དུས་ཚོད་ཉེར་བཞིས་འཁོར་བསྐྱོད་ཀྱིས་ང་ཕམ་མ་མྱོང་མོད།

ཤ་སང་རུས་སང་ལ་ཐིམ་པའི་ཤ་ཚས་གཏམ་ཉག་ཅིག་གིས་་་ཟླ་ངོ་འགའ་ཚོར་མེད་བཏང་སོང་།

སེམས་པའི་འཇིགས་རྟེན་་་་་ https://t.cn/A6M7hDoa

གལ་ཏེ ། ངས་ཉི་མ་ལ་བལྟ་ནས་སྐྱིད་སྡུག་གླེང་ཆོག་ན།

འདི་ལྟར། གནས་འདིེའི་ས་གཞི་ཡོད་ཚད་གྲང་ངར་གྱིས་ཟིན་ནས་རི་ལུང་ཕལ་ཆེར་སྐྱོ་ཉམས་ཀྱིས་ཁེངས་འདུག་པ་མ་རིག་གམ། ལྷག་རླུང་གྲང་ངར་གྱི་ཁྲོད་ནས་མི་བཟོད་པའི་ངུ་ངག་དག་མ་ཐོས་སམ། དྲོད་འཇམ་གྱི་ཉི་མ་ལགས། བྱམས་བརྩེ་ཡི་འོད་ཟེར་མི་འཕྲོ་དོན་ཅི་ཡིན། ལྡུམ་རའི་ནང་གི་མེ་ཏོག་དག་ཁ་དོགས་གཞན་དུ་བསྒྱུར་ཏེ་འདབ་མ་བཙན་གྱིས་གཏོར་ཀྱང་གདུང་བ་ཕྱི་རུ་མངོན་མི་ཆོག་པར་གནས་ཡོད་པ་མ་ཤེས་སམ།

གལ་སྲིད་རྩུབ་པའི་གྲང་ངར་འདི་མ་འཇགས་ན། སྐྱིད་སྣང་གི་འཛུམ་མདངས་མངོན་མི་སྲིད་པར་མནར་སྤྱོད་ཀྱིས་མྱོང་བའི་འཇིག་རྟེན་ཞིག་ལས་ཡོད་མི་སྲིད་པས། ཅེས་ཀྱང་ཁྱེད་མཁོ། ངེས་པར་གཟིགས་དགོས།

འདི་ནས་དཔག་ཚད་དུ་མའི་ཕར་སྒང་ཞིག་ན།།
ཁོ་བོའི་ཡབ་མེས་རིགས་རྒྱུད་འཚོ་བའི་ཡུལ་གྲུ།།
མི་ཉག་གཡང་སྡེ་ཕྱུག་མོ་ཞེས་བྱའི་སྨན་ལྗོངས།།
གངས་ལྡན་མཛེས་སྡུག་ས་ཡི་དང་རྩེར་བལྟམས་པ།།

གང་གི་ལྷོ་རྒྱུད་དལ་འབབ་ཉག་ཆུའི་འགྲམ་དུ།།
རང་འཁྲུང་ལྷ་ཤིང་སྨན་སྣའི་སྐྱེད་ཚལ་སྟུག་ཅིང་།།
རི་སྐྱེས་རི་དྭགས་གཅན་ཟན་ནགས་ལ་རྒྱུ་བའི།།
རང་བྱུང་ཁོར་ཡུག་མཛེས་པ་ལྷ་ལ་འགྲན་ལེ།།

དེ་ཡི་གཤོང་ན་རོང་སྡེའི་ཁང་ཁྱིམ་གྲུ་བཞི།།
གནའ་སྲོལ་ལག་རྩལ་རྡོ་དང་ཤིང་བཟོའི་མཛེས་སྐྲུན།།
བརྒྱ་ཕྲག་དུ་མའི་ཕྲེང་ཚར་གཅལ་དུ་བཀྲམ་པ།།
སྔོན་རབས་རིགས་ཀྱི་འཚོ་བའི་ལྟད་མོ་ཡོད་སྐད།།

