࿐ཚ་འུག་རི་ལ་འགྲིམ་པའི་ཀ་རྩོམ།

ཀ་ནས་དག་པའི་རང་སེམས་གཅེར་བུ་འདི།།
ཁ་ཞེ་མེད་པར་ཆོས་ལ་ཞུ་གཏུག་བྱ།།
ག་ནས་བསམ་ཡང་ཕ་མཆོག་འཇིག་རྟེན་མགོན།།
ང་ཡིས་དྲན་ནོ་བྱིན་རླབས་གྲུ་ཆར་ཕོབས།།

ཅ་ཅོ་འདུ་འཛིའི་གྲོང་ལ་ཐུགས་སུན་ཏེ།།
ཆ་མེད་དབེན་རི་འགྲིམ་པའི་རྣམ་འབྱོར་པ།།
ཇ་ཡུན་ཙམ་གྱི་མཇལ་འཕྲད་ཐུང་ན་ཡང་།།
ཉ་མོ་ཆུ་ལ་དུང་འདྲའི་དགའ་བ་འཕེལ།།

ཏ་ལའི་མདངས་ལ་འཁུ་བའི་ནགས་ཁྲོད་དུ།།
ཐ་དད་མེ་ཏོག་དཀར་དམར་ལང་ཚོ་ངོམ།།
ད་ལྟ་རྒྱུས་ཡོད་འདྲ་བའི་རི་དྭགས་ཚོགས།།
ན་རྒ་མེད་པར་བག་ཡངས་ངང་ལ་རྒྱུ།།

པ་ཏྲའི་རི་མོ་ལྟ་བུའི་བརྩེ་དུང་གིས།།
ཕ་རོལ་སེམས་ཀྱི་ལོངས་སྤྱོད་མི་འཕྲོག་པར།།
བ་བརྒྱའི་འོ་མ་ལྟར་དཀར་ལྷག་བསམ་འོག །
མ་བཅོས་སེམས་ཀྱི་སྤྲོ་སྣང་ཐེངས་གཅིག་མྱངས།།

ཙཱ་རི་ལ་སོགས་གནས་གསུམ་བདག་པོ་ཡི།།
ཚ་རླབས་བདེ་དྲོད་འབར་བའི་དབེན་ཕུག་ཏུ།།
ཛ་ཡས་མགུར་དུ་བཞེས་པའི་སྙིང་གི་གཏམ།།
ཝ་ལེར་གསོལ་འདེབས་ངང་ནས་ཐུན་གཅིག་གྲུབ།།

ཞྭ་ལྟར་གཙུག་ཏུ་བཀུར་བའི་ལྷ་སྐལ་གཅིག །
ཟ་འཐུང་འཚོ་བ་རྒྱས་པའི་འབྲོག་སྡེ་གཉིས།།
འ་ཅག་ཟ་སྐྱིད་ཆོས་རྣམས་འཛོམས་དང་གསུམ།།
ཡ་མཚན་ངོ་མཚར་ཆེ་ན་དེ་རང་ཆེ།།

ར་རིའི་ཕྱོགས་ལྷུང་དྲི་མས་མ་ཉོག་ཅིང་།།
ལ་ལུང་སྐྱིད་ཆུ་བཞིན་དུ་དྭངས་གཙང་གིས།།
ཤ་ཚ་མགོན་མེད་བུ་ལ་གནང་བའི་འབབ།།
ས་གཞི་གང་དུ་སོང་ཡང་མ་བརྗེད་ཨང་།།

ཧ་ཧ་དེ་རིང་མཛའ་མཐུན་མཆེད་དང་ལྷན།།
ཨ་ཇོ་སྒོམ་པར་མགུར་ཞིག་འཐེན་བཅུག་པས།།
ཧ་ཅང་དགའ་བཞིན་ཚ་འུག་རི་ཁྲོད་ནས།།
ཨ་བུ་འབྲི་གུང་པ་ཡི་རྟོགས་མགུར་བཞེས།།

ཨ་ལ་འབུམ་ཕྲག་ཚོགས་པའི་གདན་ས་ཆེ།།
ར་བ་སྐྱིད་ཆུ་སྔོན་མོའི་རླབས་རྒྱུན་ཁྲོད།།
ཞ་འབྲིང་བླ་མ་མཉེས་པར་མ་ནུས་ཀྱང་།།
རྩྭ་ཐང་མེ་ཏོག་འཐུ་ཞོར་རྟེན་འབྲེལ་དུ།།

པ་སངས་ལྟར་དཀར་ཕ་ཇོའི་སྨོན་ལམ་དེ།།
ཏ་ལའི་འདབ་ལྟར་ཡངས་ཤིང་རྒྱ་ཆེ་རུང་།།
ཅ་རེ་ཙམ་ཞིག་དད་པའི་དབྱིིངས་ལ་འཁོར།།
ཀ་ཡེ་ཚུར་གཅིག་གསོན་དང་དོན་བསྡུས་ན།།

ཧ་ལམ་ཕྱི་དྲོའི་དུས་ཚོད་གཅིག་ཡུན་དུ།།
ཨ་ཐང་གསོ་ཕྱིར་བདུད་རྩི་སྨན་ཆུ་ནམ།།
ཨ་ནེ་དགོན་པའི་གཏེར་སྒྲོམ་ཆུ་ཉལ་བྱས།།
ཧ་ཅང་རན་པས་ལུས་ཁམས་བདེ་ལ་འཁོད།།

