གླིང་རྟགས་འཕེལ་དགོན་པའི་མདུན་རི་རྫ་ཡི་རྡོ་རྗེ་ཤྭ་ཁྲམ་གྱི་མདུན་ལུང་ནང་གསར་བཞེང་བྱས་པའི་ཆོས་རྗེ་ཀརྨ་པ་དང་སི་ཏུ་རིན་པོ་ཆེ་གཉིས་ཀྱི་རྡོ་སྐུ་དང་། ཀརྨ་པ་ཆོས་གྲགས་རྒྱ་མཚོའི་ཞབས་རྗེས། ཁོང་གི་ཆིབས་པ་ཅང་ཤེས་ཀྱི་ཞབས་རྗེས། རིག་གསར་སྐབས་བཅད་སོང་བའི་ཆིབས་པ་ཅང་ཤེས་འདོགས་སའི་ཐང་ཤིང་གི་རྩ་བ་དང་དེའི་ཉེ་སྐོར་ན་གསར་དུ་ཚར་བའི་ཐང་ཤིང་ཆུང་ཆུང་ཞིག་དང་།ངོ་མཚར་ཞིང་ཤ་ཚ་བ་ཞིག་ལ་ཐང་ཤིང་ཆུང་ཆུང་དེའི་ཐོག་ཏུ་བྱིའུ་ཚང་ཞིག་དང་། དེའི་ནང་དུ་བྱིའུ་ཞིག་ཁུ་སིམ་མེར་ཉལ་འདུག ། གཞན་ཡང་རྡོ་ཕ་བོང་གི་ཐོག་ཏུ་བརྐོས་པའི་མ་ཎི་སོགས་རྡོ་བརྐོས་ཕུན་སུམ་ཚོགས་པ་སོགས་མདོར་ན་རྫ་ཆབ་སྔོན་མོ་ལྷུང་ལྷུང་དུ་བཞུར་ཞིང་རྫ་བྱ་གོང་མོས་གླུ་སྐད་སྙན་ས་ཞིག་རེད་འདུག ། གནས་དེ་རུ་གླིང་རྟགས་འཕེལ་དགོན་པའི་དགེ་འདུན་རྣམས་བསང་མཆོད་དང་འཇལ་སྐོར་དུ་ལོ་ལྟར་དཔྱིད་ཀ་ཕེབས་ཀྱིན་འདུག ། དེ་མ་ཟད་ཡུལ་མི་རྣམ་པ་ཡང་ལོ་ལྟར་རུ་བ་མཚེས་ཐོག་ཏུ་བབ་ཉིན་མོ་རླུང་རྟ་བགྲོན་པ་དང་གསོལ་འདེབས་སྨོན་ལམ་བྱེད་དུ་དེར་འགྲོ་སྲོལ་ཡོད་རེད་ཟེར།

མ་རེད།
འཛུམ་མདངས་མ་རེད་བཅོས་མའི་དགོད་པ་མ་རེད། །
མཛེས་པ་མ་རེད་བཟོ་མིན་རང་ཤ་མ་རེད། །
བརྩེ་བ་མ་རེད་ལྷད་མེད་ལྷག་བསམ་མ་རེད། །
དུང་བ་མ་རེད་ཡིད་ཀྱིས་དྭངས་གཙང་མ་རེད། །

འཇམ་པོ་མ་རེད་གནས་ལུགས་བསླབ་བྱ་མ་རེད། །
རྩུབ་པོ་མ་རེད་ངོས་དགའ་ལྐོག་ལབ་མ་རེད། །
དྲང་པོ་མ་རེད་ཕྱོགས་ཞེན་དག་པ་མ་རེད། །
རྫུན་པ་མ་རེད་སྐྱོན་མེད་རང་བརྗོད་མ་རེད། །

ཁ་མཚར་མ་རེད་ཕན་མེད་དགོད་གཏམ་མ་རེད། །
གཡོ་སྒྱུར་མ་རེད་རང་འདོད་གཏམ་འཁྱར་མ་རེད། །
ཉན་བསམ་མ་རེད་བསྟོད་པའི་སྙན་ཚིག་མ་རེད། །
མི་ཡག་མ་རེད་བསླུ་བའི་མཚོན་ཆ་མ་རེད། །

