ཞེ་རུ་འཚེར་བའི་ཟླ་བ་མག་མོག་གྱུར།།
དགུང་གི་སྐར་ཚོགས་འཆར་སྣང་ངོས་ནས་བཤར།།
གྲིབ་མས་གྲིབ་མ་གཡོག་པའི་ཁང་སྟོང་དུ།།
གསེར་དངུལ་ལེན་པར་འདོད་པས་ལག་སྙོབས་བྱེད།།

རྐང་ལམ་སོ་མར་ཚེར་མའི་མེ་ཏོག་སྐྱེས།།
འགྲོ་ཞོར་ལམ་ནས་མཐོང་བའི་ལྕང་སྡོང་རྩེར།།
སྣང་བའི་བྱེའུ་ཆུང་གཤོག་པ་ཀྲབ་ཀྲབ་བྱས།།
གང་དུ་འཕུར་འདོད་མིག་ཟུང་ཀྲིག་ཀྲིག་གཡོ།།

སྤྲིན་པ་ཐར་ཐོར་གསེབ་ཀྱི་ཟླ་འོད་ཡང་།།
ཞེན་ཆགས་རྨི་ལམ་འཁྲུལ་མས་མཚོ་ཁར་བབས།།
ཀུན་རྟོག་སྤྲེའུ་རྩེད་པའི་མཇུག་མ་ལ།།
བྱིས་པའི་ལག་ཆུང་འཇུས་པའི་གཏམ་རྒྱུད་མོད།།

འུག་པའི་ཧབ་ཆ་སྒྲོག་པའི་མཚན་གུང་དུ།།
སྲིན་འབུས་རྩ་རྒྱུས་འཇབ་པའི་སྒྱུ་ལུས་ལ།།
ངར་འཛིན་ག་ཆད་ལུས་པ་ག་ཙམ་ཡིན།།
ཅུང་ཙམ་ལྷོད་པར་བྱེད་དམ་རིགས་ཀྱི་བུ།།

སྲེད་པའི་མེ་ཆེན་མཆེད་པའི་ནགས་ཀློང་དུ།།
ཨུ་ཚུགས་འཁྲིགས་འཛིན་བློ་ཡིས་ཅི་ཞིག་འཛིན།།
དད་པའི་ཆར་ཆུ་ཟད་པའི་ལོ་ཟླའི་ནང་།།
ཏིང་འཛིན་སོན་པའི་ཕུང་པོ་སྐམ་པར་གྱུར།།

འཁྲུལ་སྣང་འཆར་ཡན་ཉུལ་བའི་མཚོ་ངོགས་སུ།།
སྒྱུ་མའི་རྟ་གླང་འཚོ་བའི་བུ་ཆུང་ལ།།
རེ་དོགས་ཞེ་ཡི་ཉ་མོ་མི་སྟེར་རོགས།།
སྐྱོ་གདུང་ཉི་མས་འཚིག་ན་ཅི་ཞིག་བྱ།།

དབྱངས་ཅན་མ།

དཀའ་སྡུག་མནར་གཅོད་སྟོང་གི་མིག་ཆུ་ཡིས།།
སྡུག་གི་ངོ་གདོང་ལན་བརྒྱར་བསྐྲུས་ན་ཡང་།
བདེ་ཞིང་སྐྱིད་པའི་འཛུམ་མདངས་གཙང་མ་ཞིག།
ཚེ་འདིར་ལན་རེ་ཙམ་ཡང་མཐོང་བ་དཀའ།།
____ཤེས་རབ་མེ་ལྕེ་ནས༢༠༢༣-༣-༩-ཉིན

དེ་རིང་བརྗིད་ཉམས་ཀྱིས་འགྱིང་བའི་སྒོ་ཆེན་འདིའི་མདུན་ཟུར་གཡས་གཡོན་དུ། དར་ལྕོག་གི་དར་ལྕེ་ཡང་དཔྱིད་རླུང་གིས་ཡང་མོར་སྒུལ་བཞིན་འདུག སྐབས་འདིར། ཡོད་ཚད་ཞི་འཇགས་དང་ལྷོད་ཉམས་ཀྱིས་གནས་ཤིང་། ངའི་སྣང་བ་ཞིག་ལ་དབེན་འཇགས་ཀྱི་དགོན་པ་འདི་ནི་མི་ཡུལ་འདིའི་ཆེས་བབས་ཆགས་ཤིང་ཞི་བར་གནས་པའི་ཞིང་ཁམས་དེ་ཡིན། དེར་མ་ཟད། བབ་ཆགས་དང་ཞི་འཇགས་ཀྱི་རྣམ་པ་འདིའི་ཁྲོད་ནས་ངས་རང་གི་སྙིང་གི་འཕར་སྒྲ་ཡང་ཐོས་བྱུང་། ཐོས་ནས་ཀྱང་། ནང་བཅུད་ཀྱི་སེམས་ཅན་ལ་ཡོན་ཏན་ཡོད་ན། ཕྱི་སྣོད་ཀྱི་འཇིག་རྟེན་འདིར་མི་ཚང་བའི་མཐུན་རྐྱེན་ཞིག་མི་འདུག་སྙམ། ངས་འདི་ནས་རང་གི་སེམས་སྒྲ་ལས་སྙན་ངག་ལྟ་བུའི་སྐད་ཆ་ཞིག་ཐོས་བྱུང་། “འཇིག་རྟེན་གྱི་མུན་པ་སེལ་བ་རང་མ་རེད། རང་སེམས་ཀྱི་ཐག་སྒྲ་ལ་ཉན་པ་དེ་རེད།” ཅེས་པ་དེའོ།།

གཏེར་ལུང་དཔལ་ལྡན་གྱིས་༢༠༢༣/༢/༡༡ཉིན་དར་ལྕོག་བཙུགས་རྗེས་ཐོལ་བྱུང་དུ། https://t.cn/RxR8gAt