གཞུང་ལུགས་ཀུན་པོ་ཐབས་ཆག་ཅིག་བམ་རྫོགས་བྱས་ཏ

首页发布

གཞུང་ལུགས་ཀུན་པོ་ཐབས་ཆག་ཅིག་བམ་རྫོགས་བྱས་ཏེ་ལག་ཁྱེར་རྫབ་རྫོབ་རེ་དང་ཐོབ་ཐང་ཙམ་པོ་རེའི་བྲན་དུ་སོང་བའི་མི་བུ་ཆོ་ལོ་ཅན་ཡུལ་གང་དུ་མོད་ཀྱང་། ནང་ཚན་བྱེ་བྲག་དམིགས་སུ་བཀར་ནས་རིགས་གཅིག་རྐང་འཛིན་དང་ཆེད་སྦྱོང་ཞིབ་འཇུག་པའི་གདན་ཐོབ་དམིགས་བསལ་བ་རེ་རག་མེད་ཚེ་དེ་ནི་ཤེས་རློམ་པའི་རྐུབ་སྟེགས་ཙམ་དུ་ཟད་དོ།། ཡར་འཕེལ། ☕️

རང་བཞིན།

ཡོན་བཟང་།

དད་སོགས་དཀོར་ཟས་རྣམས་ལ་བག་མེད་དུ་སྤྱོད་ཀྱིན།།
  ཅི་ཡང་མི་ཤེས་གང་ཡང་མི་ནུས་པའི་རང་ཉིད།།
  ལས་འབྲས་བསླུ་མེད་ཡིན་པ་ཡིད་རྟོན་ཞིག་མེད་ལ།།
  ཕྱི་མར་མཁོ་བའི་ཆོས་ཤིག་དེ་ལས་ཀྱང་མི་འདུག།

  རྟག་འཛིན་རྨོངས་བློ་སྟུག་པོའི་ཟོལ་བཅོས་ཀྱིས་བསླུས་ཤིང་།།u
  དམན་པ་ཉམ་ཐག་མཐོང་ན་སྙིང་རྗེ་ནི་མི་འདུག།
  བ་གླང་རྒན་པོ་ཞིག་གི་ངང་ཚུལ་དང་ཟླ་བཞིན།།
  སྐྱོ་སྡུག་རུམ་དུ་བཅུག་ནས་ཆཊ་སྲེད་ཀྱིས་མྱོས་སོང་།།

  མཐུན་ཕྱོགས་གཉེན་དང་གཞན་ཕྱོགས་དགྲ་ལྟར་བརྩིས་ནས།།
  དོན་མེད་བྱ་སྤྱོད་མཐའ་དག་དང་དུ་རང་བླངས་ཤིང་།།
  དོན་ལྡན་མི་ཚེའི་ལམ་བུ་རྣམ་གཡེང་གིས་བསྐྱལ་ནས།།
  བགྲེས་རྒན་བདག་གི་ཚེ་སྟོད་རྨི་ལམ་བཞིན་ཡལ་སོང་།།

  ཕ་ལོའི་རེ་འདུན་དྭངས་གཙང་དྲག་རླུང་ལ་བསྐུར་ནས།།
  མ་ལོའི་བརྩེ་སེམས་དཀར་པོ་རྒྱང་རིང་དུ་བོར་ཞིང་།།
  ཐམས་ཅད་རྒྱབ་ཏུ་ཕྱོཊ་པའི་ཐོས་མེད་ཀྱི་སྨྱོན་པ།།
  མ་ངེས་རི་ལུང་ཉུལ་བའི་ཕུགས་མེད་ཀྱི་རི་དྭགས།།

  བསམ་ན་ཆོས་ཀྱི་དྲེད་པོ་རང་འདྲ་ལས་གཞན་མེད།།
  གཞལ་ན་ཡོན་ཏན་གྱི་ལྕི་ཚད་སྲང་གང་མེད་ལ།།
  བལྟས་ན་ཡིན་མདོག་ཉམས་ཀྱིས་ཕྱི་སོར་མཛེས་པ།།
  མྱོང་ན་ཡང་སྙིང་མེད་པའི་སྒྲོ་སྟོང་གི་དཔེ་རེད།།

  ཉེས་ཅན་ཁེར་རྐྱང་གི་སེམས་པ་དགུན་ཁའི་འཇག་སྐྱ།།
  དགྲ་གཉེན་མ་ངེས་ལས་རླུང་གིས་མགྲོན་ལ་བོས་ཚེ།།
  སྒེག་ལྡན་དུས་ཀྱི་རོལ་དབྱངས་ལ་ཆག་སྐྱོན་ཤོར་ནས།།
  སྐྱོ་བ་ཞེ་ལ་འདྲེས་པའི་མཚན་གཞུང་ཞིག་འཆར་ཡོང་།།


