བྱིས་པ་ཚོར་དེ་འདྲའི་བསླབ་བྱ་དག་བསླབ་ཏུ་འཇུག་རྒྱུ་ཤིན་ཏུ་གལ་ཆེ་བར་སྙམ་མོ།།[鲜花][鲜花][鲜花][鲜花]

རིག་པའི་རང་ཚུགས།

ཆོས་ཀྱི་མཁས་མིང་འཛིན་པ་ལ་ལས། ཆོས་པ་ཞིག་ལ་མཚོན་ན། བླ་མའི་གསུང་ལ་དོགས་སློང་བྱེད་མི་རིགས་ཟེར། འོ་ན། སློབ་དཔོན་ཆོས་གྲགས་ཀྱིས་ཁོའི་བླ་མ་དབང་ཕྱུག་སྡེའི་ལྟ་ཚུལ་དགག་བྱའི་གཙོ་བོར་བཟུང་བ་ལས། མིང་དུ་གྲགས་པའི་བསྟན་བཅོས་༼ཚད་མ་རྣམ་འགྲེལ་༽རྩོམ་ཐུབ་སོང་བ་དེ་ཅི་ཞིག་རེད།

ཡང་ཆོས་ཀྱི་མཁས་མིང་འཛིན་པ་ལ་ལས་ནི། ཆོས་པ་ཞིག་ལ་མཚོན་ན། རིགས་པའི་རྒྱབ་རྟེན་ལུང་ལ་གཏུགས་དགོས་ཟེར། འོ་ན། རྗེ་བཙུན་ཙོང་ཁ་པ་ཆེན་པོས། ༼མཐར་གཏུགས་ན་དྲི་མ་མེད་པའི་རིགས་པ་ཉིད་ཀྱིས་དབྱེ་དགོས་ཏེ། རིགས་པ་དང་འགལ་བའི་གྲུབ་མཐའ་ཁས་བླངས་ན་ནི་སྨྲ་པ་པོ་ཚད་མའི་སྐྱེས་བུར་མི་རུང་བའི་ཕྱིར་དང་༽ཞེས་གསུངས་པ་དེ་ཆོས་པའི་རྩ་དོན་དང་འགལ་ལམ།

རྒྱབ་རྟེན་ཞིག་ལ་མ་ཁེན་པར་ཚུགས་མི་ཐུབ་པའི་རིགས་པ་ནི། མ་གཞི་ནས་དོན་དམ་པའི་རིགས་པ་ཞིག་ག་ལ་ཡིན། རྩ་བ་གཞན་ཞིག་ལ་བརྟེན་པའི་ཡལ་ག་ནི་ནམ་ཡང་ཡལ་ག་ཡིན་པས། དེ་ལ་ཚུགས་ཐུབ་ཀྱི་སྟོབས་ནུས་ཤིག་ཡོད་མི་སྲིད།

གཙུག་ལག་གཞུང་ལུགས་ལ་བལྟ་རྒྱ་བསགས་པ་ཙམ་ཡོན་ཏན་གྱི་མཆོག་ཏུ་རློམ་མཁན་དང་། ཤེས་བྱའི་གནས་ལ་རང་སྟོབས་ཀྱིས་བརྟག་ཅིང་དཔྱད་དེ་བདེན་དོན་གྱི་གཏིང་འཚོལ་མཁན་གཉིས་ལ་གནམ་སའི་བར་ཁྱད་ཅིག་འཆོར་ངེས་ཏེ། སྔ་མ་ནི་རྩོམ་སྒྲིག་པ་ཙམ་ཡིན་ལ། ཕྱི་མ་ཁོ་ན་གསར་རྩོམ་མཁན་ཡིན་པས་སོ། །

འཇར་མན་གྱི་མཚན་ཉིད་རིག་པ་མཁན་སུའུ་པུན་ཧེར་གྱིས་ཀྱང་། འདི་ནི་སྤྱིར་བཏང་གི་རིག་པ་སྨྲ་པ་དང་མཚན་ཉིད་རིག་པ་པ་གཉིས་ཀའི་ཆེས་མི་འདྲ་ས་ཡིན་པར་བཤད་ཡོད་དེ། ༼སློབ་སྦྱོང་ལ་བརྟེན་ནས་ཐོབ་པའི་བདེན་དོན་ནི་བཅོས་མའི་སོ་དང་རྐང་ལག་གམ་པྲ་ཚིལ་གྱིས་བཟོས་པའི་སྣ་དང་ཡང་ན་སྐྱི་པགས་བརྗེ་ལྷན་གྱི་ལག་རྩལ་སོགས་ཀྱིས་ལུས་ཀྱི་དབང་པོ་ཆ་འདྲ་བ་བཅོས་པ་དང་འདྲ་བའམ། ཐ་ན་དེ་ཙམ་གྱི་ཚད་དུའང་མི་ཐོན་པ་འདྲ། རང་ཉིད་ཀྱི་བསམ་བློ་བཏང་བ་ལས་རྙེད་པའི་བདེན་དོན་ནི་ལྷན་སྐྱེས་ཀྱི་ལུས་ཀྱི་ཡན་ལག་དང་འདྲ་བར། རང་ཉིད་ལ་གཏོགས་ཁོ་ཐག་ཏུ་སྣང་། མཚན་ཉིད་རིག་པ་བ་དང་རིག་པ་སྨྲ་བའི་ཁྱད་པར་ཆེ་ཤོས་ཀྱང་འདི་ཙམ་ཡིན། དེའི་རྐྱེན་གྱིས་ཁོང་ཚོའི་བསལ་བློའི་ཐོབ་འབྲས་ཀྱང་ཤིན་ཏུ་ཐ་དད་དེ་༽ཞེས་པའོ། །

ངའི་ཡིད་ངོར་དུས་རྟག་ཏུ། ལུང་དང་ཡིག་ཆ་ནི་རྨད་དུ་བྱུང་བའི་དཔྱད་གཞི་ཡིན་པ་ལས། བཟློག་ཏུ་མེད་པའི་བཀའ་ལུང་མ་ཡིན་ཏེ། ང་ནི་རིགས་ལམ་ནས་བྱོན་པའི་སྟོན་པ་ཤཱཀྱ་ཐུབ་པའི་ཉན་ཐོས་ཡིན་པས་སོ། །

2007.3.16