འདི་ནི་དུས་རབས་བཅུ་བཞི་བར་འབྲི་གུང་དཔལ་འཛི

首页发布

འདི་ནི་དུས་རབས་བཅུ་བཞི་བར་འབྲི་གུང་དཔལ་འཛིན་གྱིས་མཛད་པའི༼ཆོས་དང་ཆོས་མ་ཡིན་པའི་རབ་བྱེད༽བྱ་བའི་དཔེ་རྒྱུན་ཧ་ཅང་དཀོན་པའི་མ་ཕྱི་དེ་རེད། དེ་ནས་ལོ་ཉིས་བརྒྱ་ལྷག་གི་རྗེས་ཏེ། དུས་རབས་བཅུ་དྲུག་པར་སོག་བཟློག་པ་བློ་གྲོས་རྒྱལ་མཚན་གྱིས་འདི་ལ་དགག་ལན་ཞིབ་མོ་ཞིག་བྲིས་ཡོད། ཕྱིས་སུ་འབྲི་གུང་དཔལ་འཛིན་གྱི་ཀརྨ་པར་ཆབ་ཤོག་ཅིག་བྲིས་ཡོད། བདག་གིས༼དབའ་བཞེད་བསྐྱར་ཞིབ༽ཀྱི་དཔྱད་རྩོམ་དེ་འབྲི་དུས་སུ་འདི་ལ་ཁུངས་བཅོལ་ཡོད། དིང་སང་བོད་ལྗོངས་སློབ་ཆེན་གྱི་འབུམ་རམས་པ་སྣབས་ལུག་ཅིག་གིས༼དབའ་བཞེད་བསྐྱར་ཞིབ༽ལ་ཀླན་ཀ་འཚོལ་བའང་ཐོས་མོད། མུ་ཏོའི་སྤྲང་ཁུག་ཙམ་ལས་རྡོ་རྗེ་གདན་ལ་ཙི་གུས་སོ་འདེབས་པའི་ངང་ཚུལ་ལ་སོང་་ཡོད་སྙམ་པས་ཁུ་སིམ་མེར་བཞག་ཡོད། མདོར་ན། གཡས་རུའི་མཁས་དབང་འབྲི་གུང་དཔལ་འཛིན་གྱི༼སྔགས་ལོག་སུན་འབྱིན༽འདི་ནི་རྒྱལ་རབས་དབའ་བཞེད་ཀྱི་འཕེལ་རིམ་ལ་དབྱེ་ཞིབ་བྱེད་པར་མེད་དུ་མི་རུང་པ་ཡིན། — བན་ཤུལ་པས་ལྷ་སར།

རྒྱལ་བ་ཀུན་གྱི་འཕྲིན་ལས་གཟུགས་ཀྱི་སྐུར།།
ཡོངས་བཞེངས་ལྷ་མོ་ཨཱ་རྱ་ཏཱ་རེ་མ།།
སྐྱབས་སུ་བསྟེན་པས་འཇིགས་པ་ཀུན་བཅོམ་ཏེ།།
ཚེ་དང་བསོད་ནམས་མ་ལུས་ད་ལྟ་སྩོལ།། [微笑]

བྱང་རྒྱུད་གངས་ཀྱི་ས་འཛིན་ཚོམ་བུར་སྤུངས།།
གནམ་བབས་ལྷ་ཡི་རྨུ་ཐག་མགུལ་ནས་འཐེན།།
མཚར་སྡུག་ལང་ཚོས་ཁྱོག་པ་བསིལ་མོ་ལྗོངས།།
བལྟས་པས་མ་ངོམས་ཡིད་ཀྱི་རྩིགས་ངོར་བྲིས།།
རྒྱན་གྱུར་སྤོབས་པའི་རྭ་ཟུང་དཔའ་བོའི་གདེང་།།
གནམ་དུ་བཙུད་པས་ཉི་ཟླའི་དཔལ་འཕྲོག་ཅིང་།།
ཤམ་རྩིད་གཡོ་བས་འཛིན་མའི་གདོང་བསྙིལ་ལ།།
རྔམ་བརྗིད་རྨིག་སྒྲས་སྙིང་ཡང་དུམ་བུར་འཚལ།།