གང་གི་སྒང་རྒྱུད་སྦྲ་ནག་འབྲོག་པའི་འཚོ་བ།།
སྒོ་སྐྱེས་གཡང་གི་རྟ་ནོར་ཕྱུག་རིགས་སྣ་ཚོགས།།
རི་ལུང་རྩི་ཏོག་བཅུད་ལ་རང་དགར་ཡན་པ།།
འབུམ་ཕྲག་སྒྱུ་སྐར་ཁྲ་མོ་ས་ལ་འཕོས་འདྲ།།

འོན་ཏེ་ཉེར་བཞིའི་ལྷག་པའི་ཉིས་སྟོང་ལོ་མགོར།།
མེ་དཔུང་བསྲེགས་ཟ་འབར་བ་ཤེད་ཀྱིས་མཆེད་དེ།།
སྒང་གཤོང་ཁོར་ཡུག་མཛེས་སྡུག་དུས་གཅིག་ཉམས་པའི།།
སྣོད་བཅུད་དགེ་མཚན་ཆོམ་པོ་གློ་བུར་བྱུང་སོང་།།

ཡ་མཚན་རི་ལུང་ཁོར་ཡུག་མྱ་ངམ་ཡུལ་གྲུ།།
རང་བྱུང་ནགས་མའི་སྐྱེད་ཚལ་སོལ་ནག་འབའ་ཞིག།
མཛེས་སྤྲས་གཞིས་ཁྱིམ་དྲོན་མོ་ཁང་གོག་ཧ་རེ།།
ཐམས་ཅད་མེ་དུད་འཁྲིགས་པས་མདོག་དབྱིབས་བསྒྱུར་འདུག།

མཐོ་སྒང་རང་བྱུང་མཛེས་པའི་ཁོར་ཡུག་ཡིན་ཞེས།།
གཅིག་བས་གཉིས་ལྷག་ཁ་བའི་རི་ན་མཆིས་སྐད།།
འདི་ལ་འགྲན་དུ་བདོ་བའི་སྨན་ལྗོངས་དཀོན་ན།།
རིགས་ལ་བཅངས་པའི་ཕངས་སེམས་ཅིའི་ཕྱིར་མི་སྐྱེ།།

རང་ཡུལ་རང་གིར་ལོངས་སྤྱོད་ཡིད་ལ་བྲིས་པ།།
རྨི་ལམ་སྒྱུ་མའི་དཔེ་ཟླར་དེ་རིང་ཆས་སོང་།།
མི་རྟག་རྟག་པར་འཛིན་པའི་ཞེན་སྣང་འདི་ལ།།
མི་འདོད་འཁོར་བའི་རང་མཚང་ཡང་གཅིག་བསྟན་བྱུང་།།

སྔོན་བསགས་ལས་དབང་བསྐོས་ཐང་དེ་འདྲ་མེད་ན།།
འཕྲལ་རྐྱེན་འབྱུང་བཞིའི་གནོད་འཚེ་དེ་འདྲ་མེད་ན།།
ཤེས་ལྡན་སུས་ཀྱང་གཏོར་བརླག་དེ་འདྲ་མེད་ན།།
སྣོད་བཅུད་ཕུན་སུམ་ཚོགས་པའི་དཔལ་ཡོན་རོལ་ཆོག།

རྒྱ་ཆེན་ཁོར་ཡུག་འདི་ལ་ཕངས་སེམས་ཞིག་གིས།།

ནགས་ཀློང་ཕྱུག་མོ་འདི་ལ་འཁྲེང་སེམས་ཞིག་གིས།།

ཁོར་ཡུག་ཡུལ་སྡེ་འདི་ལ་བརྩེ་སེམས་ཞིག་གིས།།
ཀུན་གྱིས་རོགས་འདེགས་དྲིན་ལ་ཡི་རངས་ཞུ་འོས།།

བྲེལ་ཆེ་བའི་བར་གསེང་ཞིག་ལ་རང་ཡུལ་ཕྱོགས་ལ་འཁྲེང་བའི་གཏམ་ཐུང་ཙམ་ཤར་སྒྲོན་མེ་ནས་འཕྲལ་བྲིས། https://t.cn/R2Wx1Uq