ཅེས་པ་སོགས་ལས་པཎ་ཆེན་འདི་རྒྱ་གར་འཕགས་པའི་ཡུལ་ན་རྩོད་པའི་ཟླ་དང་བྲལ་བ་ཞིག་ཡིན་པས། མུ་སྟེགས་པ་རྣམས་ཀྱིས་ཁོ་ཚོའི་བསྟན་པ་བསྣུབ་པར་དོགས་ནས་ངན་སྔགས་སྤྲད་དེ་ཤར་རྒྱ་མཚོ་ཐུག་པའི་བར་བསྐྲད་དོ་ཟེར་བ་པཎ་ཆེན་འདི་ལ་འཁོར་ནས་ས་མཐར་འཁྱམ་དགོས་བྱུང་བ་ཤེས་ཐུབ། དེ་བས་ན་ཁོང་ལ་མུ་སྟེགས་པས་ངན་སྔགས་འཁོར་བའི་ཚེ་ཁོང་གི་ཡུམ་བོད་དུ་ཉི་ཚེའི་དམྱལ་བར་སྐྱེས་ཡོད་པ་མཁྱེན་ནས་བོད་ལ་ཕེབས་པར་སྟ་གོན་བྱེད་པའི་སྐབས་ལ་བལ་བོ་ལོ་ཙཱ་བ་རྨེ་རུ་རྩེས་ཀྱང་རྒྱལ་པོའི་བཀའ་བཞིན་གདན་དྲངས་པས་རྐྱེན་སུམ་བརྩེགས་ཀྱི་དབང་གིས་བོད་གངས་ཅན་གྱི་ལྗོངས་འདིར་ཕེབས་པ་མིན་ནམ་སྙམ་མོ།། དེ་བཞིན་ཚངས་གླུ་ལས་དྲངས་པའི་ལུང་ཚིག་དེ་གཉིས་ནི་རྣམ་ཐར་དོན་བསྡུས་ཀྱི་ཤོ་ལོ་ཀ་དེ་གཉིས་ཀྱི་ལོ་རྒྱུས་རྒྱབ་ལྗོངས་ཡིན་ལ། དེ་ལས་པཎ་ཆེན་འདིས་མ་ཡུམ་མཐོ་རིས་ལ་དྲངས་རྗེས་རྒྱལ་ཁམས་འགྲིམས་ཏེ་ཙི་ནའི་ཡུལ་དུ་བྱོན་པ་དང་། དེ་རུ་མུ་སྟེགས་ཀྱི་ངན་སྔགས་འཁོར་བ་མཁྱེན་ཏེ་ཏིང་ངེ་འཛིན་གྱིས་བཀུགས་རྗེས་ཡང་བསྐྱར་ཞབས་ཟུང་བ་བོད་ཡུལ་ལ་བསྒྱུར་བ་དཔག་ཐུབ། འདིར་ཅུང་ཟད་འཕྲོས་ནས་རིགས་འདེད་བྱས་ན། འབའ་ཡུལ་གྱི་སྨྲྀ་ཏིའི་དགོན་ཤུལ་གཉིས་པོ་དང་མཆོད་རྟེན་གྱི་ཤུལ། ད་དུང་མཚོ་སྔོན་མགོ་ལོག་གི་ཡུལ་དང་མཚོ་སྔོན་པོའི་རྟ་ནག མཚོ་ལྷོའི་ཧང་ང་རྫོང་（兴海县）གི་ཧོལ་ཁ་སོགས་ནས་པཎ་ཆེན་འདིས་རྫི་བོ་མཛད་ཚུལ་གྱི་ངག་རྒྱུན་མང་པོ་ཞིག་ཡོད་པ་དེ་ལའང་དཔྱད་པར་བྱ་བ་འདི་ཡོད་དེ། ས་གནས་འདི་དག་ནི་སྐབས་དེར་རྒྱའི་ཡུལ་ལ་འགྲོ་སའི་ལམ་ཁ་གཙོ་བོ་ཞིག་ཡིན་པ་མ་ཟད། མདོ་དབུས་ཁམས་གསུམ་གྱི་ཚོང་ལམ་གཙོ་བོ་ཞིག་ཀྱང་ཡིན། དེ་བས་སྐབས་དེའི་མཁས་པ་རྣམས་ཀྱང་ཚོང་པ་ལ་འགྲོག་ནས་ཕེབས་པ་དང་ཚོང་ལམ་བརྒྱུད་དེ་མདོ་དབུས་ཁམས་གསུམ་ལ་ཞབས་སོར་བཀོད་ཀྱིན་ཡོད་དེ། རྒྱ་གར་ཕྱོགས་ནས་ཕེབས་པའི་པཎྜི་ཏ་དང་ལོ་ཙཱ་བ་སོགས་ཀྱང་ཚོང་ལམ་དང་ཚོང་པ་ལ་བརྟེན་ནས་བོད་ལ་ཕེབས་བཞིན་ཡོད་པ་ཁོ་ཚོའི་རྣམ་ཐར་ལས་ཤེས་ལ། ཇོ་བོ་རྗེ་ཡང་ཚོང་པ་དང་ཚོང་ལམ་ལ་བརྟེན་ནས་བོད་ལ་ཕེབས་པའོ།། འབྲོམ་སྟོན་པ་ཡང་ཚོང་པ་དང་ཚོང་ལམ་ལ་བརྟེན་ནས་ཁམས་སུ་ཕེབས་པའོ། ། དེ་བཞིན་རྒྱ་བཟའ་ཀོང་ཇོ་བོད་ལ་ཕེབས་པའི་སྐབས་ཀྱང་ཡུལ་ཤུལ་དང་མགོ་ལོག