༈ བྱམས་སེམས་ནི་རྟོགས་རིགས་དམིག་བསལ་བ་ཞིག་ཡིན་ལ། བརྒྱ་ལ་ཁྱེད་ཀྱི་རྟོགས་རིགས་དེ་ཇེ་ལེགས་སུ་གཏོང་ཐུབ་ན་འགྲོ་བ་མིའི་རིགས་ཙམ་མ་ཡིན་པའི་སེམས་ཅན་ཡོངས་ལ་གུས་བརྩི་བྱེད་ངེས། 
悲心是一种特殊的觉性，如果你能发展这种觉性，就会尊敬所有的众生，而不只是尊敬人类。              

༧ རྫོང་སར་རིན་པོ་ཆེ།

宗萨仁波切

༈ ཨ་པཾ་གཏེར་སྟོན་ཨོ་རྒྱན་ཕྲིན་ལས་གླིང་པའི་གསུང་ལས།

བོད་སྡུག་གི་དུས་ལ་ཐུག་པའི་ཚེ༔

ལྷ་པད་འབྱུང་ལས་གཞན་སུ་ཡིས་སྐྱོབ༔

དད་མེད་ཀྱི་བདུད་ཀྱིས་ཀ་ཞ་སྒྲོག༔

རྒྱལ་བ་རྣམས་མཉམ་པར་གསུང་ཡིན་སྨྲ༔

༡ ༽ དང་པོ་ནི་གངས་ཅན་འགྲོ་བ་ལ༔

ཐུགས་བསྐྱེད་ཀྱི་སྨོན་ལམ་ཁྱད་པར་ཡོད༔

༢ ༽ བར་དུ་ནི་རྗེ་དང་བླ་མའི་ཚུལ༔

བཟུང་ནས་སུ་བསྟན་པའི་ཁྱད་པར་གཉིས༔

༣ ༽ ཐ་མ་རུ་སྙིགས་མའི་འགྲོ་བ་ལ༔

ཐུགས་བརྩེ་བའི་གཏེར་གྱི་ཁྱད་པར་གསུམ༔

༤ ༽ དུས་གསུམ་གྱི་རྒྱལ་བ་ཐམས་ཅད་ཀྱི༔

མཁྱེན་བརྩེ་ནུས་ཡོན་ཏན་གཅིག་བསྡུས་བཞི༔

༥ ༽ བལ་ཡུལ་གྱི་མཆོད་རྟེན་བཞེངས་པའི་ཚེ༔

སྙིགས་འགྲོ་ལ་སྨོན་ལམ་ཁྱད་པར་ལྔ༔

ངེད་ཉེར་བཞིའི་ཡུལ་གྱི་ཌཱཀྐིའི་གཙོས༔

དཀྱིལ་འཁོར་ཀུན་ཁྱབ་བདག་གཙོ་བོར་བཞུགས༔

རིག་འཛིན་རྣམས་ཡེ་ཤེས་སྒྱུ་མའི་འཕྲུལ༔

དཔེ་ནམ་མཁར་ཟླ་བའི་དཀྱིལ་འཁོར་ལ༔

འཛམ་གླིང་གི་ཆུ་སྣོད་ཇི་སྙེད་དུ༔

ཟླ་གཟུགས་ཀྱི་སྤྲུལ་པའི་ཟློས་གར་བཞིན༔

ས་སྟེང་འདི་པདྨའི་གདུལ་བྱ་ཡིན༔

རིགས་གསུམ་གྱི་སྤྲུལ་པའི་བཤེས་གཉེན་རྣམས༔

པད་འབྱུང་གི་རྣམ་རོལ་མཐའ་ལས་འདས༔

གཞན་ཕན་གྱི་མཛད་པ་ཕྲིན་ལས་སྒོ༔

ཡོལ་མེད་དུ་རྒྱ་མཚོའི་རླབས་ལྟར་འཁྲུགས༔

བུ་སྡུག་ཚེ་ཕ་མར་འབོད་པ་བཞིན༔

རྗེ་པདྨར་གུས་པས་གསོལ་བ་ཐོབ༔

ཞེས་གསུངས་སོ།

།

རྩོམ་པ་པོ།

རྨེ་སྤྲུལ་བསྟན་ཛིན་རྒྱ་མཚོ།

༈ དར་མའི་ལང་ཚོ་བར་སྣང་འཇའ་ཚོན་འདྲ།།
གཡར་བའི་ལུས་པོ་རླུང་གསེབ་མར་མེ་འདྲ།།
གཅེས་པའི་ཚེ་སྲོག་ནམ་མཁའི་སྤྲིན་གློག་འདྲ།།
འགྱུ་བའི་རྣམ་ཤེས་རྫ་ཆག་བྱེའུ་ཆུང་འདྲ།།

༈ མི་རྟག་འདུ་ཤེས་བྱ་རྒོད་མཆུ་ལས་སྐྱེས།།
ངེས་འབྱུང་བསམ་པ་རུས་གོང་ཁྲོད་ནས་རྙེད།།
འཁོར་བའི་ཉེས་དམིགས་རོ་མྱགས་དྲི་ལས་ཚོར།།
ཚེ་སྲོག་གནས་ལུགས་དུར་གྱི་ཁྲོད་ནས་རྟོགས།།

