རྒྱུན་པར་ངལ་གསོའི་སྐབས་སུ་ནང་བསྟན་རིགས་གཞུང་ལས་གཞན་པའི་བསྒྱུར་རྩོམ་སོགས་དཔེ་དེབ་གྲགས་ཅན་རེ་འགའ་བཀླགས་པའི་གོམས་བཤིས་ཆགས་སུ་འབད།
ཞལ་རས་ལ་ཧ་ཅང་གཟབ་ནན་བཏོད་པའི་ཁོ་མོས་མི་ཚེ་གང་བོར་རྩན་རིག་བྱ་བར་བློ་རྩེ་བསྒྲིམས་པ་དེ་ནི་མཉམ་ལེན་པ་ཞིག་དང་ཀུན་ནས་མཚུངས་སྙམ། ནོ་བྷེར་བྱ་དགའ་ཐེངས་གཉིས་ལ་ཐོབ་པའི་བུད་མེད་ཐོག་མ་འདིས། འཁྲུག་ཆེན་དང་པོའི་སྐབས་ཧྤ་རིན་སི་ལྟ་བའི་སྟོབས་ལྡན་རྒྱལ་ཁབ་ཞིག་ཀྱང་གསར་བཏོད་ཀྱི་ལམ་བུར་ཁྲིད་ཅིང་། དམག་མི་རྨས་མ་མང་པོར་ཁོ་མོ་གཟའ་ཟླ་གཉིས་ཀྱིས་གསར་བཏོད་མཛད་པའི་ཨེམ་གཞི་རྒྱུ་སྤྱད་ནས་སྨན་བཅོས་བྱས་པའི་སྙིང་སྟོབས་དེའང་ཇི་འདྲའི་མཛེས་སྡུག་ལྡན་པ་ཞིག་རེད་ཨང་། ལྷག་ཏུ་གཟབ་འཕྱོར་དང་སྙན་གྲགས། དཔལ་འབྱོར་ཐམས་ཅད་ལ་ཁོ་མོ་གཡོལ་ཅི་ཐབས་བྱས་པ་དེས་ཨ་རིའི་བུད་མེད་ཚོར་དགའ་བ་མེ་ལྟར་འབར་དུ་བཅུགས།

ངོ་གཉིས་མས་ཡག་མདོག་བསྟན་འདུག

དཔྱད་འཚོལ་བ།
ད་ལྟའི་ཕར་ཕྱོགས་འདི་ནས་བརྗིད་བརྗིད་རྔམ་རྔམ། ། 
གཡོ་སྒྱུ་ཁོག་ལ་སྦས་ནས་ངོ་མདོག་སྟོན་འདུག ། 
སྐྱེས་ནས་བཟུང་སྟེ་འདས་པའི་དུས་ཚོད་ཡོད་ཚད། ། 
ཁྲམ་པ་བཟོས་པའི་བཞུད་རིམ་དྲན་གི་མི་འདུག ། 

དཀར་དམར་འདྲ་མིན་འདུས་པའི་དཀྱིལ་དབུས་དེ་ནས། ། 
ངོ་གཉིས་མ་ཡིས་འཁྲབ་ཆེན་དངོས་གནས་འཁྲབ་འདུག ། 
ཁོག་པའི་ནང་ལ་གཡོ་སྒྱུ་ཁོག་གང་སྦས་ནས། ། 
བཅོས་མའི་འཛུམ་མདངས་ཤིག་གིས་དགའ་བསུ་ཞུས་འདུག ། 

མཆོག་ཏུ་གྱུར་པའི་བཟང་པོ་ཡིན་མདོག་བསྟན་སོང་། །  
མ་ཚད་བདེན་པའི་གཞིར་འཛིན་ཡིན་མདོག་བྱས་འདུག ། 
འདས་མ་ད་གསུམ་གང་ལ་བསམ་བློ་བཏང་རུང་། ། 
མི་བཟང་མཆོག་ཏུ་གྱུར་པ་མོ་གཤམ་བུ་བཞིན། ། 

