ལོ་འགའི་སྔོན་གྱི་སྦྲ་ནག་གི་ཚོགས་སྡེ་ཞིག ། དུས་ཡུན་ཐུང་ཐུང་ཞིག་གི་ནང་དུ་གུར་དང་ས་ཁང་དུ་ལོག་བཞིན་པ་འདི་ལ་བལྟས་ན། ད་ནི་སྦྲ་ནག་གི་འབྲོག་པའི་དགོས་མཁོ་སྐོང་ཐུབ་ཀྱིན་མེད་པ་དང་། དེ་ལས་སྟབས་བདེའི་རང་བཞིན་གྱི་གུར་ཁང་ནི་འབྲོག་སྡེ་རུ་དར་བར་མཆིས། དེས་མཚོན་པའི་བྱ་དངོས་གང་ཞིག་སྟབས་བདེ་དང་ཧ་ཅང་བྲིན་པ་ཡིན་ན། དེ་ནི་སྤྱི་ཚོགས་དེར་རྒྱུགས་ཆེ་བ་དང་། དེ་ལས་ལྡོག་པ་ནི་གོ་མེད་ཚོར་མེད་ཅིག་ཏུ་འགྱུར་འགྲོ་བའང་ཆོས་ཉིད་ཅིག་ཡིན་པ་འདྲ། འོན་ཀྱང་སྦྲ་རོག་རོག་འདི་ཡི་ལོ་རྒྱུས་དང་། འདི་མེད་ན་འབྲོག་པའི་ཚུགས་ཀ་ཤོར་འགྲོ་བས་སྟབས་བདེ་མིན་ཙམ་ལ་མ་ལྟོས་པར། ཨུ་ཚུགས་བྱས་སྟེ་བེད་སྤྱོད་བཏང་དགོས་སྙམ།

དབྱར་ཟླ་དྲན་པའི་མཐོང་སྣང་།

ཡར་ཡར་རི་ཟེ་འགྲིམས་ཏེ།།
མར་མར་སྤང་ཁར་བལྟས་དུས།།
སྤང་རྒྱན་མེ་ཏོག་ཟུར་ནས།།
སྦྲང་ཆུང་སེམས་པ་སྐྱོ་འདུག །

ད་ལོའི་དབྱར་ཡུན་རིང་ཡང་།།
བདག་ནི་བྲེལ་ཟིང་རྒོད་པས།།
མིག་ལྡེབ་ཙམ་གྱི་བར་ནས།།
དྲན་པའི་ཡུལ་དུ་གྱུར་སོང་།།

དབྱར་དང་ཁུ་བྱུག་བུ་མོ།།
རྒྱང་རིང་ཡུལ་ལ་ལོག་དུས།།
གྱེས་པའི་སྐད་བརྡ་ཙམ་ཡང་།།
དེ་རིང་ཐོས་རྒྱུ་མི་འདུག །

སྟོན་ཀའི་ཟླ་བ་གོར་མོ།།
ང་དང་པདྨའི་གྲོགས་ལ།།
མཚན་གཞུང་ཤར་བ་འདྲ་ཡང་།།
གྲང་ངར་བཟོད་ས་མ་རེད།།

ད་ཚོད་སྤང་ཁ་ཉུལ་ནས།།
སེམས་པ་ལྷོད་ཡན་བཏང་དུས།།
སྟོན་ལོ་ཁེར་རྐྱང་ཞིག་གིས།།
རྣམ་འགྱུར་མང་པོ་སྟོན་སོང་།།

དབྱར་ཟླ་གསུམ་གྱི་མེ་ཏོག །
འདི་ལྟར་སད་ཀྱིས་བཅོམ་དུས།།
ང་དང་གཡུ་སྦྲང་གཞོན་ནུ།།
པད་མའི་ཚལ་ནས་གྱེས་འགྲོ།།

གསོ་བའི་རིག་པ་ནི་གསོ་བའི་བསྟན་བཅོས་ཏེ། ནད་གསོ་བ་ཤེས་པའོ། ། དེ་ནི་རྣམ་པ་བཞིར་བལྟ་བར་བྱ་སྟེ། ནད་ལ་མཁས་པ་དང་། ནད་སྤྱི་ལས་གྱུར་པ་ལ་མཁས་པ། ནད་བྱུང་བ་བསལ་བ་ལ་མཁས་པ་དང་། ནད་བསལ་ནས་ཕྱིས་མི་འབྱུང་བར་བྱ་བ་ལ་མཁས་པའོ། །