[月亮] ཟླ་བའི་ཉེ་སར་སོང་བའི་སེམས་པ་ཞིག། ཡར་

首页发布

[月亮]
ཟླ་བའི་ཉེ་སར་སོང་བའི་སེམས་པ་ཞིག།
ཡར་ཚེས་བཅོ་ལྔའི་མཚན་ལྗོངས་རི་རྩེ་ནས།།
ཐག་རིང་མི་ཚེའི་འདུན་མའི་མེ་ཏོག་དེར།།

ཤ་གསེང་རུས་པའི་གསེབ་ནས་སྦྱིན་དགོས་ཐུག།

རླུང་བུ་གཡུག་ཐག་མ་ཆོད་མཚན་མོ་འདིར།།
ཟླ་འོད་འཕྲོ་ལ་མ་མོས་མཚན་མོ་འདིར།།
མི་ཚོགས་ལང་ལོང་གཡོ་བའི་ཟུར་ཁ་ནས།།
གྲང་ངར་མ་བཟོད་འདར་སིག་ལན་གཅིག་ཤོར།།

དེ་དགོང་གི་ཟླ་འཛིན་འདི་ནི་ལོ་ངོ་སྟོང་ནང་ཐེངས་གཅིག་ལ་འཕྲད་པའི་ཟླ་བས་མི་ཡུལ་ལ་གནང་བའི་སྒེག་ཉམས་ངོ་མཚར་ཅན་ཡིན་ལ།འདི་ནི་རང་བྱུང་འཇིག་རྟེན་ཁམས་ལས་ཉི་ཟླ་དང་སའི་གོ་ལའི་འཁོར་བསྐྱོད་ལས་འབྱུང་བའི་རྒྱུན་ལྡན་གྱི་རྣམ་པ་ཙམ་ཡིན་པ་ལས་དགོད་བྲོ་བའི་རྨོངས་པ་ལོག་བཤད་ལ་དགའ་བ་དག་གིས་རྨོངས་བཤད་དང་རྨོངས་ལས་བྱེད་དགོས་པ་དང་འཇིག་སྣང་སྐྱེས་དགོས་པ་ཞིག་མིན་ནོ།

ཆུང་དུས་ཉི་ཟླ་གཟའ་སྐར་ཀྱི་རྒྱུ་བ་ལ་རྒྱུས་མངའ་གང་ཡང་མེད། ཁྱིམ་མི་ཚོས་ཀྱང་ཉི་ཟླ་སྐར་གསུམ་གྱི་འཁོར་སྐྱོན་གྱི་ཆོས་ཉིད་ལ་འགྲེལ་བ་བརྒྱག་མི་ཤེས། ཉི་འཛིན་དང་ཟླ་འཛིན་བྱུང་ན་ཡུལ་མི་ཚོས་ཉི་མ་ཚ་ཡི་འདུག ཟླ་བ་ཚ་ཡི་འདུག་ཟེར། ཡང་ན་ཉི་མ་དང་ཟླ་བ་གཟའ་ཡིས་ཟ་བཞིན་འདུག་ཟེར། དེ་ག་ཙམ་ལས་ཁོ་ཚོང་ཡང་འགྲེལ་བཤད་གསལ་བོ་ཞིག་བྱེད་རྒྱུ་མེད། ཡུལ་མི་ཚོས་དངོས་ནས་གཟའ་ཞེས་པའི་སྲོག་ཆགས་ཆེན་པོ་ཞིག་བློས་བསླངས་བྱས་ཡོད་ཀྱང་སྲིད།

དེ་ནི་དབྱར་ཁའི་མཚན་མོ་ཞིག་ཡིན། ཚང་མས་བཏགས་ར་བྱས་ནས་ཁྱིམ་དུ་སོང་མ་ཐག་ཡིན། གློ་བུར་དུ་རུ་བ་དག་ལ་དངངས་འཚབ་ལངས་ནས་ཚང་མ་གུར་གྱི་སྒོ་ཁར་ཡོངས་ནས་ཁ་རྒན་གཞོན། སྐྱེས་ཕོ་མོ་མེད་པར་ཁ་ཟླ་བར་འཁོར་ནས་ཀི་འདབས། ཁྱི་རྐོ་རྡུང་། བོའུ་འཕངས། མ་ཎི་ཟློས། གསོལ་བཏབ། དུས་ཚོད་གཅིག་ལྷག་ལ་ཀི་ལྡི་བྱས་རྗེས། ཟླ་བ་ཕྱིར་ཇེ་གསལ་དུ་སོང་བ་དང་ཆབས་ཅིག་ཚང་མས་སྤྱང་ཀིའི་ཁ་ནས་ལུ་གུ་ཕྱིར་ལོན་སོང་བ་བཞིན་སེམས་ཁ་བདེ་ལ་བབས། རང་གི་ཀི་ལྡིར་ལ་འབྲས་བུ་ཐོབ་སོང་བརླམས།

ཡུལ་མི་ཚོས་ཀི་ལྡིར་བྱས་པས་ལན་ནམ། གང་ལྟར་དངོས་ནས་འཇིགས་སུ་རུང་ཞིག་ཡིན། གནམ་ཁ་ན་སྤྲིན་པ་བྱིའུ་མགོ་ཙམ་ཞིག་མེད་ས་ནས་ཟླ་བ་གྲིབ་མས་སྒྲིབ་འགྲོ། ཨ་མས་ལེགས་ཀྱིས་དེ་ལ་ཟླ་བ་གཟའ་ཡིིས་ཟས་ཟེར། གཟའ་ཞེས་པ་ཅི་རེད་དྲིས་ན། གཟའ་ཞེས་པ་མཁའ་དབྱིངས་ན་རྒྱུ་བའི་ཉི་ཟླ་སོགས་ཁྱུར་མིད་བྱེད་ཐུབ་པའི་སྲོག་ཆགས་ཆེན་པོ་ཞིག་ཡིན་པར་རློམ།