༄༅། །ཆོས་ལུགས་མཐུན་སྒྲིལ།།
   ཆོས་ལུགས་མཐུན་སྒྲིལ་གོང་འཕེལ་གཏོང་རྒྱུ་ནི་ཁ་ནས་འདྲ་ཆགས་པོ་བཤད་དེ་སྡོད་རྒྱུ་ཞིག་མེན་པར།། དོན་དངོས་ཐོག་ཆོས་ལུགས་ཕན་ཚུན་བར་ཁ་ཞེ་གཉིས་མེད་ཀྱི་གུས་བརྩི་དང་།། ཡི་རང་སྔགས་བརྗོད་ཞུ་དགོས།། འཛམ་གླིང་འདིའི་སྟེང་མི་ཐེ་འབུམ་བདུན་ཡོད་པ་དེ་དག་ཚང་མ་ནང་པ་བྱེད་དགོས་པའམ། ཡང་ན་ཡི་ཤུ་བྱེད་དགོས་པ་ཞེས་བརྗོད་ན།། དེ་ནི་དངོས་ཡོད་གནས་ཚུལ་དང་མི་མཐུན་པ་ཞིག་རེད།།  ཆོས་ལུགས་ཁག་ལོ་ངོ་བརྒྱ་ཕྲག་མང་པོའི་རིང་གནས་ཡོད་པ་དང་།། མ་འོངས་པར་ཡང་མུ་མཐུད་གནས་རྒྱུ་ཡིན་པར་བརྟེན་།། ང་ཚོས་འདོད་ཀྱང་རུང་མ་འདོད་ཀྱང་རུང་གང་ལྟར་འཛམ་གླིང་འདིའི་ནང་མཉམ་དུ་སྡོད་དགོས།།

༄༅། །སེམས་གཅོང་དེ་ཡུལ་གྱར་ནས་འཚོ་བའི་ང་ཚོ་ཚང་མར་མངའ། ཕ་ཡུལ་དང་འཚོ་ཡུལ་བར་ན་བཤད་མི་ཤེས་པའི་གྲོག་རོང་ཞིག་མཆིས། ཕ་ཡུལ་ན་ཡོད་དུས་ལས་ཡུལ་བསམ། ལས་ཡུལ་དུ་ཡོད་དུས་ཕ་ཡུལ་བསམ།

༄༅། །ལོ་སར་གྱི་བཀྲ་ཤིས་སྨོན་ཚིག་བཞུགས་སོ། །

༧ རྗེ་གུང་ཐང་བསྟན་པའི་དབང་ཕྱུག་གིས་བརྩམས།
ན་མོ་གུ་རུ།
བླ་མ་མཆོག་གསུམ་བྱིན་རླབས་སྤྲིན་ཕུང་གཡོ།།
མཆོག་ཐུན་དངོས་གྲུབ་བདུད་རྩིའི་གྲུ་ཆར་འཛོ། །
ཚེ་རིང་ནད་མེད་བདེ་སྐྱིད་ཉི་འོད་འབར། །
ལས་བཞིའི་ངོ་མཚར་འཇའ་འོད་དགུང་ནས་འཁྱུགས། །
རབ་དཀར་བཀྲ་ཤིས་དཔལ་གྱིས་སྒེག་པ་ཡི།།
རབ་གནས་ཡོས་བུའི་འཛུམ་མདངས་ངོམ་པའི་ཚེ། །
རབ་འབྱམས་རྒྱལ་བའི་སྤྱི་གཟུགས་བླ་མ་ལ། །
རབ་ཏུ་དད་པས་གསོལ་བ་འདི་བཞིན་འདེབས། །
རྒྱལ་བསྟན་དར་ཞིང་བསྟན་འཛིན་སྐྱེས་བུ་ཀུན། །
ཞབས་པད་བརྟན་ཅིང་མཛད་འཕྲིན་རྒྱས་པ་དང་། །
དགེ་འདུན་སྡེ་རྣམས་ཆོས་སྤྱོད་བྱ་བ་འཕེལ། །
ཡངས་པའི་རྒྱལ་ཁམས་བདེ་ཞིང་སྐྱིད་གྱུར་ཅིག །
བདག་གི་སྨོན་པའི་རེ་བ་འགའ་ཡོད་པ། །
བར་ཆད་མེད་པར་ཡིད་སྨོན་ལྟར་འགྲུབ་ནས། །
བསྟན་དང་འགྲོ་ལ་ཞབས་འདེགས་ཅུང་བསྒྲུབ་པར། །
གང་འདོད་རེ་བ་མ་ལུས་ལྷུན་འགྲུབ་ཤོག །
ལུས་ལ་ནད་དང་སེམས་ལ་སྡུག་བསྔལ་མེད། །
ལས་རྣམས་འགྲུབ་ཅིང་ལུས་བདེ་སེམས་སྐྱིད་ངོས། །
རྣམ་དཀར་ཆོས་སྤྱོད་ཆོས་ཀྱི་བྱ་བ་ཡིས། །
བཀྲ་ཤིས་དགེ་མཚན་རྟག་ཏུ་རྒྱས་གྱུར་ཅིག །
ཅེས་ཁོང་ཉིད་དགུང་ལོ་དོན་བཞི་བ་རབ་གནས་ས་ཡོས་ལོའི་གནམ་ལོ་གསར་བཞད་ལ་རྟེན་འབྱུང་གི་ཤིས་ཚིག་ཏུ་ཤར་མར་སྨྲ་བ་བོ་དགེ་སྦྱོང་གུང་ཐང་བསྟན་པའི་དབང་ཕྱུག་ཏུ་འབོད་པའོ།།