མཚོ་སྔོན་པོའི་ཉེ་འདབས་ཀྱི་རི་བོ་ཉི་ཟླ་སོགས་བརྒྱུད་མྱོང་བའི་ལོ་རྒྱུས་ཡོད་པ་སོགས་ཀྱིས་ཀྱང་ས་གནས་འདི་དག་ནི་རྒྱ་བོད་ཀྱི་འབྲེལ་འདྲིས་བྱ་སའི་ལམ་ཁ་གཙོ་བོ་ཞིག་ཡིན་པ་ཤེས་ཐུབ། དེ་བས་ན་ངག་རྒྱུན་དེ་དག་ནི་པཎ་ཆེན་སྨྲྀ་ཏི་ལམ་ཁ་འདི་དག་བརྒྱུད་དེ་ཙི་ནའི་ཡུལ་དུ་བྱོན་པའི་སྐབས་སམ་ཕྱིར་བོད་ལ་ཕེབས་པའི་དུས་སུ་བཞག་པ་ཡིན་སྲིད་ལ། འབའ་རྫོང་ན་ཡོད་པའི་དགོན་ཤུལ་དང་མཆོད་རྟེན་གྱི་ཤུལ་སོགས་ཀྱང་དུས་པཎ་ཆེན་འདི་ཉིད་ཙི་ནའི་ཡུལ་དུ་བྱོན་པའི་དུས་སམ་ཕྱིར་བོད་ལ་ཕེབས་པའི་སྐབས་སུ་བཞེངས་པ་མིན་ནམ་སྙམ་ལ། འབའ་རྫོང་གི་དགོན་ཤུལ་སོགས་ནི་ཡུལ་ཤུལ་གྱི་འཛོམ་ཉག་མཆོད་རྟེན་ལས་སྔ་བར་སྣང་སྟེ། ཁོང་གི་རྣམ་ཐར་སོགས་ལས་འཛོམ་ཉག་མཆོད་རྟེན་བཞེངས་རྗེས་དྲན་དུ་ཕེབས་ནས་དེ་རུ་སྐུ་གཤེགས་པར་གསུངས་པ་དང་། ཡུལ་གྲུ་གཞན་ལ་ཕེབས་པའི་ལོ་རྒྱུས་མེད།  སྒ་འཛོམ་ཉགཆོད་རྟེན་ནི་སྤྱི་ལོ་༡༠༣༠ལོར་བཞེངས་པར་ནང་ཆེན་རྒྱལ་རབས་སུ་གསུངས་ཡོད་དེ། དེ་ལས།“རབས་ལོ་༥༠༢༥། ཕྱི་ལོ༡༠༣༠། ལྕགས་ཕོ་རྟ༤། པཎ་ཆེན་སྨྲྀ་ཏིས་ཁམས་སྟོད་ལྷ་སྒྲར་འཛོམ་ཉག་མཆོད་རྟེན་དཔལ་གྱི་ལྷུན་པོ་བཞེངས།”ཞེས་སུ་བཀོད་ཡོད་པ་དང་། སྨྲྀ་ཏིའི་དགོན་ཤུལ་དུ་བཞེངས་པའི་འབའ་ཡུལ་པོ་ཏ་ལའི་པར་རིས་ཀྱི་འོག་ཏུ་སྤྱི་ལོ༡༠༢༩ནས་སྤྱི་ལོ་༡༠༡༢ཞེས་པའི་ལོ་ཚིགས་ཤིག་བྲིས་ཡོད། འབའ་ཡུལ་པོ་ཏ་ལའི་ལོ་ཚིགས་དེ་ལ་གཞི་འཛིན་ས་ཞིག་ཡོད་ངེས་མོད། ལོ་རྒྱུས་ཡིག་ཆ་དག་ལ་བལྟས་ཚེ་པཎ་ཆེན་སྨྲྀ་ཏི་དེའི་སྔོན་ནས་ཁམས་འདན་ཁོག་ཏུ་ཕེབས་ཏེ་འགྲོ་དོན་མཛད་བཞིན་པ་འདྲ་བས་དཔྱད་པར་རིགས།

࿐མཁས་བཙུན་བཟང་གསུམ་གྱི་སྐྱེས་མཆོག་དམ་པ་ཨ་མཆོག་པཎྜི་ཏས་མཛད་པའི་ཤེས་རབ་སྙིང་པོའི་ཚིག་འགྲེལ་བྱ་རྒོད་ཕུང་པོའི་རི་རྩེའི་རྟེན་འབྱུང་གི་སྒྲ་དབྱངས། ༼༢༠༢༢-༡/༡༥༽ [鲜花][鲜花][鲜花][心][心][心]

བརྒྱུད་པ་ཁུང་དག་ནཱ་རོ་མེ་ཏྲིར་ཐུག །
བླ་མ་འགྲན་བྲལ་མན་ངག་ལག་ལེན་ཚང་། །
སློབ་མ་བུ་རྒོད་ཚེ་གཅིག་སངས་རྒྱས་ཐོབ། །
དུས་ཚོད་གལ་ཆེ་འདས་དུས་མཆོད་པའི་ཉིན། །

བཀའ་བརྒྱུད་པའི་གྲལ་མཐར་འཛིན་པ་རིག་པའི་ལང་ཚོས། ༢༥༦༠/༡/༡༤ཉིན།