མི་ཡུལ་འདིར།
ཇིའདྲའི་མཚར་པོ་འདུག
ལན་རེར་དྲོ་ཆེ་ལ།
ལན་རེར་འཁྱག་ཆེ་བར་འདུག

མི་སེམས་འདི།
ཇི་འདྲའི་སྙིང་རྗེ་བ་ལ།
བར་རེ་སྐྱིད་ཀྱིས་ཁེངས་ལ།
བར་རེ་སྡུག་གིས་ཁེངས།

དུས་ཚོད་འདི།
ཇི་འདྲའི་མགྱོགས་པ་ལའང་།
ངུ་འབོད་དང་དགོད་སྒྲའི་བར་ནས་འདས་ལ།
ཁེར་ཧྲེང་དང་མཉམ་འཛོམས་བར་ནས་ཀྱང་འདས།

༄། ། ལོ་རྒྱུས་ཁྲོད་ཀྱི་ཁྲག་ཐིགས།
ཁྱིམ་མཚེས་རྒྱལ་ཁབ་རྣམས་ལ་འབྲེལ་ཟམ་བཙུགས།།
ཕྱི་དགྲ་ནང་འགལ་དཔའ་མཛངས་ཐབས་ཀྱིས་བཏུལ།།
རྒྱལ་པོའི་སྲོག་ཉེན་རྒྱ་ལས་ཐར་བར་མཛད།།
མགར་བློན་མཛད་རྗེས་དྲན་དུས་སེམས་རྩ་དྲོ།།

ཆབ་སྲིད་གྲོས་ཀྱི་འདུན་མ་འཐུས་ཚང་བཏང་།།
རྒྱལ་ཁྲིམས་གསེར་གྱི་གཉའ་ཤིང་སྲ་བརྟན་བཟོས།།
དཔལ་འབྱོར་རྒྱས་ཕྱིར་ཚོང་རའི་སྒོ་མོ་ཕྱེས
མགར་བུ་བཙན་སྙའི་སྙན་གྲགས་རྒྱ་བོད་ཁྱབ།།

དྲག་པོའི་རྩལ་དང་དམག་གི་འཐབ་ཇུས་ཀྱིས།།
མཚན་སྙན་བླ་ན་འབར་བའི་དམག་དཔོན་འགའ།།
ཕམ་པ་བརྒྱབ་ལ་གྲངས་ཀ་འདྲེན་ཚོད་བྲལ།།
གཡུལ་ལས་ཕམ་མྱོང་མེད་པའི་ཁྲི་འབྲིང་གྲགས།།

རང་སྲོག་མཚོན་ཁར་བཞག་ནས་རྒྱལ་དོན་བསྒྲུབས།།
དྲུ་གུ་འ་ཞ་དཔའ་དང་ཐབས་ཀྱིས་བླངས།།
འགྲན་མེད་མཛད་བཟང་དཔའ་བོའི་ལག་རྗེས་དེས།།
རང་སྲོག་གཤེད་མར་འགྱུར་ཡོང་སུ་ཡིས་བསམ།།

རྒྱལ་མོ་ཝུའུ་ཐེན་ཐབས་དང་ཕྲ་མ་མཁས།།
འབྲོ་བཟའ་ཁྲི་ལོད་བསམ་ཤེས་མེད་ལེ་དང་།།
གསར་བུས་དབང་ཆ་མྱུར་དུ་བསྙེག་འདོད་ཀྱིས།།
མགར་ཚང་སྐྱོ་གར་ཁྲོད་ནས་རྫོགས་ཆིག་བཀོད།།
རིག་པའི་མྱུ་གུས།

བུ་ན་གཞོན་དབྱངས་གསའི་མགུལ་རྒྱན་ཅན། །
གོང་མེས་པོ་སོང་འགྲོ་གནང་འགྲོ་རེད། །
དེའི་རེ་བ་ཡིད་ལ་འཁོར་བཞིན་དུ། །
རྗེས་མི་རབས་ཀུན་ལ་ཕན་ཕྱིར་དུ། །
ལས་བཟང་པོའི་བྱ་བ་མི་སྒྲུབ་བམ། །

_____༢༠༢༤_༤_༡ངལ་གསོ་བས།