2024/5/14 ཉིན།

ནུས་པ་མེད་ཀྱང་རུས་པ་ཡོད་དགོས།

ཚོར་བཟི།

ཞིབ་ཏུ་བསམ་བློ་ཞིག་བཏང་ན་མི་རིགས་ཤིག་གི་སྐད་དང་ཡི་གེ་མི་རིགས་རང་ཉིད་ཀྱི་ཡར་རྒྱས་དང་གོང་འཕེལ་དུ་གཏོང་བ་ཁྲིམས་མཐུན་ལུགས་མཐུན་ཡིན་ནའང་དེང་སང་ང་ཚོ་བོད་མི་འགའ་ཞིག་བོད་ཡིག་བོད་སྐད་ལ་ཤ་ཚ་དང་དུང་ཞེན་མིན་འདུག
ཀྱེ།

ང་དང་རིགས་གཅིག་གི་སྤུན་ཟླ་ཚོ།
ཁྱེད་ཚོས་བོད་སྐད་ཅིག་བཤད་རོགས།

ཁྱེད་ཚོས་བོད་ཡིག་ཅིག་འབྲི་རོགས།
ང་ཚོ་ལོ་ངོ་སྟོང་ཕྲག་དུ་མའི་ལོ་རྒྱུས་ལྡན་པའི་ཐུ་བྷོད་བཙན་པོའི་བརྒྱུད་འཛིན་པ་ཡིན་ཕྱིར་ང་ཚོས་མི་རིགས་ལ་འགན་མ་ཁུར་བའི་བྱ་བ་བསྒྲུབ་མི་འོས།
ཁྱོད་ལ་ནུས་པ་མེད་ཀྱང་རུས་པ་ཡོད་ནི་ཞིག་བཅའ་རོགས་གཞན་སྐད་བསླབ་ཀྱང་རང་སྐད་མི་བརྗེད་ནི་ཞིག་བཅའ་རོགས།
སྐད་དང་ཡི་གེ་ཉམས་ན་མི་རིགས་ཤིག་འཇིག་རྟེན་འདི་ནས་ཤི་སོང་བ་ཡིན་པ་ཁྱེད་ཚོས་ཀྱང་ལོས་རྟོགས།
དེའི་ཕྱིར་བོད་མི་རིགས་ཀྱི་སྐད་དང་ཡི་གེ་བོད་རང་ཉིད་ཀྱིས་བཀོལ་སྤྱོད་བྱས་ནས་ཡར་རྒྱས་སུ་མ་གཏོང་ན་གཞན་སུ་ཞིག་གིས་བཀོལ་སྤྱོད་བྱེད་དགོས་པ་རེད།
ཁྱོད་རང་ཉིད་གངས་ཅན་པ་དང་ཤ་ཁྲག་གཅིག་པའི་རིགས་ཤིག་ཕྱིར་ཁྱེད་རང་གི་མི་རིགས་ལ་ཤ་ཚ་ངེས་ཅན་དགོས།
བསམ་གཞིགས་ཤིག་གནང་རོགས།
ཁྱོད་ལ་རྐུབ་སྟེགས་མཁོའམ་མི་རིགས་མཁོ
སྤྱང་ཚོགས་ཀྱིས་ལུག་ཁྱུ་ཟ་འདོད་ཀྱི་ལྕེ་རྩྭ་འཕགས་ཀྱིན་ཡོད་ན་ལུག་རྫི་ཁྱེད་བག་ཕེབས་ངང་འདུག་ཚོད་མ་རེད།
ཁྱོད་ཀྱིས་རྐུབ་སྟེགས་ཤིག་གི་ཆེད་དུ་རང་གི་མི་རིགས་འདི་འཆི་འུ་འཇོག་འདོད་དམ།

ཀྱེ།

བོད་རིགས་ཀྱི་གསར་སྐྱེས་ཚོ།

ད་ང་ཚོ་སད་རན་རེད།