ཁྱོད་ནི་ཕར་ཁའི་མེ་ཏོག།
​ང་ནི་ཚུར་ཁའི་སྡོང་བོ།།
​འཛོམས་སའི་ཆུ་འགྲམ་གཅིག་ཀྱང་།།
​ལས་ཡོད་ཕྲད་པ་མི་འདུག།
​
​མགུར་གཞས་སྙན་མོ་ཁྱོས་ལེན།།
སྣ་གླུ་ཐན་ཐུན་ངས་འཐེན།།
ཕྲད་པའི་དབྱར་གཞུང་འདི་ལ།།
སྣང་བའི་འཇའ་རིས་བྲིས་ཆོག།

ཐོད་པའི་རི་མོ་མི་བསུབ།།
ལས་ཀྱི་ལམ་བུ་མི་བསྒྱུར།།
སྨིན་འདྲེས་ང་དང་ཁྱེད་གཉིས།།
དབྱར་དུས་ཤིག་གི་སྒྲུང་ཡིན།།

​སྒྲུང་འདི་བཤད་གི་མི་མེད།།
​སྒྲུང་འདི་ལེན་གི་དབྱངས་མེད།།
​སྒྲུབ་འདི་སེམས་སུ་ཉར་མཁན།།
​སྒྲུང་བདག་འུ་གཉིས་ཡིན་འགྲོ།།

️

གླག་རྒོད།
​

----ཨ་ཁུ་པད་མ་ཚེ་བརྟན། ངས་དོ་ཞག་ཁྱེད་རང་དྲན། མངལ་སྦྲུམ་པའི་ཁྱེད་ཀྱི་ཆུང་མ་དང་བུ་ཕྲུག་གི་ངོ་གདོང་མཐོང་ན་ལྷག་པར་དྲན།

​ཉི་འོད་དེའི་འོག་ན་
​ཁྱོད་ཀྱིས་ད་རུང་གང་ཞིག་བཙལ་གྱིན་པ་དེ་
​ཉི་མའི་འོད་མདངས་ཙམ་མ་རེད་

​གྲིབ་གཟུགས་ཀྱི་འོག་ཏུ་གྲིབ་གཟུགས་སྦས་པའི་གྲིབ་གཟུགས་དེའི་རྒྱབ་ལོགས་ན་
​མཚོ་ཆེན་ཞིག་འཁྱིལ་ཡོད་
​
​ཆུ་བོ་དེ་འདྲ་དྭངས་གཙང་མིན་ལ་
ཁྲུས་གཞོང་དེ་ལྟར་སྟབས་བདེ་མིན་ནའང་
ཁྱེད་ཀྱིས་ལུས་པོ་གཙང་མ་ཞིག་བཀྲུས་རྗེས་
དགུན་ཁའི་གྲང་ངར་གྱི་སྣེ་མོ་ན་
དབྱར་གཞུང་གི་སྟ་གོན་མཐུད་དེ་

ལྭ་བ་སྤུས་དག་ཅིག་གྱོན་ཤེས་མཁན་དེ་ཁྱེད་རང་ཁོ་ན་ཡིན་

འཇིག་རྟེན་གྱི་ནང་དུ་

ཡང་བསྐྱར་འཁོར་བ་ཞིག་བསྐྲུན་ཏེ་
དགའ་སྐྱོ་གཉིས་ཀྱིས་མ་འདང་བར་
ད་དུང་དགའ་སྐྱོ་ཕུང་གསུམ་པ་ཞིག་ཀྱང་བྱིས་པའི་ལག་ཏུ་ཤོར་

དོན་ངོ་མར་བཤད་ན་
ཁྱེད་རང་བྱིས་པ་མ་ཡིན་པའི་བྱིས་པ་དང་
རྒན་པོ་མ་ཡིན་པའི་རྒན་པོ་དེ་ལོས་ཡིན་ཏེ་
སྒྱུ་རྩལ་གྱིས་ཁྱེད་རང་བསླུ་བྲིད་བཏང་བ་མང་དྲགས་འདུག་ལ་
ཁྱེད་རང་གིས་སྒྱུ་རྩལ་བསླུས་པའང་མང་དྲགས་འདུག་

དགོད་ཤེས་ནའང་ངུ་མི་ཤེས་ལ་
ངུ་ཤེས་ནའང་དགོད་མི་ཤེས་པའི་ཟློས་གར་དེའི་ནང་དུ་
ཁྱེད་རང་ཁོ་ནས་ངུ་མ་དགོད་ཀྱི་ཚོར་བ་དེ་རྒྱུས་ལོན་བྱས་ཡོད་

མདོར་ན་
ཁྱེད་ལ་སྟོད་སྨད་ཀྱི་དབྱེ་བ་འབྱེད་ཐབས་བྲལ་བས་
མགོ་མཇུག་ཚང་བའི་གསོན་པོ་ཞིག་ཅི་ལ་མིན་
པད་ཚེ་
པདྨ་ཚེ་བརྟན།

-----རུལ་བས།

​

འགྲོ་ཀུན་བདེ་བའི་སྨོན་ལམ་འདེབས།
​ནད་མེད་ཚེ་ཐག་རིང་བར་སྨོན།
​ནད་ཅན་ནད་ལས་གྲོལ་བར་སྨོན།
​ལུས་སེམས་བདེ་བའི་སྨོན་ལམ་འདེབས།
​ཡིད་བདེ་བ་དག་རྟག་ཏུ་བདེ་བར་སྨོན།
​ཡིད་མི་བདེ་མྱུར་དུ་སངས་བར་སྨོན།
​