࿐སངས་རྒྱས་ཀུན་འདུས་གུ་རུ་རིན་པོ་ཆེ།། ཨོ་རྒྱན་པདྨ་འབྱུང་གནས་ལ་གསོལ་བ་འདེབས།། མི་མཐུན་འགལ་རྐྱེན་བར་ཆད་ཞི་བ་དང་།། བསམ་པ་ལྷུན་གྱིས་འགྲུབ་པར་བྱིན་གྱིས་རློབས།། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། —ཀུན་མཁྱེན་མི་ཕམ་རྒྱ་མཚོ།[合十]

ཁོ་བོ་ནི་ལོ་འདི་ཚོར་དེབ་ཐེར་སྔོན་པོ་དང་འགྲོགས་ནས་ཡོང་བ་ཡིན་པས། དེབ་ཐེར་སྔོན་པོ་ནི་བཀླག་མི་ཚར་བའི་ཤེས་བྱའི་བང་མཛོད་ཅིག་ཡིན་པ་ངས་མགྲིན་པ་གཟེངས་སུ་བསྟོད་ནས་བཤད་འདོད་བྱུང་། བོད་ཀྱི་ལོ་རྒྱུས་ལ་ལྟ་ཀློག་ཅུང་ཟད་བགྱིས་མྱོང་མཁན་ཞིག་ཡིན་ན་དེབ་ཐེར་སྔོན་པོ་ངོ་ཤེས་ཚོད་ཡིན་པས། དེབ་ཐེར་སྔོན་པོ་ལོ་རྒྱུས་ཚད་ལྡན་ཡིན་མིན་གྱི་སྐོར་ནས་སུ་ལའང་ངོ་སྤྲོད་བྱེད་དགོས་རྒྱུ་མ་རེད་དྲན། ལོ་རྒྱུས་ལ་ལྟ་སྐབས་ལོ་ཚིགས་གཙོ་ཆེ་བ་ནི་ལོ་རྒྱུས་ཤེས་མཁན་ཞིག་ཡིན་ན་གོ་སླ་བས་ལོ་ཚིགས་གཏན་ནས་འཕྱུགས་ན་ལོ་རྒྱུས་མ་ཤེས་པའི་རྟགས་མཚན་མངོན་པ་ཡིན། འགའ་ཞིག་གིས་དེབ་སྔོན་གྱི་དགོངས་པ་དངོས་གང་ཡིན་མ་གོ་པ་དང་གཞན་གྱི་འདོད་པ་བཀོད་པ་རྣམས་དེབ་སྔོན་གྱི་རང་ལུགས་སུ་བསྒྲུབས་ནས་ལོ་ཚིགས་ཁ་ཤས་ཀྱིས་འཁྲུག་པ་རྒྱག་བཞིན་ཡོད་པས། འཁྲུལ་སེལ་ཞིག་གི་ཆེད་དུ་ཁོ་བོས་དེབ་སྔོན་བཀླགས་པའི་བརྗེད་ཐོ་ཞིག་ཁྱེད་རྣམ་པར་ཞུ་འདོད་བྱུང་། འདི་ནི་དེབ་སྔོན་རང་ལ་ཞིབ་ལྟ་བྱས་ནས་རང་གིས་གྲུབ་དོན་ཡི་གེའི་བསྟར་ལ་བརྒྱུས་པ་ལས་ཕོ་ཚོད་ཀྱི་སྐད་ཆ་མ་ཡིན་ལ་བཤད་ཀྱང་མི་ཕོད། ཡིན་ན་ཡང་། ཁོ་བོས་བཤད་པའི་འཁྲུལ་སེལ་འདི་ལའང་ནོར་འཕྱུག་བྱུང་ཡོད་སྲིད་པས། དཔྱོད་ལྡན་རྣམས་ཀྱིས་ལུང་རིགས་ཀྱི་སྐྱེས་མང་ཙམ་གནང་རྒྱུར་རེ་བ་ཤིན་ཏུ་ཆེའོ།།

