༄༅། །དབྱངས་ཅན་མའི་བསྟོད་པ། #རྗེ་བློ་བཟང་གྲགས་པ།#

࿑ཆུ་འཛིན་དཀར་པོ་གློག་ཕྲེང་དྲ་བ་ཅན།

མཁའ་ཡི་མཛེས་བྱེད་འདྲ་བའི་ཡིད་འཕྲོག་མ།།

དྲི་ཟའི་ན་ཆུང་དབུས་ན་འཇོ་སྒེག་མཁན།།

རིང་ནས་བརྩེ་བའི་ལྷ་མོ་ད་ཚུར་བྱོན། །

པདྨའི་བཞིན་ལ་གཡོ་ལྡན་བུང་བའི་མིག། །

མཐོན་མཐིང་རལ་པའི་རྩེ་ན་འོད་དཀར་ཅན།།

རོལ་སྒེག་གར་གྱིས་འགྱིང་བའི་དབྱངས་ཅན་མ།།

ད་དུང་བདག་ལ་ངག་གི་དབང་ཕྱུག་སྩོལ།།

རོལ་རྩེད་གར་གྱི་ཉམས་ལྡན་རི་དྭགས་མིག།།

མིག་གིས་ལྟ་བས་མི་ངོམས་ཡིད་འཕྲོག་མ།།

མ་ལྟར་བརྩེ་བ་ཁྱོད་ཀྱིས་བདག་གི་ངག།།

ངག་དབང་ལྷ་མོ་ཉིད་དང་མཚུངས་པར་མཛོད།།

སྟོན་ཟླ་རྒྱས་པའི་དཔལ་ལས་ལྷག་པར་མཛེས།།

ཚངས་དབྱངས་སྙན་པའི་གདངས་ཀྱང་ཟིལ་གྱིས་གནོན།།

ཟབ་ཡངས་རྒྱ་མཚོའི་འཇིང་ལྟར་དཔག་དཀའ་བ།།

དབྱངས་ཅན་ལྷ་མོའི་སྐུ་གསུང་ཐུགས་ལ་འདུད།།

ཨོཾ་སྭ་རཱ་སིད་དྷེ་ཧྲཱིཾ་ཧྲ།ཅེས་སྒྲ་དབྱངས་ལྷ་མོ་སྤྱན་དྲངས་ནས་བསྟོད་ཅིང་གསོལ་བ་གདབ་པ་ཡུལ་བྱང་ཕྱོགས་ཀྱི་སྙན་དངགས་མཁན་བློ་བཟང་གྲགས་པའི་དཔལ་གྱིས་སྦྱར་བའོ།།

࿑མེ་ཏོག་ལྟར་མཛེས་ཤིང་ཡིད་གར་འོང་བའི་ཁ་དོག་སྣ་ལྔས་སྤུད་བའི་ལང་ཚོའི་རྨི་ལམ་ཞིག་ཡིན་སྲིད་ལ། རྨི་ལམ་ཇི་བཞིན་མཛེས་སྡུག་གིས་བཞད་ཅིང་མི་རྟག་པའི་བདེན་པར་ཐིམས་པའི་མེ་ཏོག་གི་ལང་ཚོ་ཞིག་ཀྱང་ཡིན་ངེས།

࿑བདག་འཛིན་ཞིག་མངོན་དུ་གྱུར་སྟངས།

ང་ཚོས་ནམ་རྒྱུན་སྤྲོ་བ་ཆེན་པོའི་སྒོ་ནས་ཆོས་ཀྱི་ཡང་སྙིང་ལ་བརྩོན་པ་མི་བགྱིད་ལ་ནང་རྣལ་འབྱོར་གྱི་རིམ་པ་ནི་ས་གནམ་དང་རྒྱ་མཚོའི་ཕར་ཚུར་བཞིན་རྒྱང་ཐག་རབ་ཏུ་རིང་ནའང་།སྐབས་རེ་འགའ་ལ་དགོས་མཁོ་དང་གཞན་གྱིས་ཁྲིམས་སུ་བྱས་པ་ལ་བརྟེན་ནས་རྣམ་པ་ཅུང་མི་འདྲ་བའི་ཆོས་གཞུང་གི་རྒྱུགས་སོགས་ལ་གཞུག་དགོས་བྱུང་ཚེ། དེ་ལ་སེམས་ཚེགས་དང་དཀའ་བ་སྤྱོད་པ་ནི་བལྟས་ཚོད་ཀྱིས་ལེགས་པོ་ཞིག་ཏུ་སྣང་ཡང་།

ཕུགས་དེད་ན་འདི་ཡང་བདག་འཛིན་ཞིག་མངོན་དུ་གྱུར་སྟངས་ལས་གཞན་ཞིག་མ་ཡིན་ནོ།། གཞན་ལས་རྣམ་པར་རྒྱལ་བའི་འགྲན་སེམས་ཤིག་གིས་ཡོད་ཚད་ཀྱི་སྣ་དྲངས་ཡོང་། དཔེར་ན་རང་ཉིད་གཞན་ལས་རྒྱལ་ན་བསྟོད་གྲགས་སོགས་རྒྱས་འོང་སྙམ་པ་དང་། མ་རྒྱལ་ན་རང་གིས་གཞན་གྱི་མིག་མདུན་ནས་ང་ཚ་སོགས་མྱོང་དགོས་པར་བསམ་པ་དང་། ཡང་རང་ཉིད་གཞན་ལས་མ་རྒྱལ་ན་གཞན་གྱིས་ཁེ་བཟང་རེག་པ་དང་། རང་ལ་ཁེ་བཟང་དང་འདོད་པ་གང་ཡང་རུང་བ་ཞིག་ལོངས་སུ་སྤྱོད་པའི་སྐལ་བ་མི་ལྡན་སེམས་པ་སོགས་རང་ཉིད་ཁོ་ན་ལས་གཞན་ལ་ཅི་མི་སྙམ་པའི་བསམ་བློ་སྣ་ཚོགས་བསྐྱེད་པའོ།། དེ་དག་ཐམས་ཅད་གཅེས་སུ་འོས་པ་དང་བསྲུང་འདོད་པའི་བདག་གམ་ང་ཞེས་གཞན་ལ་མི་ལྟོས་པའི་རྡོག་རྡོག་ཅིག་རང་གི་ཕུང་བོ་སོགས་ཀྱི་སྟེང་ན་གྲུབ་ཡོད་པར་འདོད་པས་ལན་པ་རེད།

གཞན་གྱིས་རང་ཉིད་ཉམས་པར་དོགས་པའི་ནང་གི་སྐད་ཆ་དག་ངས་བླུན་རྟགས་ཆེན་པོས་ཕྱི་ལ་བསྒྲགས་པར་སྤྲོ།

༢༠༢༡\ ཧོར་ \༥\ ༢\ ཉིན་རྨ་པྲཛྙཱ་ནས་བྲིས། https://t.cn/RpZP4i4