གང་ཞིག་དད་པའི་རྫིང་བུ་མ་རྙོག་པར། །
ཐུགས་རྗེའི་ཟླ་གཟུགས་ནམ་ཡང་མི་འགག་པའི། །
རྒྱལ་ཀུན་གསང་གསུམ་མངའ་བདག་མཚོ་སྐྱེས་རྗེར། །
དད་མོས་འཇའ་གུར་ཀློང་ནས་གསོལ་འདེབས་ཞུ། །
མཛེས་འཛུམ་མཚན་དཔེའི་འོད་དཀར་སྣང་བ་ཡིས། །
མཐའ་དག་རྒུད་མུན་དབྱིངས་སུ་ཞི་བར་མཛོད། །

ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས།། པདྨ་གེ་སར་སྡོང་པོ་ལ།། ཡ་མཚན་མཆོག་གི་དངོས་གྲུབ་བརྙེས།། པདྨ་འབྱུང་གནས་ཞེས་སུ་གྲགས།། འཁོར་དུ་མཁའ་འགྲོ་མང་པོས་བསྐོར།། ཁྱེད་ཀྱི་རྗེས་སུ་བདག་བསྒྲུབ་ཀྱི།། བྱིན་གྱིས་བརླབ་ཕྱིར་གཤེགས་སུ་གསོལ།། གུ་རུ་པདྨ་སིདྡྷཱི་ཧཱུྃ༔ ༄༅།།ༀ་ཨཱ་ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔
ཨོ་རྒྱན་རིན་པོ་ཆེ་ལ་གསོལ་བ་འདེབས།། https://t.cn/Rp7W8xr

གུ་རུ་རིན་པོ་ཆེ་ལ་སྐྱབས་སུ་མཆིའོ། །

སློབ་དཔོན་འདི་ལ་སློབ་དཔོན་རིན་པོ་ཆེ། ཨོ་རྒྱན་རིན་པོ་ཆེ། གུ་རུ་རིན་པོ་ཆེ་སོགས་འབོད་སྲོལ་མང་མོད། རྒྱུན་དུ་སློབ་དཔོན་པདྨ་འབྱུང་གནས་ཞེས་སུ་འབོད། ཁོང་དུས་རབས་བརྒྱད་པའི་དུས་མཇུག་ཙམ་ལ་རྒྱ་གར་ནུབ་ཕྱོགས་ཨོ་ཌི་ཡཱ་ན་སྟེ། བོད་སྐད་དུ་ཨོ་རྒྱན་མཁའ་འགྲོའི་གླིང༼་དེང་སྐབས་ཕ་ཁི་སི་ཐན་གྱི་ཁོངས་སུ་ཡོད༽གི་དྷ་ན་ཀོ་ཤ་ཟེར་བའི་མཚོ་ཡི་ནང་དུ་མེ་ཏོག་པདྨའི་ནང་བརྫུས་ཏེ་འཁྲུངས་པར་བཤད། 

ཇོ་ནང་ཏཱ་ར་ནཱ་ཐ་དང་དེང་གི་མཁས་པ་མི་ཉུང་པ་ཞིག་གི་འདོད་པ་ལྟར་ན། རྒྱ་གར་ཡུལ་དབུས་མ་ག་དྷར་རྒྱལ་པོ་དེ་ཝ་པཱ་ལས་རྒྱལ་སྲིད་སྐྱོང་པའི་༼༧༣༠--༧༧༧༽ཚེ། ཨོ་རྒྱན་ཡུལ་དུ་རྒྱལ་པོ་ཧ་ཡ་ལི་ལ་ཡིས་སྲིད་བཟུང་ཞིང་དེའི་ཚེ་རྒྱལ་རིགས་རིག་པ་སྨྲ་བ་སྲ་དོའམ་སྲིག་དྷར་སྟེ་མེ་ཏོག་ཕྲེང་བ་འཛིན་པ་ཟེར་བ་ཞིག་ཡོད་པ་དེར་ཁྱེའུ་ངོ་མཚར་བ་ཞིག་འཁྲུངས། མཚན་ལྟས་ལ་མཁས་པ་གསང་སྔགས་ཀྱི་རྣལ་འབྱོར་པ་ཞིག་གིས་སྲས་འདིས་རྒྱལ་སྲིད་མི་བཟུང་ཞིང་། གསང་སྔགས་ཀྱི་ལམ་ལ་བརྟེན་ནས་གྲུབ་པ་ཐོབ་པའི་རྣལ་འབྱོར་བ་ཆེན་པོ་ཞིག་ཏུ་འགྱུར་བར་ལུང་བསྟན་དེ། མཚན་ལ་པདྨ་ཨ་བ་བྷ་སི་སྟེ་མཚམས་སྦྱར་བས་པདྨ་བ་བྷ་སི་ཞེས་བཏགས་པར་བཤད་དོ།།