ཀ་ཡེ་འདྲིས་བདེའི་གྲོགས་ཁྱོད་ལྷན་ཅིག་ཏུ།།
ཁ་ཟིན་གནས་མཇལ་གང་དག་དགེ་ཡང་སྲིད།།
ག་ན་ལྗོངས་ཉུལ་དེ་ཚོ་སྤྲོ་སྣང་ཡིན།།
ང་ཡི་ཀ་རྩོམ་ལེ་འུ་གཅིག་གིས་རྫོགས།།

2023/6/22

སྒྲ་དབྱངས་འཕྲུལ་སྲས།

࿐མཁན་ཆེན་༧བསོད་དར་རྒྱས་ཀྱི་ཞབས་བརྟན།

སྟོན་མཆོག་མཉམ་མེད་ཐུབ་དབང་སྲས་དང་བཅས། །
འཕགས་བོད་པཎ་གྲུབ་བདེན་ཚིག་གྲུབ་པའི་ཚོགས། །
ཁྱད་པར་ཚེ་ལ་དབང་བའི་རིག་འཛིན་བཅས། །
དེང་འདིར་དགེ་ལེགས་སྣང་བའི་ཤིས་པ་སྩོལ། །

མཁྱེན་པའི་ཤེས་རབ་མཁའ་ཡི་འོད་སྣང་གསལ། །
བྱམས་བརྩེ་ལྷག་བསམ་དུང་གི་ཟླ་བ་མཛེས། །
མཁྱེན་གཉིས་ཉི་ཟླ་ཟུང་གི་རྣ་ཆ་ཅན། །
བསྟན་འགྲོའི་གཉེན་གཅིག་སྐུ་ཚེ་བརྟན་པར་ཤོག །

ཤེས་རིག་རིན་ཆེན་ནོར་གྱི་བང་མཛོད་ཆེས། །
ས་ཆེན་གོ་ལའི་ཁྱོན་འདི་ཡོངས་བཀང་སྟེ། །
བརྒྱུད་འཛིན་བུ་སློབ་རྒྱུ་སྐར་བྱེ་བའི་གྲངས།།
སྐྱོང་མཛད་སྐྱེས་ཆེན་དམ་པའི་ཞབས་བརྟན་གསོལ།།

མཆོག་གསུམ་རྩ་གསུམ་སྲུང་མའི་བྱིན་རླབས་དང་།།
ཚེ་འཛིན་གྲུབ་པའི་ཚོགས་ཀྱི་བདེན་སྟོབས་ཀྱིས།།
ཚེ་ཡི་མི་མཐུན་བར་ཆད་ཀུན་ཞི་ནས།།
སྨྲ་བའི་ཁྱུ་མཆོག་ཞབས་པད་བརྟན་གྱུར་ཅིག།

མི་ཤིགས་མི་འགྱུར་གསང་བ་སྐུ་ཡི་ཁམས།།
མི་འགག་མི་འགྱུར་གསང་བ་གསུང་གི་ཁམས།།
མི་གཡོ་མི་འཕོ་གསང་བ་ཐུགས་ཀྱི་ཁམས།།
གསང་གསུམ་རྡོ་རྗེའི་ཁམས་སུ་བརྟན་གྱུར་ཅིག།

ཅེས་པ་འདི་སྙིགས་དུས་ཀྱི་སྐྱེ་འགྲོའི་མགོན་དང་དཔུང་གཉེན་དམ་པར་གྱུར་པ་མཁན་རིན་པོ་ཆེ་༧བསོད་ནམས་དར་རྒྱས་ལགས་སྙུན་གཞི་ལས་གྲོལ་བའི་མཐུན་རྐྱེན་དུ་ཤར་མི་ཉག་འཁྱམ་པོ་པ་༧ཐུབ་བསྟན་ཉི་མར་འབོད་པ་དེས་རྩེ་གཅིག་ཏུ་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག །

࿐དྲིན་གྱི་སྐྱོང་མཁན་གྱི་མ་ལོ་ལགས་དང་ཚེ་གཅིག་ལས་ལ་བཀོད་པའི་གཅེས་པའི་ལྕམ། དེ་མིན་ལམ་གྱི་ཉག་ཕྲན་སོ་སོ་ནས་འཕྲད་པའི་གྲོགས་དང་ནམ་ཞར་སེམས་ཁྲལ་དང་ཐུགས་ཁུར་གནང་མཁན་གྱི་གཉེན། ལམ་སྣ་རེ་ལས་འཇལ་བའི་བརྩེ་བའི་དགེན་དག ལས་ལ་བཀོད་པའི་འཇལ་འཛོམས་ཀྱི་ལོ་ཟླ་དག་སྙེམས་པའི་རི་མོ་ལྟར་གསལ་ལ་སེམས་ཀྱི་སྤང་ས་དེ་ནས་ངང་གིས་བཞད། ནམ་རྒྱུན་དྲན་པ་མནོག་མོ་དེ་ཁྱེད་ཅག་གི་ཕྱོགས་སུ་ངང་གིས་ཕྱིན་ལ་ཕྱིར་དྲན་རེ་ཞིག་དྲན་པའི་སྒོ་ངོས་སུ་ལྷང་ངེར་འཆར། དུས་དང་ལས་ལ་སྐལ་རེ་ཡོད་ཚེ་ངའི་ཁྱེད་ཅག་གི་བདེ་བར་སྨོན་ལམ་དང་སྔ་ནས་མཉམ་འཛོམས་བྱུང་བར་གསོལ་འདེབས་བྱེད། ཚེ་གཅིག་ལས་ཀྱི་འཕྲད་པ་འདི་ལ་དགའ་བ་དང་སྐྱིད་པའི་ཁེངས་ལ། ལྗན་ལྗིན་མ་འགོས་བར་བརྩེ་བ་བསྩོལ་རོགས།