ཚེ་ཕྱི་མའི་བརྩེ་དུང་གི་ལས་སྐལ།

རྩོམ་པ་པོ།

རྨེ་སྤྲུལ་བསྟན་འཛིན་རྒྱ་མཚོ།
ཡིད་འོང་དབེན་པའི་རི་ངོགས་བྱང་ཆུབ་ཀྱི་དགོན་པར།།
མཚར་སྡུག་ཡིད་འཛིན་བུ་མོའི་དུངས་སེམས་ཀྱི་མེ་ཏོག།
ཁྲེལ་ལྡན་གཞུང་བཟང་བུ་ཡི་སྙིང་ག་རུ་བཞད་པས།།
ཅི་ཞིག་ལྟར་ན་བརྩེ་དུང་འདབ་བརྒྱ་དེ་གྲོལ་སོང་།།

རིགས་གཟུགས་ལང་ཚོ་གནམ་སའི་བར་ཐག་གིས་བཅད་ཀྱང་།།
མཉེན་གཤིན་སེམས་ཀྱི་འདུན་མ་གཞི་གཅིག་ལ་འབྲེལ་བའི།།
མི་ཡུལ་རྣམ་ཤེས་ཟུང་གི་སྐྱིད་སྡུག་གི་ལས་བསྐོས།།
སེམས་ཆུང་ཤུགས་རིང་འབྱིན་པའི་རྒྱུ་རྐྱེན་དུ་གྱུར་འདུག།

སྡུག་སྣང་སྐྱིད་དུ་ཚོར་བའི་འདོད་གདུང་གི་བཟི་ཁ།།
རྗེས་ཆགས་དྲོད་ཁོལ་འབར་བའི་ལང་ཚོ་རུ་སིམ་སྟེ།།
མངར་སྐྱུར་བྲོ་བ་འདྲེས་པའི་འཇིག་རྟེན་གྱི་འཚོ་བ།།
གཞོན་ཆུང་མི་ཚེའི་སྙིང་གི་བདུད་རྩི་རུ་ཐོབ་ཀྱང་།།

མ་བཅོས་སྙིང་གི་གསང་གཏམ་ཟུར་མིག་ལ་འཁྱུད་ཅིང་།།
ལུས་སེམས་འོ་ཆུ་འདྲེས་པའི་ཉམས་དགའ་ཡི་སྣང་ཤས།།
དབང་ཆེན་དཔོན་པོའི་སེམས་ཀྱི་ཚེར་མ་རུ་མཐོང་ནས།།
མཐའ་མེད་ཆགས་སྒོ་འབོད་པའི་གཡབ་མོ་རུ་གྱུར་སོང་།།

འབྲལ་ཁའི་གདུང་བ་དྲག་པོ་སྙིང་ཁ་རུ་ཟུག་པས།།
སེམས་ཀྱི་རྨ་ཁ་གསར་བར་ན་ཚ་ཞིག་བསླངས་ཏེ།།
དབང་མེད་བཙན་གྱིས་དེད་པའི་གྱེས་བྲལ་གྱི་གདུང་བ།།
ཉམ་ཆུང་ཚེ་སྲོག་འཕྲོག་པའི་གཤེད་མ་རུ་ཆས་སོ།།

བཏབ་པའི་བྲོ་ཚིག་བོར་བའི་བརྡ་འཕྲིན་དེ་འབྱོར་བས།།
རེ་ཐག་བྲལ་བའི་སེམས་པ་ངེས་འབྱུང་ལ་ཕྱོགས་ཏེ།།
མགོ་སྐྱེས་ལྕང་ལོ་བྲེགས་པའི་གཙུག་ཕུད་ཀྱི་ཟར་བུ།།
ཡིད་གཅུགས་བུ་མོའི་སེམས་ཀྱི་དྲན་རྟེན་དུ་བསྐུར་སོང་།།

ཆར་ཞོད་ཆེ་བའི་མཚན་མོའི་སྨག་རུམ་གྱི་ཁྲོད་ནས།།
མཛའ་བོའི་མིང་ནས་འབོད་ཅིང་གདུང་ཡུས་ཀྱིས་མནར་བཞིན།།
འགྱེལ་མ་ལང་གི་གོམ་སྟབས་དབེན་རི་ལ་བསྒྱུར་ཡང་།།
དཀའ་ཐུབ་བརྟུལ་ཞུགས་བླངས་པའི་སྙིང་གྲོགས་དེ་མ་མཐོང་།།

ན་ཆུང་སེམས་ཀྱི་མེ་ཏོག་མི་ཡུལ་ནས་བྲལ་ཁར།།
བརྩེ་གདུང་མཆི་མ་འཁྱིལ་བའི་ཤི་མིག་གི་འོད་ཞགས།།
རྒྱང་རིང་འཇིག་རྟེན་ཕྱི་མའི་ཞིང་ཁམས་སུ་གཏད་ནས།།
ཚེ་རྟིང་མཉམ་འཛོམས་འོང་བའི་ལས་འཕྲོ་ཞིག་བསྒྱུར་ཡོད།།