ཁོང་གིས་ཆུང་དུས་ནས་རིག་པའི་གནས་ཆེ་ཆུང་དང་བརྟག་པ་བརྒྱད་སོགས་ཚེགས་མེད་དུ་མཁྱེན། གསང་སྔགས་ཀྱི་སློབ་དཔོན་ཤནྟི་རུ་པ་དང་། གྲུབ་ཆེན་སུ་ཁ་དེ་བ། མཁའ་འགྲོ་མ་སུ་ཁ་དྷ་རི་བཅས་ཀྱི་མདུན་ནས་གསང་སྔགས་ཀྱི་ཆོས་མང་དུ་བསླབས། བསྒོམ་སྒྲུབ་ཡུན་རིང་མཛད་སྐབས་རྒྱལ་པོ་ཧ་ཡ་ལི་ལ་འདས། དེའི་བུ་ཨགྵལི་ལ་ཡིས་སྲིད་དབང་བཟུང་སྐབས་བློན་པོ་ངན་པས་དབྱེན་སྦྱོར་བྱས་པ་སོགས་ལ་བརྟེན་ནས་རྒྱལ་བོས་སློབ་དཔོན་བཟུང་སྟེ་མཚོན་གྱིས་བསྣུན་པ་དང་། ཆུ་དང་གཡང་ལ་བསྐྱུར་བ། གསོན་པོར་ས་སྦས་སོགས་བྱས་ཀྱང་མ་སོད་པས་གནས་དབྱུང་བྱས། དེ་ནས་བཟུང་ཁོང་རི་བྲག་དང་དུར་ཁྲོད་སོགས་སུ་ཡོ་ག་སྒོམ་ཞིང་། དྷ་བུ་ཀྲི་ཏ་སོགས་གྲུབ་པ་ཐོབ་པའི་སློབ་དཔོན་བརྒྱད་ལས། རལ་གྲི་དང་། རིལ་བུ། མིག་སྨན། རྐང་མགྱོགས། སྨན། བཅུད་ལེན། གཏེར་གྱི་བུམ་པ། གསེར་འགྱུར་གྱི་རྩི་སོགས་ཀྱི་ཐུན་མོང་གི་དངོས་གྲུབ་བརྒྱད་ཐོབ། 

དེ་ནས་རྒྱལ་བོ་དྷརྨཔཱ་ལ་ཡིས་སྲིད་དབང་བཟུང་པའི་སྐབས་སུ་༼༧༩༠---༨༥༣༽རྒྱ་གར་ཡུལ་དབུས་མ་གྷ་དྷར་བྱོན། གྲུབ་པ་ཐོབ་པའི་སློབ་དཔོན་སངས་རྒྱས་ཡེ་ཤེས་ལས་རབ་ཏུ་བྱུང་ཞིང་བསྙེན་པར་རྫོགས་ཤིང་། རྒྱུད་སྡེ་བཞིའི་དབང་དང་མན་ངག་མང་པོ་གསན། སློབ་དཔོན་གྱི་བཀའ་ལྟར་རྒྱ་གར་བྷང་གྷ་ལའི་ཡུལ་གྱི་གྲོང་ཁྱེར་པ་ཎ་ཌ་པའི་བྱང་ཕྱོགས་ཀྱི་ནགས་ཚལ་པར་ཤི་ཞེས་བྱ་བར་བཞུགས་ནས་གསང་སྔགས་ཀྱི་སྤྱོད་པ་མཛད་དེ་མཆོག་གི་དངོས་གྲུབ་བརྙེས། དེ་ནས་རྒྱ་གར་བྱང་ཕྱོགས་ཀྱི་ཡུལ་ཏི་ར་ཧུ་ཏི་དང་བལ་ཡུལ། ཤར་ཕྱོག་ཀཱ་མརུ། ལྷོ་ཕྱོགས་ཏྲི་མ་ལ་སོགས་སུ་ཕྱིན་ནས་མུ་སྟེགས་པ་མང་པོ་བཏུལ་ཞིང་ལྷ་འདྲེ་མང་པོ་དམ་ལ་བཏགས་ཏེ་བོད་དུ་བྱོན།