࿐ཞོགས་པའི་རྫི་གླུ།

མི་སྡུག་སྲིན་པོ་ཁྲོས་འདྲའི་བདག་རྟོག་འགོང་པོ།།
རྟག་བརྟན་སེམས་ཀྱི་གཤིས་ལ་གྲུབ་པ་མེད་རུང་།།
མེད་སྣང་ཟླ་གཉིས་འཛིན་པའི་དབང་ཤེས་ཇི་བཞིན།།
བདག་གཞན་བདེན་པར་བཟུང་བའི་སོ་སྐྱེའི་འགྲོ་བ།།
སྡུག་བསྔལ་རྦ་ཀློང་འཁྲུག་པའི་ཡི་མུག་སྙིང་རྗེ།།

ཡིད་དཔྱོད་ཚིག་ཚོགས་སྤྲོས་པའི་འཇའ་ཚོན་སྤུ་རིས།།
སེམས་ཉིད་རིག་པ་དྭངས་མའི་མཁའ་ན་མེད་རུང་།།
ཆིག་རྫོགས་ཟངས་ཐལ་གཉུག་མའི་ལྷན་སྐྱེས་ཡེ་ཤེས།།
མ་བཅོས་ཐད་ཀར་སྟོན་པའི་བླ་མའི་མན་ངག།
མངོན་སུམ་རང་ལ་དབང་བའི་སྐལ་བཟང་སྐྱིད་པ།།

ཡོད་མེད་བློ་ཡིས་བཞག་པ་ལས་གཞན་མེད་པ།།
ཅུང་ཙམ་བློ་ཡིས་གཞལ་ན་ངེས་པ་སྟེར་རུང་།།
གཏད་མེད་འ་འུར་སྒྱུ་མའི་སྨྱོ་གར་གསེང་ནས།།
དགའ་སྐྱོ་ཆགས་སྡང་ཁྲི་འབུམ་ཐོད་དུ་བླངས་ཏེ།།
ག་ཆད་ཀུ་ཅོ་འདོན་པའི་འཁོར་བ་ཤ་ཚ།།

ཟིན་མེད་རྣམ་རྟོག་འདྲེ་མོའི་གར་སྟབས་ཁྲོད་ན།།
གཏད་མེད་སེམས་ཀྱི་བུ་ཆུང་མགོ་བོ་འཁོར་ཡང་།།
བཅོས་མིན་སེམས་ཉིད་རིག་པའི་རང་ངོ་རང་ཤེས།།
གདོད་ནས་འབྲལ་མ་མྱོང་བ་འདི་རང་ཡིན་ཞེས།།
རང་བྱུང་རང་སྒྲ་གྲགས་པའི་དབྱངས་འདི་སྙན་པ།།

སྣང་སྟོང་ཕྱོགས་རིས་མེད་པའི་མཉམ་རྫོགས་ཞིང་ན།།
བདེ་སྡུག་སོ་སོར་གྲུབ་པའི་སྡེ་རིས་མེད་རུང་།།
ང་ཁྱོད་ཐ་དད་འཛིན་པའི་ཞེན་ལྟས་བཅིངས་བའི།།
ངན་སོང་གནས་རིས་སྣ་ཚོགས་རང་གིས་བསྐྲུན་པའི།།
རང་སྡུག་རང་གིས་ཉོ་བའི་རིགས་དྲུག་སྐྱོ་བ།།

རེ་དོགས་མཆི་མ་འཁྲིགས་པའི་དྲག་ཆར་གཟེབ་ནས།།
རང་ཁེ་གཞན་ཕམ་འདོད་པའི་བྱིས་པ་མང་ཡང་།།
སྣང་སྲིད་ཆོས་སྐུར་རྟོགས་པའི་ནང་གི་རྣལ་འབྱོར།།
གུ་ཡངས་གཤིས་ཀྱི་མལ་ན་སྐྱིད་ཉལ་ཆོག་པའི།།
འཁོར་འདས་དབྱེར་མེད་རྟོགས་པའི་ཆོས་པ་ངོ་མཚར།།

བདེན་རྫུན་དགག་བཞག་སྤྲོས་པ་འབུམ་ཕྲག་མང་པོས།།
ཚར་གཅོད་རྗེས་འཛིན་བྱས་ཅེས་ཁ་ཕོ་སྒྲོག་རུང་།།
ལྷན་སྐྱེས་བདག་འཛིན་དགྲ་དང་ད་དུང་སྔར་བཞིན།།
མཉམ་འགྲོ་མཉམ་འདུག་བྱེད་པའི་ཐོས་བསམ་དགྲར་ལང་།།
དེང་སང་ཅིས་ཀྱང་མང་བ་འདི་ཡང་ཡ་ང་།།

