མཁས་དབང་དགེ་ཆོས་ཀྱིས།
རྒྱལ་བ་ཙོང་ཁ་བ་ལྟ་བུ་ཞིག་བོད་ལ་བྱོན་མེད་ན། ང་ཚོ་བོད་པ་ཚང་མ་ག་ས་གང་ལ་འཐོར་ནས་ད་སྐབས་ཡོད་པ་མ་རེད། རྗེ་ཙོང་ཁ་བའི་དྲིན་གྱིས་ཆོས་ཀྱི་ཐོག་ནས་མི་རྣམས་ཀྱི་སེམས་ཤུགས་གཅིག་ཏུ་བསྒྲིལ་ཡོད། རྒྱལ་བ་ཙོང་ཁ་པས་ཤིང་གི་ངོས་ལ་དཔེ་ཆ་བརྐོས་ཏེ་དཔར་ཆོག་པའི་ལུགས་སྲོལ་ཞིག་བཙུགས་པའི་རྗེས་ནས་བོད་ཀྱི་སྐད་ཡིག་གཉིས་ལ་འགྱུར་བ་སོང་མེད། ཤར་རྒྱ་མཚོ་ནས་ནུབ་ཛ་ལན་ངྷ་རའི་བར་དུ་ཨ་མདོའི་བླ་རྒན་འདིས་དབང་བསྡུས་པ་རེད། དེའང་ཁོ་གིས་ཁ་ཡག་ངོ་སྲུང་གི་ལས་ཀ་བྱས་པ་མེད་ལ། དེ་འདྲ་ནམ་ཡང་བྱེད་ཀྱང་མི་སྲིད། ཆོས་གོས་སྣམ་སྦྱར་གཉིས་ཀྱིས་དབང་དུ་བསྡུས་པ་རེད། ཅེས་གསུངས།

*

བར་སྐབས་ཀྱི་ཚོར་གླུ་གྱ་གྱུ།

འཁོར་བའི་འདམ་ནས་རྙེད་པའི་སྲོག་གི་མེ་ཏོག །
ལས་ཀྱི་ལྷ་སྐལ་ཕུལ་བའི་བྱིན་རླབས་ཡིན་འདྲ།།
ཚོར་བ་སྨུག་སྤྲིན་སྟུག་པོའི་སྒྱུ་མའི་གླིང་ནས།།
འདང་གིས་རོལ་མོ་བཀྲོལ་བའི་རྟེན་འབྲེལ་ཡག་པ།།

དགའ་བདེའི་དཔལ་ཡོན་རྒྱས་པའི་སེམས་གཤིས་དྭངས་མོས།
དུང་སེམས་ཞེ་ལ་ཐོག་པའི་དབྱངས་ཤིག་གྱེར་དང་།།
མིག་གིས་རྒྱང་ནས་འཚོལ་བའི་ལོ་ཟླའི་བར་གསེང།།
རྨི་ལམ་སེམས་ཀྱི་སྲུང་མའི་དན་རྟགས་རྙེད་བྱུང་།།

སྣང་བ་གྲུ་ཆར་བབས་པའི་ལོ་དང་ཟླ་བར།།
མེ་ཏོག་བརྗོད་བྱར་ཟིན་པའི་སྙན་ངག་བྲིས་ན།།
བདག་ཡིད་ལྷ་སྐལ་གླེང་བའི་ཐ་སྙད་གསེང་ནས།།
མགུར་གླུ་སྙན་མོས་བཞེང་པའི་སྟ་གོན་མཛེས་པ།།

ངོ་གནོང་དུག་རླངས་ཡལ་བའི་སེམས་ཀྱི་ཀློང་ནས།།
འཛུམ་གྱི་རང་མདངས་མ་ཡལ་ལྷ་གྲོགས་ཕེབས་དང་།།
མེ་ཏོག་ཆ་གཅིག་སྐྱེས་སའི་སྤང་ཐང་ཡངས་པོར།།
ལོ་ཟླའི་བར་གསེང་འཆར་བའི་འཇའ་གུར་ཕུབ་འདུག།

