དཔེ་ཀློག་གི་ཕན་ནུས་ཆེན་པོ་དྲུག

གཅིག རིག་གནས་དང་ཤེས་བྱ་མང་པོ་ཤེས་ཐུབ་པ།གཉིས། ཡང་དག་པའི་ལྟ་བ་རྒྱུད་ལ་འབྱོར་སྲིད། གསུམ། ཤེས་རྟོགས་མཐོ་བའི་མི་ཞིག་བྱ་ཐུབ། བཞི། མིའི་ལས་དབང་ལ་བསྒྱུར་བཀོད་བྱེད་ནུས་པ། ལྔ། དམིགས་ཡུལ་དང་ཕུགས་འདུན་གཅིག་པའི་གྲོགས་མང་པོ་བསྒྲིགས་ཐུབ། དྲུག སེམས་རྒྱ་དང་མིག་རྒྱང་སྐྱེད་ནུས་པ། ཡོན་ཏན་ཅན་གྱི་མི་དེས་ད་གཟོད་མི་གཞན་ལ་བརྩི་བཀུར་བྱེད་དགོས་པ་ཤེས་ཡོད། མི་གཞན་ལ་བརྩི་བཀུར་བྱེད་པ་དེ་དོན་ངོ་མ་རང་ཉིད་ཀྱི་གཟི་བརྗིད་ངོམ་པ་རེད།

