࿑ཇོ་བོ་བཀའ་གདམས་པའི་དགེ་བཤེས་ཚོའི་གདན་ས་སྙན་ཆེ་བ་ཀུན་འཕན་ཡུལ་ལུང་པ་འདིའི་མགོ་མཇུག་ཏུ་ཡོད་པས། སྔ་ཚུད་ནས་གནས་འདིར་ཤིན་ཏུ་འགྲོ་སྙིང་འདོད་པ་ཞིག་ཡོད་པ་ལ། ད་ལན་ཡུལ་གྲོགས་ཤིག་གིས་རླངས་འཁོར་གྱི་མཐུན་རྐྱེན་སྦྱར་བ་དང་། གཟའ་མཇུག་གི་ངལ་གསོའི་སྐབས་དང་བསྟུན་འཕན་ཡུལ་ཕྱོགས་སུ་ལྗོངས་རྒྱུ་རུ་འགྲོ་བའི་གོ་སྐབས་རྙེད། ཉིན་ཅིག་གི་ལྗོངས་རྒྱུ་དེ་ནན་ཏར་སྐྱིད་ལ་སེམས་ཀྱི་རྒྱགས་ཆེ་ཡང་སྙིང་ཚིམས་པ་ཞིག་བྱུང་། འོ་ན་ལུང་པ་འདིར་ཕྱིན་ཙ་ན། ཅི་ཞིག་སྣང་། གང་ཞིག་ཐོས་ཤེ་ན། མདོར་དྲིལ་ན་སྐད་ཆ་ཚིག་ཅིག་གིས་མཚོན་པར་ནུས་ཏེ། དེ་ཡང་ཁོ་བོ་དེ་རིང་གཉིད་ལས་སད་དུས་ད་དུང་ཡང་མིག་ལམ་དུ་མཆོད་རྟེན་ཁོ་ནར་འཆར་བ་ཞིག་ཡོང་གིན་འདུག [玫瑰] https://t.cn/z8KMELS

࿑དེ་རིང་ནི་ཚེས་ཉེར་ལྔ་སྟེ་རྗེ་བཙུན་སྒྲོལ་མའི་དུས་ཆེན་ཡིན་པས། ཀུན་གྱིས་སྦྱོར་བ་སེམས་བསྐྱེད་དམ་པ་དང་། དངོས་གཞི་དམིགས་མེད་དམ་པ། མཇུག་བསྔོ་བ་དམ་པ་སྟེ་དམ་པ་གསུམ་གྱིས་རྩིས་ཟིན་པའི་སྒོ་ནས་རྣམ་དཀར་དགེ་བའི་ལས་ལ་འབད་པར་འཚལ།

སྒྲོལ་མའི་གསོལ་འདེབས།
度母祈祷文
ཨོཾ་ཕྱག་འཚལ་རྗེ་བཙུན་ཏཱ་རེ་ལྷ་མོ།།
嗡 顶礼至尊圣度母
ཏུཏྟཱ་རེ་ཞེས་གདུང་བ་ཀུན་སྐྱོབ།།

明咒能救诸忧苦
ཐུགས་རྗེ་ཐོགས་མེད་ཏུ་རེ་དཔའ་མོས།།
大悲无碍勇度母
བདག་ལ་གྲུབ་མཆོག་སྩོལ་ཅིག་སྭཱ་ཧཱ།།
祈祷赐我胜成就
སྒྲོལ་མའི་བསྙེན་པ། 度母心咒：
ཨོཾ་ ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ།
嗡达热德达热德热娑哈
བསྔོ་བ་སྨོན་ལམ།
回 向
རྒྱལ་ཡུམ་སྒྲོལ་མ་ཁྱེད་སྐུ་ཅི་འདྲ་དང་།།
佛母度母尊身何所依
འཁོར་དང་སྐུ་ཚེའི་ཚད་དང་ཞིང་ཁམས་དང་།།
眷属寿量以及净土等
ཁྱེད་ཀྱི་མཚན་མཆོག་བཟང་པོ་ཅི་འདྲ་བ།།
尊之圣号贤善何所依
དེ་འདྲ་ཁོ་ནར་བདག་སོགས་འགྱུར་བར་ཤོག།
彼悉唯如吾等之所愿