འགོས་ལོ་གཞོན་ནུ་དཔལ་གྱིས་ལོ་རྒྱུས་འཆད་སྐབས་ལོ་ཚིགས་ཀྱི་འཛེར་མ་ཞིབ་ཅིང་ཕྲ་བའི་སྒོ་ནས་བརྡབས་ཏེ་སོ་སོའི་དགོངས་པ་གང་ཡིན་འགལ་མེད་དུ་བསྒྲུབས་ཡོད་པས། ད་བར་ཆེས་སྐད་གྲགས་ཆེ་བའི་ལོ་རྒྱུས་“དེབ་ཐེར་སྔོན་པོ”་ཞེས་པ་གླེགས་བམ་ཆེན་པོ་གཉིས་དང་། དུམ་ཚན་ཆེ་བ་བཅོ་ལྔ། སྐབས་མི་འདྲ་བ་བརྒྱ་དང་བཅོ་བརྒྱད་ཀྱིས་གྲུབ་པ་ཞིག་ཀུན་གྱི་སྤྱན་ལམ་དུ་ཡོད་པ་འདི་རེད། དེབ་སྔོན་གྱི་དགོངས་པ་དངོས་གང་ཡིན་དེབ་ཐེར་སྔོན་པོ་རང་དུ་གསལ་རྐྱང་བཀོད་ཡོད་ལ། ཡོངས་གྲགས་སམ་ཁུངས་ཐུབ་དང་བསྡུར་ན་དེབ་སྔོན་གྱི་ལུགས་ལ་སྲོང་བཙན་སྒམ་པོ་ནས་འུ་དུམ་བཙན་པོས་ཆོས་མ་བསྣུབས་བར་དུ་རྒྱབ་རབས་དག་བསྟུད་མར་ལོ་དྲུག་ཅུ་སྐོར་གཅིག་མར་ནུད་ཡོད། དེ་ཡང་ཏུན་ཧོང་ཡིག་ཆ་དར་ཁྱབ་མ་ཕྱིན་པའི་སྔོན་དུ་སྲོང་བཙན་དགུང་ལོ་བརྒྱད་ཅུ་ལྷག་བཞུགས་པར་སྔོན་གྱི་ཡིག་ཆ་ཕལ་ཆེ་ཤོས་ཀྱིས་ཁས་ལེན་པས། འགོས་ལོས་སྲོང་བཙན་ས་གླང་སྔ་ཕྱི་གཉིས་ལས་ཕྱི་མ་༼༦༢༩༽གི་ལོ་ལ་འཁྲུངས་པར་འདོད་པའི་དབང་གིས། དྲུག་ཅུ་སྐོར་གཅིག་དེ་ལྟར་མར་ནུད་སོང་པ་ཡིན།

རྗེ་ཡེ་བཟང་རྩེ་བ་ལགས་ཀྱིས་བརྩམས་པའི་དེབ་སྔོན་དུ་ནང་འགལ་གྱི་ཁུར་པོ་ཡོད་ཟེར་མཁན་རྣམས་དང་། ངོ་བསྟོད་ཀྱི་ཅལ་བུ་སྒྲོག་མཁན་རེད་གསུང་མཁན་སོགས་ཀྱིས། དེབ་སྔོན་དུ་བཀོད་པའི་ཁ་གསལ་ཞིང་གོ་བདེ་བའི་ལོ་ཚིགས་ཀྱི་གཟི་བྱིན་མ་བཟོད་པ་དང་། དེབ་ཐེར་སྔོན་པོ་ནི་ཆོས་རིགས་ལོ་རྒྱུས་ཀུན་ལས་ཁུངས་བཙུན་ཞིང་ཁ་ཚང་བ་བཅས་ལ་ཅོ་འདྲི་བྱེད་པའི་ཚུལ་ཙམ་ལས། གནད་དུ་ཕིགས་པའི་དགག་བཞག་གི་སྤྲོས་པ་ནི་ད་སྔོན་བྱུང་མི་འདུག་ཅིང་། མ་འོངས་པ་ལའང་དེབ་སྔོན་རང་གིས་ལོ་ཚིགས་བསྒྲིགས་པ་ལྟར་སྒྲིག་བཞིན་སོང་ན་སུས་ཀྱང་བསྒུལ་མི་ནུས།

____གཏེར་ཆུ།

#སྙན་ཚིག་བརྒྱ་རྩ་མ།#

8
ཉི་མ་དང་ཟླ་བ་གཉིས་ཀ
ནམ་མཁར་ཡོད་ཀྱང
ཚེ་གང་ལག་འཇུ་ཐེངས་གཅིག་བྱ་མ་མྱོང
རྒྱང་རིང་གི་མི
ཁྱེད་དང་ང་རང་གཉིས་ཀས
ས་ཐོག་འདི་ནས
ཉི་ཟླ་ལ་ལད་མོ་མི་བྱ་ཨང