ཆགས་སྡང་གི་བྲིས་རིས་བཤམས་སའི་མི་ཡུལ་འདིར་ཆགས་སྡང་གི་བྲིས་རིས་བཤམས་མཁན་མང་ནའང་། དེ་ཉིད་ཇི་ལྟར་བཤམ་ན་འགྲིག་མིན་ལ་སྔ་འདང་དང་ཕྱི་འདང་རྒྱག་མཁན་གྱི་མི་ནི་མང་མང་ནང་གི་ཉུང་ཉུང་རེད།

ཉེ་སྔོན་བྱུང་བའི་སློབ་ཁྲིད་སྐོར་གྱི་བརྙན་དུམ་དེ་ལ་སྡིགས་མོ་བྱ་མཁན་དང་གུ་རེ་བཤད་མཁན། དཔྱད་གཏམ་འབྲི་མཁན་སོགས་ཅུང་ཟད་མང་ཙམ་བྱུང་ཡང་། དེ་དག་ལས་ཤ་ཚ་སྙིང་ཉེ་ཅན་གྱི་མི་ནི་གཅིག་ཀྱང་བྱུང་མ་སོང་བར་ཐམས་ཅད་རང་གི་གྲགས་པ་འཚོལ་མཁན་གྱི་རིགས་ཤ་སྟག་གོ །

ང་ཡི་ཉིན་ཐོ།

ང་ཡི་ཉིན་ཐོ་ནང་དུ
ཆ་རྒྱུས་མེད་པའི་མིག་ཆུ་ཐིགས་པ་ཞིག་ལྷུང
མིག་ཆུ་དེས་བདག་གི་སེམས་པ་
རྡོ་བ་ཞིག་དང་འདྲ་བར་ཤིན་ཏུ་འཁྱག་པར་གཏོང

ང་ཡི་ཉིན་ཐོ་ནང་དུ
ཁེར་རྐྱང་གི་རྩྭ་རྐང་ཐུར་ཞིག་སྐྱེས
དེ་ནི་དོན་སྙིང་དབུལ་བའི
ལོ་གཅིག་གི་བྱ་གཞག་དང
བདེ་སྡུག་མཚོན་བྱེད་དུ་གྱུར

ང་ཡི་ཉིན་ཐོ་ནང་དུ
མཚན་མོར་བརྒལ་དཀའ་བའི
མུན་ནག་དང་རྨི་ལམ་ལས
ཉིན་མོར་མཐོང་ཐུབ་པའི་འོད་སྣང་དང
འཚོལ་སྙེག་གཞན་ཅི་ཡང་མི་འདུག

ང་ཡི་ཉིན་ཐོ་ནང་གི
འཚོ་བ་ཡོད་ཚད་ནི
ཤིན་ཏུ་འཁྱག
ཤིན་ཏུ་འཁྱག
དེ་ནི་གཞན་གྱིས་ཚོར་མི་དགོས་པར
རང་གི་ལག་ཟུང་རང་གི
བྲང་ཁ་སྦྱར་ན་རྟོགས་ཡོང་

གྲུ་ཆར།

པོ་ཏ་ལ།
འགྱུར་བ་མེད་པའི་དངུལ་ཆུ་ཁྲོ་རྫོང་།
དུང་གི་སྤྱན་རས་གཟིགས་ཀྱིས་བགྲེང་ཕྲེང་བྱུག་ས།
བྱུ་རུའི་ཚེ་དཔག་མེད་ཀྱིས་ཏིང་འཛིན་སྒོམ་ས།
ལྕགས་ཀྱི་ཕྱག་ན་རྡོ་རྗེས་མཐུ་སྟོབས་ངོམ་ས།
ཨོ་ཧོ་ཧོ། ང་ཡི་ཡབ་ཆེན་ཚོའི་བཙན་རྫོང་སྒོ་མེད།
ཁྱོད་ནི་འཛམ་གླིང་ན་འཕགས་པའི་གསེར་གྱི་བདུད་འདུལ་མཆོད་རྟེན་ཡིན།