༈ ཞག་འགའི་གོང་ན་རྩེ་རྒོད་མཛེས་པའི་ལུས།།
དེ་རིང་དུར་རྡོའི་སྟེང་ན་རོར་གྱུར་ཏེ།།
བྱ་རྒྱལ་རྒོད་པོའི་གཟན་དུ་གྱུར་པ་འདིས།།
ངེས་མེད་འཆི་བའི་དྲན་སྐུལ་ཐེངས་གཅིག་བྱས།།

༈ སྔོན་གྱི་གསོན་ལུས་ཡིད་ཀྱི་མཁའ་ན་འགྲེངས། །
ད་ལྟའི་ཤི་ལུས་དུར་རྡོའི་ཕང་ན་ཉལ།།
འདུ་འབྲལ་སྐྱེ་ཤི་སྒྱུ་མའི་ཟློས་གར་ལས།།
དེ་རིང་ཆོས་ཀྱི་བདེན་དོན་མངོན་སུམ་མཐོང་།།

༈ ཤ་དུམ་རུས་དུམ་དུར་རྡོའི་འཁྲིས་ན་གྲམས།།
ཕྱོགས་མེད་རླུང་བུས་སྐྲ་ལོ་མཁའ་ལ་སྤུར།།
ཁེར་རྐྱང་རྣམ་ཤེས་གང་སར་གཏོལ་མེད་འཁྱམས།།
དུས་འདིར་མཆོག་གསུམ་མ་གཏོགས་སྐྱབ་གཞན་གང་།།

༈ ལུས་ལ་སྙིང་པོ་མེད་པ་འདི་ནས་ཤེས།།
ཚེ་ལ་རྟག་པ་མེད་པ་འདི་ནས་ཤེས།།
སྲོག་ལ་ཡིད་བརྟན་མེད་པ་འདི་ནས་ཤེས།།
དུར་ཁྲོད་འདི་ནས་ཡོད་ཚད་གནས་ལུགས་ཤེས།།

༈ རིང་ལ་ཐུང་བའི་མི་ཡུལ་ལོ་ཟླའི་ནང་།།
མངར་ལ་ཁ་བའི་དགའ་སྐྱོ་ཆགས་སྡང་དང་།།
བདེན་ལ་རྫུན་པའི་མྱོང་སྣང་ཟ་ཟིའི་ཁྲོད།།
སྐྱིད་ལ་སྡུག་པའི་ཚེ་འདི་དོན་མེད་འདས།།

༈ ཞིམ་རྒུའི་ཁ་ཟས་ཟོས་ཀྱང་སྙིང་པོ་ཅི།།
བཟང་རྒུའི་གོས་རྒྱན་སྤྲས་ཀྱང་སྙིང་པོ་ཅི།།
མཚར་རྒུའི་མཛེས་བཟོ་བྱས་ཀྱང་སྙིང་པོ་ཅི།།
བདེན་དང་མི་བདེན་དུར་གྱི་རོ་ལ་གཟིགས།

༈ ཁ་བའི་སྐྲ་ལོས་སྟྭ་གྲིའི་སོ་ཁ་འགྲིམས།།
གཞོན་ནུའི་བརླ་རུས་དུར་ཁྱིའི་མཆེ་བར་གཡེངས།།
སེའུ་བཅུའི་ལག་སོར་བྱ་རྒོད་སྡེར་རྩེར་འཕྱོ།།
ཀྱེ་མ་འཆི་བའི་གནས་ལས་སུ་ཞིག་བྱོལ།།

༈ གོས་ཟད་འདུ་ཤེས་སེམས་མཐིལ་ལ་བཅུག་ཤིང་།།
ཚེ་ཟད་འདུ་ཤེས་སེམས་མཐར་ཡལ་བོར་མོད།།
གྱོན་གོས་གསར་བས་རོ་རྙིང་བཏུམས་པ་ཡི།།
སྣང་ཚུལ་འདི་མཐོང་སྙིང་རྗེས་མཆི་མ་ཤོར།།

ཇ་ཡུན་ཙམ་གྱི་དུས་ཀྱི་མྱུར་ཚད་ཀྱིས།།
གསོན་ལུས་ཤི་བའི་རོ་རུ་གྱུར་མཐོང་ཚེ།།
ཤི་གསོན་བར་ཐག་རང་རེའི་བསམ་ཚོད་ལས།།
ལྡབ་ཀྱིས་ཉེ་བའི་གནས་ལུགས་གློ་བུར་རྟོགས།།

སྔར་གྱི་བཀྲག་མདངས་ལྡན་པའི་གཅེས་པའི་ལུས།།
ཕྱིས་ནས་སོ་སོར་འཐོར་བས་ངང་ཚུལ་འདིས།།
མི་ལུས་ཆུ་བུར་འདྲ་ཡང་བདེན་པར་འཛིན།།
མི་རྟག་འཁྲུལ་སྣང་བདེན་འཛིན་གླེན་པ་འཁྲུལ།།☘️