༄༅།།བདུད་འཇོམས་རིན་པོ་ཆེས་རྣམ་ཐར་མདོར་བསྡུས་བཞུགས་སོ།།     

སྐྱབས་རྗེ་༸བདུད་འཇོམས་འཇིགས་བྲལ་ཡེ་ཤེས་རྡོ་རྗེས་མཛད།    

བདུད་འཇོམས་འཇིགས་བྲལ་ཡེ་ཤེས་རྡོ་རྗེར་(༡༩༠༤-༡༩༨༧)འབོད་པའི་རྒྱལ་ཁམས་པ་བདག་གི་སྐྱེ་ཡུལ་ནི་སྦས་ཡུལ་པདྨ་བཀོད། སྐྱེད་བྱེད་ཀྱི་ཕ་ནི་ཀ་གནམ་རྗེ་རིགས་ཀྱི་མི་རྒྱུད་ཁེངས་བླ་འཇམ་དཔལ་ནོར་བུ་དབང་རྒྱལ་གྱི་བུ་རུ། རབ་བྱུང་བཅོ་ལྔ་པའི་ཤིང་འབྲུག་ལོར་སྐྱེས། ལོ་ངོ་གསུམ་ཙམ་ནས་བདུད་འཇོམས་གཏེར་ཆེན་གྱི་སྤྲུལ་སྐུར་ངོས་འཛིན་བྱས་ཏེ་གོང་མའི་ཞལ་སློབ་སོགས་ནས་བདག་གིར་བཟུང་སྟེ་ཆོས་སྒོར་བཅུག། ཡོན་ཏན་གྱི་རྩ་བ་འབྲི་ཀློག་ཡིན་ཅེས་དགེ་རྒན་ནས་སློབ་སྦྱོང་གི་ཞུར་ལ་དྲངས། ཞར་ལ་ཆོ་ག་ཆོས་སྤྱོད་སོགས་ཀྱི་དཔེ་འཛིན་དང་། སྒོ་གསུམ་སྤྱོད་ལམ་གང་ཅིར་ཉེས་འགོག་ལེགས་སྦྱོར་གྱི་སློབ་ཁྲིད་དང་འབྲེལ། ལོ་རྒྱུས་གཏམ་རྒྱུད་སྔོན་འགྲོའི་གོ་དོན་སོགས་ཁྲིད་ཚུལ་ཇི་སྙེད་པས་བློ་མིག་ཅུང་ཟད་ཕྱེ། རིམ་གྱིས་ལོ་ན་བློ་ཚོད་དང་མཐུན་པར་སྔ་ཕྱིར་མཁས་གྲུབ་བླ་མ་རྣམས་ཀྱིས་བརྩེ་བས་རྗེས་སུ་བཟུང་སྟེ། བརྡ་དག་སྙན་གསུམ་རྩིས་སྨན་སྐོར་སོགས་ཐུན་མོང་རིག་གནས་ཁ་ཐོར། དབུ་ཕད་བྱམས་ཆོས་སྤྱོད་འཇུག་སྡོམ་གསུམ་སོགས་ཐུན་མིན་གཞུང་བཤད་འགའ་ཙམ། ཁྱད་པར་རང་ལུགས་སྔགས་རྒྱུད་བཀའ་གཏེར་རྒྱ་མཚོའི་སྨིན་གྲོལ་རྒྱུད་འགྲེལ་ཟབ་ཁྲིད་སོགས་གཙོ་བོར་བཟུང་། རྡོ་རྗེ་སློབ་དཔོན་གྱི་ལས་བཅུ་གསུམ་ནས་བརྩམས་སྒྲུབ་སྡེ་ཆོ་གའི་རྣམ་གཞག། གཏོར་བཟོ་རྒྱན་བཀོད་གར་ཐིག་དབྱངས་རོལ་ཚུན་རིག་འཛིན་བརྒྱུད་པའི་ཕྱག་བཞེས་རས་སུ་མ་བོར་བར་སྦྱང་བརྩོན་ལ་འབད་འབུངས་བགྱིས། སྐབས་སུ་སྔོན་འགྲོ་བསགས་སྦྱོང་ནས་བརྩམས་དངོས་གཞི་བསྐྱེད་རྫོགས་བསྙེན་སྒྲུབ་ཀྱི་ཉམས་ལེན་ཡང་བྲེ་གསོག་ཕུལ་གསོག་ཅི་ནུས་སུ་བརྩོན་ཁུལ་བྱས་མོད། འོན་ཀྱང་བླ་མའི་མིང་ངན་ཐོགས་པ་འདིས་བསླུས་ཏེ། བསྟན་དོན་འགྲོ་ཕན་དུ་བསྙད་པའི