࿑ སྔོན་ཆད་བྲིས་པའི་སྙན་ངག་གི་དཔེར་བརྗོད་འགའ།

དོན་རྒྱན་སོ་ལྔའི་ནང་གསེས་གཟུགས་ཅན་རྒྱན་
ཉི་ཤུ་ཡོད་པ་ལས།

༡༽ བསྡུས་པའི་གཟུགས་ཅན།
དབྱངས་ལྡན་ཁྱེད་སྐུ༵་ཤེལ་དཀར་ལྷུན་པོའི་སྤོར།།
འཛུམ་ཞལ༵་སྟོན་མཚན་ཟླ་བའི་དཀྱིལ་འཁོར་རྒྱས།།
ཟབ་རྒྱས་མཁྱེན་རབ༵་གཟི་འོད་རབ་འཕྲོས་པས།།
རྨོངས་ཚོགས༵་སྐྱེ་བོ་ཀུ་མུད་འདབ་བརྒྱ་གྲོལ།།

༢༽མ་བསྡུས་པའི་གཟུགས་ཅན།
གངས་དཀར་ལྷུན་པོའི༵་རྒྱུ་སྐར་ར་བའི་ཁྲོད།།
རྨད་བྱུང་ལྔ་ཟུང་སློབ་གྲྭའི༵་བསིལ་བྱེད་རྒྱས།།
འཆད་རྩོད་རྩོམ་པའི༵་གཟི་འོད་དཔལ་འབར་ཞིང་།།
གཞོན་ནུ་སློབ་བུའི༵་ཀུ་མུད་ཡོངས་སུ་རྒྱས།།

༣༽བསྡུས་ཤིང་མ་བསྡུས་པའི་གཟུགས་ཅན།
འདྲེན་མཆོག་ཁྱེད་སྐུ༵་ཡོངས་འདུ་ས་བརྟོལ་ལ།།
ཡིད་འོང་ངུར་སྨྲིག༵་ཐུན་འཚམས་གསར་པས་འཁྱུད།།
ལུང་དང་རྟོགས་པའི༵་འབྲས་བུ་གཡུར་ཟ་བ།།
ཐར་འདོད་ཅན་གྱི༵་སྲེད་ལྡན་ལོངས་སུ་སྤྱོད།།

ཡང་དཔེར་བརྗོད་གཞན་ཞིག
མཁྱེན་གཉིས༵་དཀྱིལ་འཁོར་རྫོགས་པའི་ཉིན་བྱེད་ལ།།
དོན་གཉིས༵་ལྷུན་གྲུབ་འཕྲིན་ལས་སྣང་བ་རྒྱས།།
རྐང་གཉིས༵་ཐར་འདོད་བློ་ཡི་པད་ཚལ་དུ།།
བདེན་གཉིས༵་འདབ་བརྒྱ་གྲོལ་ལ་དཔའ་དེས་སྐྱོང་།།

