དམིགས་མེད་བརྩེ་བའི་གཏེར་ཆེན་སྤྱན་རས་གཟིགས།།
དྲི་མེད་མཁྱེན་པའི་དབང་བོ་འཇམ་པའི་དབྱངས།།
བདུད་དཔུང་མ་ལུས་འཇོམས་མཛད་གསང་བའི་བདག།
གངས་ཅན་མཁས་པའི་གཙུག་རྒྱན་ཙོང་ཁ་བ།།
བློ་བཟང་གྲགས་པའི་ཞབས་ལ་གསོལ་བ་འདེབས།།
ཚེ་རབས་ཀུན་ཏུ་རྒྱལ་བ་ཙོང་ཁ་བས།།
ཐེག་མཆོག་བཤེས་གཉེན་དངོས་སུ་མཛད་པའི་མཐུས།།
རྒྱལ་བས་བསྔགས་པའི་ལམ་བཟང་དེ་ཉིད་ལས།།
སྐད་ཅིག་ཙམ་ཡང་ལྡོག་པར་མ་གྱུར་ཅིག།
ང་ཡི་བླ་མ་བློ་བཟང་གྲགས་པ་དེ། །
དགའ་ལྡན་གནས་སམ་བདེ་བ་ཅན་ལ་སོགས། །
དག་པའི་ཞིང་ཁམས་གང་ན་བཞུགས་ཀྱང་རུང་། །
བདག་སོགས་འཁོར་གྱི་ཐོག་མར་སྐྱེ་བར་ཤོག།

#宗喀巴大师#
༧རྗེ་རིན་པོ་ཆེའི་ལོ་ཚིགས་རབ་གསལ།  
སྤྱི་ལོ་1357 (དགུང་ལོ 1  ) རྗེ་བླ་མ་ཙོང་ཁའི་ཡུལ་དུ་སྐུ་འཁྲུངས།
སྤྱི་ལོ1359 (དགུང་ལོ3 ) ཀརྨ་པའི་མདུན་ནས་དགེ་བསྙེན་བསྒྲུབས།
སྤྱི་ལོ1363 (དགུང་ལོ7 ) ཆོས་རྗེ་དོན་རིན་པའི་མདུན་ནས་དགེ་ཚུལ་བསྒྲུབས།
སྤྱི་ལོ1372 (དགུང་ལོ16 ) དབུས་སུ་ཕེབས།
སྤྱི་ལོ1373 (དགུང་ལོ17 )  དབུས་སུ་འབྱོར།
སྤྱི་ལོ1375 (དགུང་ལོ19 ) དབུས་སུ་ཐོག་མའི་གྲྭ་སྐོར་མཛད།
སྤྱི་ལོ1392 (དགུང་ལོ36 ) འོལ་ཁར་བྱ་བྲལ་ལ་ཕེབས།
སྤྱི་ལོ1393 (དགུང་ལོ38 ) འོལ་ཁར་རྫིང་ཕྱི་བྱམས་པ་ཞིག་གསོ་མཛད། མཛད་ཆེན-1
སྤྱི་ལོ1396 (དགུང་ལོ40 )  རྒྱབ་ཚབ་རྗེ་ལ་ཐོག་མ་མཇལ། གཉལ་གྱི་ལུང་ར་ཚུགས། མཛད་ཆེན།-2
སྤྱི་ལོ1402 (དགུང་ལོ46 )  རྭ་སྒྲེང་དུ་ལམ་རིམ་ཆེན་མོ་དང་། ལམ་མཆོག་སྒོ་འབྱེད། ལམ་རིམ་ཆུང་ངུ་བརྩམས།
སྤྱི་ལོ1405 (དགུང་ལོ49 ) འོལ་ཁ་བྱམས་པ་གླིང་དུ། སྔགས་རིམ་ཆེན་མོ་མཛད།
སྤྱི་ལོ1409 (དགུང་ལོ53 )  དགའ་ལྡན་དགོན་ཕྱག་བཏབ། ལྷ་ལྡན་སྨོན་ལམ་ཆེན་མོ་དབུ་འཛུགས། མཛད་ཆེན།-3
སྤྱི་ལོ1415 (དགུང་ལོ59 )  ལམ་རིམ་འབྲིང་པོ་མཛད། དགའ་ལྡན་སྒྲུབ་མཆོད་བཙུགས། མཛད་ཆེན-4
སྤྱི་ལོ1419 (དགུང་ལོ63 )  རྗེ་སྐུ་ཞི་བར་བཤེགས།

ལེགས་བཤད་གསེར་གྱི་ཕྲེང་བ་མ་བརྩམས་ན།
སྦས་དོན་པདྨོའི་དགའ་ཚལ་གང་ནས་བཞད།།

ཊཱིཀ་ཆེན་དགོངས་པ་རབ་གསལ་མ་བརྩམས་ན།
དཔལ་ལྡན་ཟླ་བའི་བཞེད་དགོངས་སུ་ཡིས་རྙེད།།

དྲང་ངེས་ལེགས་བཤད་སྙིང་པོ་མ་བརྩམས་ན།
དབུ་སེམས་ལྟ་བའི་ཁྱད་པར་གང་གིས་འབྱེད།།

ཊཱིཀ་ཆེན་རིགས་པའི་རྒྱ་མཚོ་མ་བརྩམས་ན།།
སྤྲོས་བྲལ་དབུ་མའི་རྒྱ་མཚོ་སུ་ཡིས་འཐུང་།།

ལམ་རིམ་ལྷག་མཐོང་ཆེ་ཆུང་མ་བརྩམས་ན།།
ཧྭ་ཤང་ལྟ་བའི་མུན་པ་གང་གིས་བསལ།།

རིམ་ལྔ་གསལ་བའི་སྒྲོན་མེ་མ་བརྩམས་ན།
སྒྱུ་ལུས་ཉི་མའི་འོད་སྣང་གང་ནས་ཤར།

སྦས་དོན་་ཀུན་གསལ་ཟླ་བ་མ་ཤར་ན།
འོད་གསལ་ཀུན་ཏའི་མཚོ་མོ་ཇི་ལྟར་རྒྱས།།

ཟབ་དོན་སྔགས་རིམ་ཆེན་མོ་མ་བརྩམས་ན།
མདོ་སྔགས་ཟུང་འབྲེལ་ལྟ་བ་སུ་ཡིས་ཤེས།།

མཁས་པའི་གཙུག་རྒྱན་ཁྱེད་འདྲ་མ་བྱོན་ན།།
ངེས་དོན་ཆོས་པ་རྣམ་དག་གང་ནས་ཡོང་།།