ཉི་མ་དང་ཟླ་བ་ནི་ཇི་ལྟར་སླར་ཡང་ཤར་ཡང་།
​ང་ཚོ་ནི་ཚར་རྒྱུ་མེད་པའི་སང་ཉིན་དེ་ལ་ཚར་རྒྱུ་ཡོད་པའི་མི་ཚེ་དེ་ཚར་བཞིན་འདུག

ཡིན་ནའང་མིའི་མི་ཁོམ་པའི་གནས་ཤིག་ནས་མི་ཁོམ་པའི་བསླུ་བྲིད་རྐྱང་རྐྱང་ལས། འཇིག་རྟེན་གྱི་གཏམ་རྒྱུད་སྣ་ཚོགས་བསྐྲུན་ཏེ།

འཚོ་བའི་དབང་པོ་སྣ་ག་གང་ཡོད་ཀྱིས་བྱ་བ་ལ་རྩོལ་བ་བྱས་འདུག
ལྷ་ལམ་གྱི་ཟླ་བས་མི་རྟག་པའི་འཇིགས་པ་ཆེན་པོ་ལས།

མུན་པ་ཅན་གྱི་ང་རྒྱལ་ཅིག་བསྟན་ཏེ།

སྐྱེ་བ་སྔ་ཕྱི་ལ་འཆི་རྐྱེན་ངེས་མེད་ཡིན་པའི་ཉམས་ལེན་གྱི་གནད་ཤེས་སུ་བཅུག་འདུག
… … … … … … ​མདོ་མེ་འབར་གྱིས

ཕུགས་འདུན་རིང་མོ།

ང་ཚོ།
འཚོ་བའི་གྲུ་ཁ་ནས།
བསྟོད་སྨད་ཀྱི་རེ་དོགས་ཤིག་གིས།
འུར་བསྟོད་ཀྱིས་སད་ཀྱིས་མ་ཁྱེར།
གནས་ལུགས་ལ་བསམ་གཞིག་བྱེད་ཞོར།
ང་ཚོ་མདུན་ནས་མདུན་དུ་ཆས།

འོད་ཀྱི་ཕྱེ་མ་ལེབ། 

སྒྱུ་རྩལ་རང་བྱུང་གི་ཁམས་ན།། 
གསེར་མདོག་འོད་གསལ་གྱི་རི་མོ།། 
ཤེས་རབ་སྟོང་ཕྲག་གིས་བརྒྱན་ཡང་།། 
རྗེས་འགྲོ་དེ་དག་ལ་མ་བྱས།། 

མུན་པའི་དུས་མཚམས་ཀྱི་ཁྲོད་དུ།། 
སྐར་མ་འོད་ཆེན་གྱི་གཟི་མདངས།། 
མགྲོན་པོའི་སྤྱན་ཟུང་དུ་བྱས་ཀྱང་།། 
ཁྱོད་ལས་གསལ་བ་ཞིག་མ་མཐོང་།། 

ཉིན་མོ་ཕར་ཕར་དུ་འདས་ནས།། 
ལོ་ཟླའི་རླུང་དམར་ཡང་འཚུབ་ཀྱང་།། 
ལང་ཚོ་ཚིག་དྲུག་གི་སྙུག་མ།། 
གཞོམ་པའི་ངང་ཚུལ་ནི་མི་གདའ།། 

རང་གཞན་དགའ་དུང་གིས་མནར་ནས།། 
སེམས་པ་དྲན་འཛིན་གྱིས་བཟི་ཏེ།། 
སེམས་ཁུར་ས་གཞི་ལ་བཤད་པས།  
གང་སར་ཆུ་མིག་ཀྱང་བརྡོལ་བྱུང་།། 

སེམས་ལ་དགའ་དུང་ཞིག་ཡོད་ན།། 
ཡིད་ཀྱི་ན་ཟུག་ཏུ་མ་འཇོག། 
དྲན་པ་འཆར་ཡན་གྱི་རླུང་བུ།། 
གཉན་གྱི་འཇིག་རྟེན་ནས་སྤུར་རོགས།། 

                              2024ལོའི་ཟླ05ཚེས་02ཉིན།  23:42