འཁོར་འདས་ཞི་དབྱིངས་ལྟ་བུའི་སྣང་བའི་ཁམས་ནས།།
བཅོས་མིན་ལྷུག་པར་བཞད་པ་འཛུམ་པའི་ཞལ་རས།།
ཞི་རགས་ལྷ་ཞལ་མཐོང་བའི་སྟ་གོན་མིན་ཡང་།།
སྣང་བའི་ཁམས་ནས་རྙེད་པའི་ཟིན་ཐོ་བྱ་ཆོག །

ལང་ཚོའི་པད་འདབ་བཞད་པའི་རང་གཤིས་གཙང་མར།།
སྣང་བའི་མཁའ་དབྱིངས་དྭངས་སར་ལྷོད་ཀྱིས་བྱོན་དང་།།
བསུབ་མེད་རུས་ལ་བཀོད་པའི་དན་རྟགས་གསོན་པོ།།
དྲན་པའི་མཁའ་ལམ་བཞེངས་པའི་རྡོ་རིང་ཡིན་འདྲ།།

རྒྱང་ནས་དལ་གྱིས་བླངས་བའི་དགྱེས་གླུ་རིང་མོ།
དབུས་ལམ་དར་ཐང་དཀར་པོའི་པི་ཝང་དཀྲོལ་བཞིན།།
མཉམ་བཞག་བརྗོད་མེད་ཚོར་བའི་ཟིན་ཐོ་མིན་ན།།
གཉིས་འཛིན་ཀུན་སློང་དྲག་པོས་འཆང་བ་མ་གནང་།།

དབྱངས་ཅན་ངག་གིས་དཀྲོལ་བའི་སྒྲ་དབྱངས་སྙན་མོ།།
གང་གིས་བདེན་པར་མ་རློམ་སྒྱུ་མའི་པི་ཝང་།།
ཚིག་ལ་གོ་རིམ་བསྒྲིག་པའི་ཚོར་བའི་མགུར་ཆུང་།།
ཡང་ཡང་རྣ་བའི་བླན་ཡང་ཚིམ་པ་མ་བྱུང་།།

རི་ལུང་སྨུག་སྤྲིན་འཁྲིགས་པའི་གཞོལ་ནས་འཚོལ་ཏེ།།
གཞས་ཆུང་ངག་གིས་གྱེར་ཏེ་དབྱངས་ལ་བཀུག་ན།།
མ་སྐྱེས་གདོད་ནས་འཁྲུངས་བའི་ཨ་ཡིག་དཀར་པོས།།
ཆུ་འཛིན་འོད་ཀྱིས་འཚེར་ཏེ་མཁའ་ལམ་གསལ་ཤོག།

སྒེའུ་རྒྱ་ཕེབ་སེར་པོའི་དབུས་ནས་འཛུམ་པའི།།
མཚན་གཞུང་ཟླ་འོད་འཕྲོས་པའི་དུས་ཚིགས་མཛེས་པོ།།
སྣང་བ་རྒྱ་ཡན་ཤོར་བའི་སྒྱུ་མའི་ལྡིག་ཁང་།།
ཚོར་བ་ལྷོད་ཀྱིས་མགུར་བའི་དབྱངས་དང་འདྲེས་སོང་།།

མི་ཚེ་ནི་ཡུད་ཙམ་ཞིག་གིས་ཚེ་སྟོད་ནས་ཚེ་སྨད་དུ་སྐྱེལ་བར་བྱེད་འགྲོ། དེ་བས་ཡུན་ཐུང་གི་མི་ཚེའི་ནང་གུ་ཡངས་བློ་བདེ་ངང་འཚོ་དགོས། བདེ་སྐྱིད་ཀྱི་འཚོ་བ་ནི་སེམས་ལས་གུད་ན་མེད་པས་བསམ་བློའི་འདུ་ཤེས་སྐོར་སྟངས་ཤིག་རེད།人生是一瞬间，一刹那就会走上半生到下半生，因此，在短暫的人生中要寬容和安心地生活，幸福的生活是一种思想的意识形态。[咖啡]