  མི་རྟག་དཔྱིད་དཔལ་རྒྱལ་མོའི་རང་མདངས་ཤིག་མངོན་ཏེ།།
  དབང་མེད་ལུས་ཀྱི་སྡོང་ལོ་གཡང་ས་རུ་བསྙིལ་ཞིང་།།
  ཆ་མེད་ཡུལ་གཞན་འགྲིམས་པའི་སྐྱོ་ཉམས་ལ་བསམ་ན།།
  རེ་བཅོལ་སེམས་ཀྱི་ཁེན་ས་གང་ཡོད་ཅིག་མི་ཤེས།།


  གཡོ་འཕྲུལ་སྣང་བ་ཁྲ་མོ་རི་མགུལ་དུ་ཡན་དུས།།
  ཟོལ་བཅོས་སྨུག་པ་རྫོབ་པོ་ཕྱོཊ་མེད་དུ་འཕྱུར་འདུག།
  ཞེ་སེམས་གང་ལ་འཁྲེང་ཡང་སྡུག་བསྔལ་རང་མོད་ན།།
  བཤེས་བྲལ་གཞོན་ནུའི་ལུས་ཀྱི་དུར་ས་དེ་བདེ་འམ།།

  ཞེན་ཆཊ་སྲིད་པ་རྒན་པོས་འཇབ་རྒོལ་ཞིག་བྱས་རྗེས།།
  དུག་ལྔའི་མེ་ལྕེ་མཆེད་ས་འཇིགས་རུང་གི་ལུང་མདོར།།
  བན་ལོག་གཡུལ་ལ་ཆས་པ་བདེན་གཏམ་ཞིག་ཡིན་ན།།
  དགྲ་ལན་མ་ཐུབ་རང་ཉིད་དུག་ཆུ་ཡིས་མྱོས་ཟེར།།

2020ལོར།

རང་ཤག་གི་དབྱངས་ཟ་ཟི།

(བནྡེ་དཔལ)

ལྷོད་ཀྱིས་བཏང་བའི་དབྱངས་ཀྱི་སྒྱུ་འཕྲུལ་གྱིས། །
རྣ་བའི་དབང་པོ་དལ་གྱིས་བསླུས་པའི་ཚུལ། །
ངོམས་མེད་སྒྱུ་མའི་གྲོང་གི་ཕུན་ཚོགས་ཏེ། །
བསམ་ཞིང་བསམ་ན་བདེ་བ་ནང་ནས་འབར། །

གཡུ་འབྲུག་འཕྲེད་དུ་འཁྱུག་པའི་ངང་ཚུལ་གྱིས། །
ངད་པ་སྣ་ལ་འཁྱིལ་བ་འདི་ཀ་ནི། །
ཚིམས་མེད་དགའ་བ་འཕེལ་བའི་ལྟད་མོ་སྟེ། །
སྤོས་ཐུར་གཅིག་གིས་དྲངས་བའི་འཇིག་རྟེན་ལགས། །

སྐྱེ་དགུ་འཁོར་བའི་ཐང་དུ་ལས་མང་གིས། །
ཤིན་ཏུ་བྲེལ་ཞིང་ངལ་དུབ་མོད་པའི་དུས། །
ཧ་ཅང་དལ་བུར་གནས་པའི་ཚུགས་ཀ་འདི། །
གུ་ཡངས་བློ་བདེའི་མཚན་གཞིར་ཅིས་མི་ཆོག །

དཔེ་མང་རྔམ་གྱིས་འགྱིང་བའི་ཐད་ཀ་ནས། །
རྣམ་གཡེང་སྒྱུ་མའི་སྒྲོག་ཏུ་ཚུད་པའི་ང། །
ལེ་ལོའི་བདུད་ཀྱིས་ཡང་དུ་བསླུ་ཚུལ་འདིར། །
བསམ་ན་རང་ལ་ཡི་མུག་ངང་གིས་སྐྱེ། །

མ་བརྟག་རྫུན་གྱི་འདྲ་འབག་འདི་ག་དང་། །
བརྟག་ན་རང་ཞལ་མཐོང་བའི་བདེན་བདེན་འདིས། །
དགའ་སྐྱོའི་སྣང་བ་སྤེལ་མར་བསྡེབས་པའི་ཚུལ། །
འཇིག་རྟེན་མི་ཡུལ་ལུང་པའི་གནས་སྟངས་སོ། །