མལ་གྱི་ཐ་མར་མནལ་བའི་ཉམ་ཆུང་གི་བུ་མོས།།
ཤི་གསོན་བར་དུ་སྤྲིངས་པའི་དུང་སེམས་ཀྱི་ཡིག་ཆུང་།།
ཕྱི་ཐག་རིང་བའི་གྲོགས་ཀྱི་སྤྱན་ལམ་དུ་འབྱོར་ཚེ།།
དྲན་གདུང་སྤུ་གྲིས་སྙིང་ག་འགས་སྙམ་ཞིག་ལོས་བྱེད།།

བག་དྲང་ལས་ཀྱི་རླུང་དམར་དྲག་པོ་ཡིས་བདས་པའི།།
སྐྱོ་མོའི་སྣང་བ་ཡད་ཡུད་ཕྱད་ཕྱོད་ཀྱི་ངོགས་ནས།།
ཤི་གསོན་ངོ་འཕྲད་བྱུང་བའི་དགའ་སྐྱོ་ཡི་མིག་ཆུ།།
བར་དོའི་འཇིག་རྟེན་ཁམས་ཀྱི་རི་ཀླུང་དུ་བབས་སོ།།

མི་ལོ་བརྒྱ་སྟོང་དུ་མའི་བར་ཐག་གིས་བསྐལ་ཡང་།།
འགྲོགས་པའི་ལས་སྐལ་སྒུག་པའི་བརྩེ་དུང་གི་སྐྱོར་གར།།
སྐྱེ་ཤིའི་ཕྲེང་བ་བརྒྱུད་པའི་ལམ་ཕྲན་གྱི་ངོགས་ནས།།
ད་དུང་ཕྱི་མིག་བགྲད་ན་ཐེངས་གཅིག་ལ་ལྟ་ངེས།།

དགུན་ཁ།

དགུན་ཁ
གྲང་རླུང་ལྡང་བས
ས་ཆེན་གྱི་ལྭ་བ་བཀོག་ཅིང་
ལྗོན་པའི་ཚོགས་ཀྱི་རལ་པ་དག་བཅད

དགུན་ཁ
ཁ་བ་བབས་པས
རི་ལུང་ལ་གདོང་འབག་བསྐོན་ཅིང་
ས་ཆེན་མ་མ་ཡང་གངས་རྡུལ་གྱིས་མནན

དགུན་ཁ
བུ་ཡུག་འཚུབ་པས
ལུས་སེམས་ཟུང་འཁྱག་དར་གྱིས་བསྡམས་ཤིང་
སྨྲ་བྱེད་ཀྱི་ངག་སྒོ་ཙག་རླུང་གིས་བཅུན

དགུན་ཁ
སྤྱང་ཚོགས་མོད་པས
ལྷས་ར་ཡི་ལྷིང་འཇགས་དཀྲོགས་ཤིང་
ཤེད་ཞན་པའི་སྒོ་ཟོག་དག་ལྷས་ར་ནས་བསད

ཕུན་ཚོགས་རྒྱ་མཚོ།
2024/1/10#冬天#

རྒན་པོ་ཚོའི་ཁ་ན་བོད་རེ་བས་འཆི།

དགྱ་དོགས་པས་འཆི་ཟེར་བའི་གཏམ་དཔེ་ཞིག་ཡོད།

གཏམ་དཔེ་དེའི་ནང་སྙིང་ན་བོད་དགྱ་གཉིས་ཀྱི་བསམ་བློའི་འཁྱེར་སོ་ཞིག་ཀྱང་ཡོད།

དེ་ནི་བོད་ལ་ལག་ལེན་མེད་པ་དང་དགྱ་ལ་ཡིད་རྟེན་མེད་ཅེས་པའི་དོན་རེད།

རེ་བ་ལས་ལག་ལེན་མེད་མཁན་གྱི་བོད་དང་དོགས་པ་ལས་ཡིད་རྟོན་མེད་མཁན་གྱི་དགྱ་གཉིས་ནི་གནའ་ནས་ད་བར་དུ་འཇིག་རྟེན་གྱི་ལྟ་ཚུལ་དང་མི་ཚེའི་ལྟ་ཚུལ། འཚོ་གནས་ཀྱི་ལྟ་ཚུལ་དང་རིན་ཐང་ལྟ་ཚུལ་སོགས་ཐ་དད་དང་འགལ་ཟླ་རུ་གྱུར་ནས་ལྷན་ཅིག་མི་གནས་འགལ་དུ་གྲུབ་ཡོད་པ་རེད།

གཡུ་བྲག་ཀར་ཕུན།