#微博[超话]# ༄༅།།མདང་ནུབ་བདག་གི་རེ་བ་འདི་ལ་དོན་གྱི་འབྲས་བུ་སྨིན་མ་སོང་བའི་རྐྱེན་གྱིས་དེ་རིང་ཞོགས་པ་སླར་ཡང་ཕུལ་བ་ཞིག་པས་འདི་དོན་མཁྱེན་མཁན་ཡོད་ན་ལན་ཞིག་ཡོད་པ་ཞུའོ།།

༄༅། །ལྷ་སྲས་དགྲ་ལྷའི་ཚེམས་ལ་མངོན་པར་བསྟོད་པ།

རྩོམ་པ་པོ།：གཅོད་པ་དོན་གྲུབ། 

སྐུ་གཟུགས་མཚན་དཔེའི་འོད་ཟེར་འབུམ་གྱིས་སྤྲས།།
གསུང་རབ་བདུད་རྩིས་འགྲོ་བའི་སྡིག་སྒྲིབ་བཅོམ།།
ཐུགས་རྒྱུད་བཟང་བོས་ཉམ་ཆུང་མཐའ་ནས་བསྐྱངས།།
སྐྱབས་གནས་གེ་སར་ནོར་བུར་སྙིང་ནས་འདུད།།
ཁམས་གསུམ་བདེ་ལ་བཀོད་པའི་འཕྲིན་ལས་སྤེལ།།
མགོ་ནག་བོད་ལ་ཕན་བདེའི་དངོས་གྲུབ་བསྩལ།།
མཆོག་ལ་རིགས་སྲས་དངོས་སུ་མ་བལྟམས་ཀྱང་།།
སྐུ་ཚ་དགྲ་ལྷ་རང་རྒྱུད་བུ་ལས་ལྷག །
གོང་མ་ལྷ་ཡི་ལུང་བསྟན་གནང་པ་བཞིན།།
ཁོང་གི་རླབས་ཆེན་མཛད་འཕྲིན་མཐར་རྫོགས་དུས།།
གླིང་དཀར་སྟོད་ཀྱི་མི་དབང་རྒྱལ་པོའི་འགན།།
ལྷ་སྲས་དགྲ་ལྷར་སྤྲད་ནས་ཞིང་ལ་གཤེགས།།
གླིང་གི་ཐོག་མའི་རིག་དངོས་རྩ་ཆེན་རྣམས།།
གཟུགས་འཛིན་ལམ་དུ་མཐོང་རྒྱུ་ཡོད་མོད་ཀྱང་།།
གནའ་བོའི་དཔའ་རྟུལ་དམ་པའི་རིང་བསྲེལ་དག །
མཐོང་བ་ཉིན་མོའི་སྐར་མ་བཞིན་དུ་དཀོན། །
ད་ལམ་གླིང་རྗེ་གེ་སར་འཁྲུངས་པའི་གནས།།
ཨ་ཕྱུག་རྩྭ་ཐང་གསེར་གཞོང་རིང་མོ་ལས།།
གླིང་ཚང་རྒྱལ་པོའི་ཁྱིམ་བརྒྱུད་ནོར་བུ་མཆོག །
ལྷ་སྲས་དགྲ་ལྷའི་ཚེམས་བཟང་མཐོང་བ་རྨད།།
གླིང་ཚང་རྒྱལ་རྒྱུད་དགྲ་ལྷའི་གདུང་རྒྱུད་དངོས།།
རྒྱལ་རབས་ཞེ་དགུ་ཡིན་ཞེས་དེབ་ཐེར་ལས།།
གསུང་བ་དན་རྟགས་ལྷུན་པོ་བཞིན་དུ་གནས།།
སྟོབས་ལྡན་སུས་ཀྱང་བཟློག་འདོད་ངལ་བའི་རྒྱུ།།
ཚབ་ཚ་དགོན་པའི་ཉེ་འདབས་མི་རིང་སར།།
གེ་སར་ལྷ་ཁང་བཞེངས་པའི་ནང་རྟེན་མཆོག།
ལྷ་སྲས་དགྲ་ལྷའི་གོ་མཚོན་རིན་ཐང་ཅན།།
མཇལ་བའི་ལེགས་བྱས་སྐྱེ་འགྲོ་ཀུན་ལ་སྨིན།།
རྒྱལ་རབས་ཁུངས་བཙུན་ཀུན་གསལ་མེ་ལོང་ལས།།
མཁས་དབང་དམ་པའི་གསུང་གི་ཉིང་བཅུད་དུ།།
དགྲ་ལྷའི་ཚེམས་བཟང་ངོས་འཛིན་མཛད་པ་འདི།།
དཔྱད་བརྗོད་ལུང་གི་རྒྱབ་རི་དཔང་རྟགས་ལགས།།
ཚེམས་མཆོག་སྟོད་ན་རྡོ་རྗེ་འཇིགས་བྱེད་ཀྱི།།
ཞལ་གདོང་ངོ་མའི་དབྱིབས་དང་མཚུངས་པ་མངོན།།
ཚེམས་བཟང་ཁོང་དུ་ཆོས་སྐུ་རང་བྱོན་འཚེར།།
སྐྱེ་བོ་ཀུན་ལ་གཟི་བྱིན་གཞལ་མེད་སྦྱིན།།
གླིང་ཚང་ཆོས་རྒྱལ་ཕུན་ཚོགས་དགེ་ལེགས་མཆོག །
རྒྱལ་རབས་རིམ་བྱོན་ཐུགས་རྟེན་གཡང་སྒམ་དུ།།
ཚེམས་བཟང་རིན་ཆེན་ནོར་ལྟར་ཉར་མཛད་པ།།
ཕྱོགས་ཀྱི་སྒེག་མོའི་རྣ་བའི་རྒྱན་དུ་གྱུར།།
ལོ་རྒྱུས་རིན་ཐང་ལྡན་པའི་ཚེམས་མཆོག་ཉིད།།
ཕྱི་ནང་གསང་གསུམ་བར་ཆད་ཐོར་རླུང་གིས།།
མཚམས་མེད་གདུངས་ཀྱང་ཨ་ཕྱུག་གནས་བཟང་འདིར།།
སྐད་ཅིག་ཙམ་ཀྱང་རྒྱང་རིང་གྱེས་མ་མྱོང་།།
གླིང་ཚང་རྒྱལ་པོའི་རྒྱལ་རབས་གྲངས་མང་རིང་།།
ཐོད་པའི་མིག་བཞིན་གཅེས་འཛིན་གནང་བ་ཡི།།
ཚེམས་བཟང་འཕྲོ་བརླག་མ་ཤོར་བསྣམས་པ་མཚར།།
སྐྱེས་བུ་དམ་པའི་མཛད་རྗེས་མངོན་པར་བསྟོད།།
ངོ་མཚར་སྟོང་གིས་སྤྲས་པའི་རྫ་ཆུ་ཁར།།
སྐྱིད་སོས་ཡག་གི་ཁ་མདོ་འབོད་པའི་ཡུལ།།
ཨ་ཕྱུག་སྟོབས་ལྡན་ལགས་ཀྱིས་ཉར་བའི་ཚེམས།།
བྱིན་རླབས་ཉིན་བྱེད་འོད་སྟོང་འཕྲོ་བར་སྨོན།།

