དཀའ་ནི་དཀའ་གི་དཀའ་ཡང་ལོས་དཀའ་ན།།
སྔ་འགྱུར་རྙིང་མའི་ཕ་ཆོས་མཐུན་མིན་རེད།
ཟབ་ནི་ཟབ་གི་ཟབ་ཀྱང་ལོས་ཟབ་ན།།
ནང་རྒྱུད་སྡེ་གསུམ་དགོངས་པའི་ཟབ་བཅུད་རེད།།

གསང་ཆེན་མེ་ཏོག་ཕུག་ཅེས་བྲག་སྐྱིབ་ན།།
འཚོ་བ་གྱི་ནས་བླ་མ་དྲན་པ་ལས།།
སྦྱང་བ་མེད་ཀྱང་སྦྱང་འབྲས་མཐར་ཕྱིན་པའི།།
འཇིགས་མེད་གླིང་པ་ངོ་མ་ངོ་མཚར་རེད།།

བསྔོ་བ་སྨོན་ལམ།
འདི་ལྟར་བགྱིས་པའི་རྣམ་དཀར་དགེ་བའི་མཐུས།།
བདག་ལ་དྲིན་གྱིས་བསྐྱངས་བའི་ཕ་མ་རྣམས།།
སེམས་བསྐྱེད་ཞུ་བའི་བླ་མ་སློབ་དཔོན་དང་།།
དམ་ཚིག་གཅིག་གི་རྡོ་རྗེ་སྤུན་གྲོགས་རྣམས།།
རྒྱུ་ཟས་འབྲེལ་བ་ཡོད་པའི་མི་རྣམས་དང་།།
ཞོན་ཁལ་སྲོག་གཅོད་འོ་ཞོ་འཐུང་བ་དང་།།
ཤ་ཁྲག་ཟོས་པའི་དུད་འགྲོ་མ་ལུས་པ།།
མྱུར་དུ་སངས་རྒྱས་གོ་འཕང་ཐོབ་པར་ཤོག །

ཡིད་འོང་སྐར་ཚོགས་འཕོས་འདྲ་ཡི་ནན་ཅིན་གྲོང་ནས།།
དུངས་སེམས་བུ་མོའི་ལག་རྩལ་འཕྲུལ་ལམ་བརྒྱུད་ནས།།
ཕྱི་ཐག་རིང་བའི་གྲོགས་ཀྱི་སྤྱན་ལམ་དུ་འབྱོར་ཚེ།།
སེམས་ཀྱི་བརྩེ་དུང་འདབ་མ་དབང་མེད་དུ་གྲོལ་སོང་།།
འཇམ་དབྱངས་ཉི་མས།