སེམས་དང་བསམ་པའི་བློ་རྩེ་གཅིག་མདོག་སྟོན་ཡང་། ། 
གཡོ་ཅན་དྲང་བརྫུས་མཁན་དང་བསམ་པ་མི་གཅིག ། 
ཨ་ལོང་ཡང་ལོང་བརྒྱུས་འདྲའི་མཐུན་མདོག་སྟོན་ཡང་། ། 
འདས་པའི་ལོ་རྒྱུས་རྨ་ཁ་ད་དུང་སོས་མེད། ། 

ཁྱིམ་ཚང་གཅིག་ལ་སྐྱེས་འདྲའི་མཛའ་མདོག་སྟོན་ཡང་། ། 
མི་རབས་དུ་མ་བརྒྱུད་ཀྱང་མཛའ་བ་མི་བྱུང་། ། 
ཕན་ཚུན་བྱམས་བརྩེའི་དྲོད་ཁོལ་ལྡན་མདོག་སྟོན་ཡང་། ། 
བསིལ་རླུང་འཁྱགས་པས་བསྡམས་ནས་མིག་མཆུ་སྐམ་མེད། ། 

བདེ་ཞིང་སྐྱིད་པའི་ཉི་མ་བསྐྲུན་མདོག་སྟོན་ཡང་། ། 
སྡུག་གི་མུན་པའི་ནང་ན་དྲན་པས་བཟི་ཡོད། ། 
སེམས་པ་གྲང་བའི་ཆུ་བཞིན་གཙང་མདོག་སྟོན་ཡང་། ། 
སེམས་པ་འཁྲུགས་པོ་ཡོང་བའི་གནས་ལ་འཁོད་ཡོད། ། 

2023/10/4

࿐སྣང་བ།

དབྱངས་ཅན་མ།

ཟླ་བ་གོར་གོར་དེ་ངའི་མིག་ཟུང་ཡིན་ནམ། །
ཉི་མ་དམར་པོ་དེ་ངའི་སྙིང་ཆུང་ཡིན་ནམ། །
སྐར་མ་ཁྲ་ཚོམ་དེ་ངའི་གྲོགས་མོ་ཡིན་ནམ། །
ནམ་མཁའ་སྟོང་པ་དེ་ངའི་སེམས་པ་ཡིན་ནམ། །

ཆར་པ་ཟམ་ཟིམ་དེ་ལྷའི་དངོས་སྒྲུབ་ཡིན་ནམ། །
མེ་ཏོག་ཡར་སྐྱེས་དེ་ངའི་དགེ་སེམས་ཡིན་ནམ། །
ཆུ་བོ་མར་བཞུར་དེ་ངའི་སྡིག་སྒྲིབ་ཡིན་ནམ། །
རྟེན་འབྲེལ་བསླུ་མེད་དེ་ངའི་ལམ་བུ་ཡིན་ནམ། །

ལ་ཁའི་དར་ལྕོག་དེ་ངའི་མི་ཚེ་ཡིན་ནམ། །
གྲང་རླུང་ངར་མ་དེ་ངའི་འཆི་བདག་ཡིན་ནམ། །
སྤྲིན་པ་ཁེར་འགྲོ་དེ་ངའི་རྣམ་ཤེས་ཡིན་ནམ། །
དམྱལ་བའི་ལྕགས་མཁར་དེ་ངའི་ལས་སྣང་ཡིན་ནམ། །

རྒྱ་མཚོ་བསྙོགས་པོ་དེ་ངའི་རྣག་ཁྲག་ཡིན་ནམ། །
བྲག་རི་མཐོ་པོ་དེ་ངའི་ཤ་རུས་ཡིན་ནམ། །
སྲིད་པ་རྒན་མོ་དེ་ངའི་ཨ་མ་ཡིན་ནམ། །
སྣང་བ་ལིང་ལིང་དེ་ངའི་རྨི་ལམ་ཡིན་ནམ། །