ཞེས་པ་འདི་ནི་སློབ་བུ་ཐ་ཤལ་གྱིས་བཀོད་པའོ།།

࿑ ད་ཅི་ཀུན་མཁྱེན་མི་ཕམ་གྱི་མཁས་འཇུག་ཁ་ཕྱེས་དུས་ལོ་མང་པོའི་སྔོན་སི་ཁྲོན་བོད་བརྒྱུད་ནང་བསྟན་སློབ་གླིང་དུ་སྙན་ངག་སྦྱངས་སྐབས་ཀྱི་དཔེར་བརྗོད་འགའ་ཤས་རྙེད་བྱུང་། སྐབས་དེ་དུས་སྙན་ངག་ལེའུ་བར་པའི་དོན་རྒྱན་སོ་ལྔ་རང་བཞིན་བརྗོད་པའི་རྒྱན་ནས་དགོངས་པ་ཅན་གྱི་རྒྱན་གྱི་བར་རྒྱན་རེ་རེ་ལ་དཔེར་བརྗོད་བདུན་རེ་བདུན་རེ་བྲིས་མྱོང་ཡང་ལོ་མང་ཕྱིན་པ་ཡིན་ཙང་། ད་ལྟ་ལས་བྱ་ཤོག་ངོས་གཅིག་ཀྱང་རྙེད་མ་བྱུང་། དེ་དུས་རང་གིས་དཔེར་བརྗོད་བྲིས་སྐབས་བརྗོད་བྱ་རྗོད་བྱེད་གཉིས་ཀ་ལ་གཟབ་གཟབ་བྱས་པ་མ་ཚད་ཕྲད་རྣམ་དབྱེ། བྱ་ཚིག་དག་ཡིག བྲིས་ཡིག་གཟུགས་སོགས་ལའང་དོན་སྣང་ཆེན་པོ་བྱས་པས་རྒྱུགས་འབྲས་ཀྱི་སྐར་གྲངས་ཀྱང་ཆེས་མཐོ་ཤོས་མང་པོ་རག་མྱོང་བ་མ་ཚད། ནང་བསྟན་སློབ་གླིང་དུ་ཧ་ལམ་ལོ་བཞིའི་རིང་གི་༼གསུམ་བཟང་སློབ་མ༽འི་བྱ་དགའ་ཉག་གཅིག་དེ་གུས་པ་རང་ལ་ཐོབ་བྱུང་། དེ་ལས་གཞན་པའི་འགན་ཁུར་པའི་བྱ་དགའ་ཐོབ་པ་ནི་ལོ་མང་རིང་དྲུང་ཡིག་གི་ལས་ཀ་ཡག་པོ་བསྒྲུབས་པའི་འབྲས་བུ་ཞིག་རེད། གཞུང་དང་རིག་གནས་ལ་འབད་རྩོལ་བྱས་ཀྱང་མཐོང་རྒྱ་དང་ཐོས་རྒྱ་གང་ཡང་མེད་པ་ནི་དཔེར་བརྗོད་ལ་བལྟས་པ་ཙམ་གྱིས་རྟོགས་ནུས། སྔོན་གྱི་སྙན་ངག་དཔེར་བརྗོད་འགའ་མཐོང་དུས་དྲན་པའི་ཡུལ་ཙམ་ལས་གཞན་དག་དཔེར་བརྗོད་ཕལ་ཆེར་བརྗེད་ངས་དང་སྙོམ་ལས་དབང་གིས་བརྗེད་ཚར་འདུག ད་ནི་མིག་ཟུང་རབ་རིབ་གྱུར། ཡིད་ཀྱི་དྲན་པ་མི་གསལ། སུག་བྲིས་རྣམས་ཀྱང་གཞན་གྱིས་ཡིག་ངོ་མི་ཤེས་པའི་ཚད་ལ་བསླེབས་རུང་ཆུང་དུས་ནས་སྙན་ངག་གི་སྒྱུ་རྩལ་གྱི་ཉམས་འགྱུར་ལ་དགའ་བའི་བག་ཆགས་ཀྱི་ཤུགས་ཀྱིས་ད་དུང་ཉམས་མ་ཐོན་རུང་སྙན་ངག་གི་དཔེར་བརྗོད་ཐ་རེ་ཐོ་རེ་འགའ་འབྲི་བ་ལ་གང་གིས་ཀྱང་འགོག་མི་ནུས་པར་སྐབས་རེ་ཁ་ཏོན་དགེ་སྦྱོར་གྱི་འཕྲོ་ཡང་ཆད་དེ་རང་དབང་མེད་པར་སྙན་ངག་དཔེར་བརྗོད་འབྲི་བའི་ལས་ལ་གཡེང་བར་གྱུར་ཏོ།།