ཞེས2022ལོའི་ཟླ4བའིཚེས16ཉིན་གནའ་མཁར་ཟི་ལིང་དུ་ཐོལ་བྱུང་དུ་སྦྱར་བ་དགེའོ།།

༄༅།།《ར་ལོ》ཞེས་པའི་བརྙན་ཐུང་འདིར་བལྟས་མ་ཐག་ཏུ་བརྩམས་སྒྲུང་ལས་སྒྱུ་རྩལ་གྱིས་ཁ་སྣོན་དང་བཟོ་བཅོས་གང་ཡང་བྱས་མེད་པར་སྙམ།སྤྱིར་གློག་བརྙན་གྱིས་བརྩམས་སྒྲུང་གི་བདེན་དགེ་མཛེས་གསུམ་སྔར་བས་གཟུགས་སྣང་ཅན་དུ་བསྒྱུར་ཏེ་རྩོམ་རིག་བརྩམས་ཆོས་ཀྱི་རིན་ཐང་སྔར་བས་ཇེ་མཐོར་གཏོང་བ་ཞིག་ཡིན་མོད། འདིར་བརྩམས་སྒྲུང་གི་མཛེས་པ་གཞན་ཞིག་པར་ངོས་ཀྱིས་སྔོག་འདོན་བྱས་ཡོད་པའི་རྗེས་ཤུལ་གང་ཡང་རྙེད་མི་ཐུབ།ཡིན་ཡང་།བརྙན་ཐུང་འདིའི་ཁྲོད་ཀྱི་མི་སྣ་ཆེ་གེ་མོའི་སྣང་བརྙན་གནད་དུ་འཁེལ་ཞིང་འཁྲབ་རྩལ་ཡང་གང་འཚམ་གྱིས་ཡག་པོ་འདུག་པར་མ་ཟད།རང་རེའི་འཚོ་གནས་ཁོར་ཡུག་གི་གདུག་རྩུབ་ཀྱི་ངོ་གདོང་དམར་ཟིང་ངེ་དེའང་བརྙན་མིག་རེ་རེའི་བར་གསེང་ནས་མཐོང་ཡོང་གིན་འདུག