ཨོ་ཟོབ་ཚིག་ཚོགས་མང་པོས་བཤད་ཡམ་བོར་ཞིང་།།
དགག་སྒྲུབ་ཚིག་མཚོན་འཕེན་པའི་འཁོས་ཀ་ཞན་རུང་།།
ཆོས་དང་རང་སེམས་འདྲེས་པའི་འཚོ་བ་སྣུམ་པོས།།
འདི་བདེ་ཕྱི་སྐྱིད་བྱེད་པའི་དམ་གཙང་མཆེད་ལྕམ།།
སུ་དང་གང་ཞིག་ཡོད་ན་དེ་ཀུན་སྤྲོ་བ།།

གཞོན་ཆུང་ལང་ཚོས་སྤུད་པའི་ཡིད་འོང་མེ་ཏོག།
བསམ་ངན་རྒ་བའི་བ་མོས་ཚུར་ཚུར་གཙེས་ཀྱང་།།
རྟག་འཛིན་བདུད་ཀྱི་བསླུ་བྲིད་རྫོགས་མེད་ངང་ནས།།
སྒོ་གསུམ་ཚེ་འདིར་ཤོར་བའི་འཁོར་བའི་མགྲོན་པོ།།
འཆི་བ་གློ་བུར་ཐོན་ན་ཅི་འདྲའི་སྐྱོ་བ།།

ཐོག་མེད་ད་ལ་ཐུག་བར་འཁོར་བར་འཁྱམས་ཏེ།།
ཤ་ཁྲག་རུས་གསུམ་བསགས་ན་ཟད་དུ་མེད་རུང་།།
ཆོས་ཀུན་སྒྱུ་མར་རྟོགས་པའི་ངེས་ཤེས་ཀློང་ནས།།
འཐོར་མཐའ་བཙན་གྱིས་གཅོད་པའི་ཤེས་རབ་རལ་གྲི།།
འཇིགས་མེད་ལྟ་བའི་གདེང་ལྡན་ཅན་ཚོ་དགའ་བ།།

བསླབ་གསུམ་རིན་ཆེན་གདུགས་དཀར་ཀླད་ལ་འཁོར་བཞིན།།
ཉོན་མོངས་ཚ་གདུང་འཇོམས་པའི་སྟབས་ཀ་འགྲིགས་ཀྱང།།
གྲང་རླུང་ངད་ཀྱིས་བཅུམས་པའི་སེར་ཀའི་ཁྲོད་ནས།།
འཁྱག་ལྟོག་ཧུ་ཤུ་འབྱིན་པའི་ཉོན་མོངས་གྲལ་དུ།།
ཐར་མེད་ཕྱིར་ཕྱིར་འཛུལ་བའི་བསོད་ཟད་སྡུག་པ།།

སྐྱེ་ཤི་བགྲང་ལས་འདས་པའི་མར་གཤམ་ཞིག་ནས།།
ཡུལ་དུས་དམན་པའི་གྲལ་དུ་ངང་གིས་སླེབས་རུང་།།
རྐྱེན་མང་ངེས་པ་མེད་པའི་གཡུལ་ས་བརྒལ་ཏེ།།
འོད་མཚན་སྟོང་འབར་ཞིང་གི་ལམ་སྣེར་འཇུ་བའི།།
ཞུམ་མེད་དམ་བཅའ་བརྟན་པའི་ངང་ཚུལ་སྐྱིད་དོ།།

རྩམ་པ་ཟ་ཞོར་དུ་གུ་རུ་ཉི་མས། 2024 4 29

ང་རྒྱལ་ཆེ་དྲགས་ཏེ་རང་རེ་རྣམས་ཀྱི་ལུང་གི་བཤད་པ་ཐམས་ཅད་ཟུར་ཕྲ་མོ་ཙམ་ཡང་མ་ཉམས་པར་འཛིན་འདོད་པ་འདི་གནས་སྐབས་མཛེས་པ་ལྟར་སྣང་ཡང་མཐའ་མི་འཁྱོལ་བའི་ཨུ་ཚུགས་ཡིན།

࿐དགེ་འདུན་ཆོས་འཕེལ། https://t.cn/z8czTH4

࿐ཐབས་ཀྱི་བདག་ཉིད་དོན་གྲུབ་རྒྱལ་སྲས་ཀྱི་དཔའ་བོ་

ཤེས་རབ་བདག་ཉིད་མ་ལོ་ཀ་ཡི་སྲས་མོ་

ཐབས་ཤེས་ཟུང་དུ་འབྲེལ་བའི་དུས་གསུམ་གྱི་སངས་རྒྱས་

མི་གཟུགས་བྱོན་པ་ཨོཾ་རྒྱན་འཕྲིན་ལས་ཀྱི་རྡོ་རྗེ་