གཞན་གྱིས་བསྟོད་ཀྱང་རང་སེམས་རང་གིས་ཤེས།།

他人虽赞自心自了知，
ཇི་ལྟར་བསྟོད་ཀྱང་ཇེ་བཟང་ལ་མི་འགྲོ།།

如何称赞亦不更贤善，
གཞན་གྱིས་སྨད་ཀྱང་རང་སེམས་རང་གིས་ཤེས།།

他人虽讥自心自了知，
ཇི་ལྟར་སྨད་ཀྱང་ཇེ་ངན་ལ་མི་འགྲོ།།

如何讥毁亦不更恶劣，
དེས་ན་བསྟོད་སྨད་རེ་དོགས་མི་བྱེད་པར།།

故于赞讥勿患得与失，
བག་ཡངས་འཚོ་བ་སེམས་ཀྱི་བདེ་སྐྱིད་ཡིན།།

宽心度日心之安乐也。

མདུན་རྒྱབ།

རེ་དོགས་བྲལ་བ་བྱིས་དུས་ཀྱི་ནམ་ཟླ།
སྨུག་སྤྲིན་ཀློང་དུ་རྒྱབ་རི་ཡི་ཚོད་རེད།
མདུན་ཕྱོགས་ལྡང་བ་ལས་དབང་གི་རླུང་བུས།
དྲན་པའི་རྒྱབ་རི་གཡས་སྐོར་དང་གཡོན་སྐོར།

ལྷ་ཀླུས་བདག་གིར་བཟུང་བ་ཡི་རྒྱབ་རི།
ཉམ་ཆུང་བྱིས་དུས་རྨི་ལམ་གྱི་མེ་ཏོག
དྲི་བཟང་ལྷ་བསང་མཆོད་འབུལ་གྱི་ཁྲོད་ནས།
མདུན་དུ་མི་མངོན་གཟུགས་མེད་ཀྱི་ཟླ་རེད།

བརྩེ་བའི་མཚོ་མོ་རང་འཁྱིལ་དུ་ཆགས་ཀྱང་།
དུང་བའི་ཉ་མོ་གནས་མེད་དུ་འཁྱམ་ལྟར།
དྲན་པའི་རྒྱབ་རི་སྲ་བརྟན་དུ་གནས་ཀྱང་།
བཞད་པའི་མེ་ཏོག་ནམ་དུས་ནི་ཡོལ་ཟིན།

དུས་ཀྱི་བདག་མོའི་གོམ་སྟབས་རང་མྱུར་བས།
དྲན་པའི་རི་མོ་ནག་ནོག་ཏུ་གྱུར་སོང་།
མདུན་གྱི་ལམ་བུ་ཀྱག་ཀྱོག་དང་ལྡན་པས།
ཡིད་ཀྱི་བུ་ཆུང་འོ་རྒྱལ་ནི་ཆེ་སོང་།

རེ་དོགས་མེད་པའི་བྱིས་དུས་རེ་བསམ་ཚེ།
མི་ཡུལ་ཞེས་པར་བདེ་སྐྱིད་ནི་ཡོད་འདྲ།
རྟོག་འཆར་མང་བའི་ད་ཆ་འདི་མངོན་དུས།
གནས་ལུགས་ཞེས་པར་བདེན་ཁ་རང་མི་འདུག

བདག་གི་རྩ་ལམ་ནས་རྒྱུད་བཞིན་པའི་ཁྲག་རྒྱུན་དེ་གདོང་དམར་པའི་ཟུངས་ཁྲག་ཡིན་ལ། ངག་སྒོ་ནས་སྨྲ་བཞིན་པའི་གདངས་དབྱངས་དེ་ཡང་གདོང་དམར་པའི་རང་སྐད་ཡིན་པས། ཁོ་བོའི་རྣམ་ཤེས་ནི་དུས་གཏན་དུ་གངས་ལྗོངས་དང་དབྱངས་གསལ་ལ་འཁོར་ཡོད།