_________རྫོང་སར་མཁྱེན་བརྩེ་རིན་པོ་ཆེས།

ཁུ་ནུ་བླ་མ་བསྟན་འཛིན་རྒྱལ་མཚན་གྱི་རྣམ་ཐར།
༈ ཁུ་ནུ་བླ་མ་བྱང་སེམས་བསྟན་འཛིན་རྒྱལ་མཚན་ནི། རྒྱ་གར་ནུབ་ཕྱོགས་ཁུ་ནུའི་ཡུལ་སུས་རྣམ་ཞེས་པར། ཡབ་ཀ་ལན་པུར་ཞེས་པ་དང༌། ཡུམ་ནོར་སྐྱིད་གཉིས་ཀྱི་སྲས་སུ། རབ་བྱུང་བཅོ་ལྔ་པ་ཤིང་ལུག་༼༡༨༩༥༽ལོར་འཁྲུངས། དགུང་ལོ་བདུན་ལ་ཞང་པོ་བླ་མའི་མདུན་ནས་ཡིག་རིགས་སྦྱང་བརྩོན་གནང༌། བཅོ་ལྔ་ལ་མངའ་རིས་ཆོས་གླིང་གྲྭ་ཚང་དུ་ཞུགས། དེར་ལོ་ཕྱེད་གསུམ་ཙམ་སློབ་གཉེར་མཛད་ནས་བཞུགས། བཅུ་དགུ་ལ་ཐོས་བསམ་དོན་གཉེར་གྱི་ཐུགས་འདུན་དྲག་པོས་བསྐུལ་ཏེ། ཐོག་མར་འབྲས་ལྗོངས་སུ་དགེ་བཤེས་ཨོ་རྒྱན་བསྟན་འཛིན་བསྟེན་ནས། ལོ་གསུམ་ཙམ་ལ་དབྱངས་ཅན་སྒྲ་མདོ་དང་ཙནྡྲ་པ་སོགས་ལེགས་སྦྱར་དང་དག་སྙན་སྐོར་གསན་སྦྱང་གནང༌། བར་སྐབས་ཤིག་ལ་ཝཱ་རཱ་ཎ་སཱིར་པཎྜི་ཏ་དེ་བ་ཎཱ་ར་ཡཎ་ཏྲི་པཱ་ཋཱི་ཞེས་པའི་མདུན་ནས་ཀྱང་སྒྲ་པཱ་ཎི་སོགས་དཔྱིས་ཕྱིན་པར་སྦྱངས། ཆོས་ཕྱིར་དཀའ་སྤྱད་བཟོད་པ་ཆེན་པོའི་སྒོ་ནས་བོད་དུ་བྱོན་ནས། བཀྲས་ལྷུན་དུ་པཎ་ཆེན་ཡོངས་འཛིན་མདུན་དགེ་ཚུལ་བསྒྲུབས་ཤིང༌། ཚད་མ་སོགས་གསན་སྦྱང་མཛད། རིམ་གྱིས་ཁམས་སུ་བྱོན་ནས་ཀཿཐོག་སི་ཏུ་དང༌། ཁྱད་པར་མཁན་ཆེན་གཞན་དགའ་རིན་པོ་ཆེ་བསྟེན་ཏེ། གཞུང་ཆེན་བཅུ་གསུམ་ཕལ་མོ་ཆེའི་བཤད་ཁྲིད། ཡེ་ཤེས་བླ་མ། ཐེག་མཆོག་མཛོད། ཆོས་དབྱིངས་མཛོད་སོགས་ཀྱི་ཟབ་ཁྲིད་ཀྱང་ཞིབ་པར་ཐོབ། དེ་རྗེས་མཁས་གྲུབ་འབྲུ་འཇམ་དབྱངས་གྲགས་པ་ལས་འབྲུག་པའི་གདམས་སྐོར་མང་པོ་དང༌། དུས་འཁོར་འགྲེལ་ཆེན་དྲི་མེད་འོད། གསོ་རིག་ཕྱི་མ་རྒྱུད་སོགས་གསན། གཞན་ཡང་རྨེ་བ་མཁན་ཆེན་ཡེ་ཤེས་དར་རྒྱས། གྲུབ་དབང་ལྔ་པ་ཆོས་ཀྱི་རྡོ་རྗེ། ཨ་འཛོམས་རྒྱལ་སྲས་འགྱུར་མེད་རྡོ་རྗེ། ཀཿཐོག་མཁན་ཆེན་ངག་དབང་དཔལ་བཟང༌། མཁན་ཆེན་ཀུན་བཟང་དཔལ་ལྡན། མཁྱེན་བརྩེ་ཆོས་ཀྱི་བློ་གྲོས། བླ་མ་འཇམ་རྒྱལ། དབོན་སྟོད་མཁྱེན་རབ། སྒ་ངག་དབང་ལེགས་པ་སོགས་སྐབས་དེར་གྲགས་པའི་གསར་རྙིང་མཁན་གྲུབ་ཕལ་མོ་ཆེ་ལ་གཏུགས་ནས། རྫོགས་ཆེན་སྙིང་ཐིག་གིས་མཚོན་པའི་བཀའ་གཏེར་དབང་ལུང༌། ལྷག་པར་བྱང་ཆུབ་སེམས་ཀྱི་མན་ངག་ཨ་བུའི་གསུང་རྒྱུན་ཅན་གྱི་སྤྱོད་འཇུག་གི་ཁྲིད་སོགས་ཟབ་ཆོས་མང་པོ་གསན་བསམ་མཛད། སྡེ་དགེ་དགོན་ཆེན་དུ་རིག་གནས་སྐོར་འཆད་སྤེལ་གནང་བའི་སྐབས་སུ། ཞལ་གསུང་ཟིན་ཐོར་བཀོད་པ་ངག་སྒྲོན་གྱི་འགྲེལ་བ་ཚིག་གསལ་ཞེས་པ་དེ་མཛད། དེ་ལྟར་བོད་མདོ་དབུས་རྣམས་སུ་ཚུར་ཆོས་གསན་པ་དང་ཕར་རིག་གནས་འཆད་སྤེལ་བཅས་ལོ་བཅུ་གཉིས་ཙམ་གྱི་རིང་བཞུགས་ཏེ། ཞེ་གསུམ་ལ་ཡབ་ཡུལ་ཁུ་ནུར་ཕེབས། ཕྱོགས་དེར་བཀའ་བརྒྱུད་གོང་མའི་རྣམ་ཐར་བཞིན་བྱ་བྲལ་གྱི་རྒྱལ་པོར་བཞུགས་ནས་བྱང་ཆུབ་སེམས་ལ་ཐུགས་དམ་གྱི་མཐིལ་དུ་གནང༌། བར་སྐབས་ཤིག་ལ་ཝཱ་རཱ་ཎ་སཱིར་གཞུང་ཕྱོགས་ཀྱི་མཐོ་རིམ་སློབ་གྲྭ་ཆེན་མོར་བཙུགས་པའི་དགེ་རྒན་དུ་གདན་དྲངས་ནས། སྒྲ་སྙན་ངག་སྐར་རྩིས་སོགས་རིག་གནས་ཀུན་ཆགས་ཐོགས་མེད་པར་འཆད་ཁྲིད་མཛད་པས། དེར་བཞུགས་དགེ་བཤེས་བླ་སྤྲུལ་མཁན་པོ་ཀུན་གྱིས་གཙུག་ཏུ་བཀུར། གནས་དེ་ཉིད་དང་རྡོ་རྗེ་གདན་དུ་ལོ་མང་བཞུགས། སྐབས་དེར་རང་གི་ཉམས་ལེན་དང་བསྟུན་ཏེ་ཉིན་རེར་ཤྭ་ལོ་ཀ་རེ་བརྩམས་པའི་བྱང་ཆུབ་སེམས་བསྟོད་མཛད། མ་སུ་རིར་སློབ་གྲྭ་ལ་ཁྱད་པར་འཕགས་བསྟོད་ཀྱི་བཀའ་ཁྲིད་གནང་སྐབས་སུ་དེའི་ཟིན་བྲིས་སོགས་གསུང་རྩོམ་མང་པོ་བཞུགས། བཅུ་བཞི་པ་ཆེན་པོས་ཀྱང་སྐྱེས་བུ་དམ་པར་གཟིགས་ནས་སྤྱོད་འཇུག་སོགས་གསན་ཅིང༌། ཁྲིད་རྒྱུད་དེ་ཉིད་ད་ལྟའི་བར་དུ་རྒྱ་ཆེར་སྤེལ་བར་གནང༌། རྒྱལ་དབང་ཀརྨ་པ་བཅུ་དྲུག་པས་ཕྱག་ཆེན་གྱི་ཁྲིད་གསན། གསེར་ལྗོངས་མཁན་ཆེན་ཨ་པད་ཀྱིས་བརྟག་གཉིས། གུར། སམྦུ་ཊ་སོགས་གསན་པར་མཛད། གཞན་ཡང་མཚོ་པདྨར་ཕེབས་ནས་སྙིང་ཐིག་སྐོར། མུ་ན་ལི་ཅི་ཊ་རི་ལ་འབྲུག་ལུགས་སྐོར། གར་ཞ་དཀར་དྭངས་དགོན་པར་རོ་སྙོམས་སྐོར་དྲུག་སོགས་གསུངས་པས་མཚོན་འབྲུག་འབྲས་ལྗོངས། བོད་བལ་ཡུལ། རྒྱ་གར་ཤར་ནུབ་སོགས་རིས་སུ་མ་ཆད་པའི་བླ་ཆེན་མི་ཆེན། སྐྱ་སེར་ཕོ་མོ་སོགས་ལ་གང་ལ་གང་འདོད་ཀྱི་ཆོས་ཀྱི་འཁོར་ལོ་དཔག་ཏུ་མེད་པ་བསྐོར། མཐར་གར་ཞ་ཤ་ཤུར་གླིང་དུ་ཕེབས་ནས་དྭགས་པོའི་ཐར་རྒྱན་ཁྲིད་ནས་ཆོས་ཐུན་ཚུགས་བཞིན་པའི་མུར། དགུང་ལོ་གྱ་གསུམ་པ་མེ་སྦྲུལ་༼༡༩༧༧༽ ལོའི་ཆོ་འཕྲུལ་ཟླ་བའི་ཚེས་གཉིས་ལ་ཞི་བར་གཤེགས་སོ། །སྐུ་གདུང་མཆོད་རྟེན་ཡང་དེར་བཞེངས་སོ། །

祈请我的心识随顺教法，祈请一切教法缘于正道，并祈请一切幻觉悉变为智慧。—顶果钦哲

བདག་གི་སེམས་ནི་དམ་པའི་ཆོས་བཞིན་དུ་འཇུག་པར་བྱིན་གྱིས་རློབས། དམ་པའི་ཆོས་ནི་ཡང་དག་པའི་ལམ་ལས་འབྱུང་བར་བྱིན་གྱིས་རློབས། འཕྲུལ་སྣང་ཐམས་ཅད་རིག་པ་ཡེ་ཤེས་སུ་འགྱུར་བར་བྱིན་གྱིས་རློབས།