་རྣམ་གཡེང་གི་ཁོལ་པོར་འཕྱན་ནས། སྒྲུབ་པ་ཉམས་ལེན་གྱི་མངོན་རྟགས་ཡོན་ཏན་ནི་རུས་སྦལ་གྱི་སྤུའི་རྗེས་སུ་སོང་། རང་ལ་ཆོས་ཀྱི་བདུད་རྩི་ཇི་ཙམ་ཐོབ་ཅིང་ཐོས་པ་ཕལ་ཆེར་གཞན་སོ་སོའི་ངོ་སྐལ་དང་འཚམས་པར་འཆད་སྤེལ་གང་ནུས་སུ་བགྱིས། མཁས་པའི་གྲལ་མི་གཤོག་ཀྱང་སྐུལ་བ་པོའི་ངོ་མི་ལྡོག་ཕྱིར་དང་། འགའ་ཞིག་བསྟན་པའི་ཞབས་ཏོག་ཏུའང་ཅུད་ཟད་འགྱུར་དུ་རེ་བས། བོད་སྔ་རབས་པའི་ཆོས་འབྱུང་དང་། རྙིང་བསྟན་རྣམ་གཞག། རྒྱལ་རབས། སྡོམ་གསུམ་འབྲུ་འགྲེལ། སྒྲུབ་སྐོར་མང་པོའི་ཆོག་ཁྲིགས། ཁྲིད་ཡིག་སོགས་ཀྱིས་མཚོན་རྩོམ་ཐོར་ཡོངས་བསྡོམས་པོད་གྲངས་བཅུ་ཕྲག་གཉིས་ལས་བརྒལ་བ་བྱུང་སོང་བ་ཐོས་པའི་ལག་རྗེས་རྩོམ་པར་བསྙད་དེ། རེ་དོགས་མེད་པར་དཔེ་ཐོག་ཏུ་བཀོད། དོན་གྱི་སྙིང་པོ་འདྲེན་པའི་མཆོག་དམ་པ་རྣམས་ཀྱི་བཀའ་དྲིན་ལ་བརྟེན། དག་སྣང་གི་བློ་མིག་མ་ལྡོངས་ཙམ་ནས་གཞན་གྱི་ཆོས་དང་གང་ཟག་སུ་ལའང་ལོག་ལྟ་སྐུར་འདེབས་ཆོས་སྤོང་གི་ལས་ངན་བསགས་མ་མྱོང་ཞིང་། རང་སེམས་གཡོ་སྒྱུ་སྤངས་པའི་བསམ་པ་བཟང་པོ་ཞིག་ལ་རྟག་པར་སློབ་བཞིན་པ་ཡིན་སྟབས། སྟོན་པ་ཐུགས་རྗེ་ཅན་གྱི་འཁོར་རྣམ་བཞིའི་གྲལ་རིམ་འོག་མའི་ཁྱུར་མི་ཚུད་སྙམ་པའི་དོགས་པ་སྤུ་ཙམ་མེད་པས་ན། རེས་འགའ་རང་མཐོང་གི་བསམ་བློ་ཅུང་ཟད་རེའང་འཆར་ཡོང་གིན་འདུག་པ་འདི་དམ་པའི་ཆོས་དང་མི་དགེའི་སྡིག་གང་ཡིན་ཆ་མ་འཚལ་བར་གནས་ཡོད་ཞུ་རྒྱུ་སྔགས་རྒན་བདག་གི་ལོ་རྒྱུས་ཀྱི་བསྡུས་དོན་ལགས་སོ། །

དགོན་ལུང་དགོན་པ། བྱང་གི་དགོན་ཆེན་བཞིའི་ཡ་གྱལ་ཞིག ༡༦༠༤ ལོར་རྒྱལ་བ་ཡོན་ཏན་རྒྱ་མཚོ་དང་པཎ་ཆེན་བློ་བཟང་ཆོས་རྒྱལ་ཟུང་གི་བཀའ་དགོངས་ལྟར་རྒྱལ་སྲས་དོན་ཡོད་ཆོས་ཀྱི་རྒྱ་མཚོ་ཆེད་མངགས་ཀྱིས་ཕྱག་བཏབ་པ་དང་ཕྱིས་ལྕང་སྐྱ་དང་ཐུའུ་བཀྭན་ཧོ་ཐོག་ཐུའི་གདན་ས་ཡིན། ད་ལྟའི་སྲིད་འཛིན་ས་ཁུལ་ནི་ཧོར་རིགས་རང་སྐྱོང་རྫོང་གི་ཁོངས་སུ་གཏོགས།

ཚེ་ཕྱི་མའི་བརྩེ་དུང་གི་ལས་སྐལ།

རྩོམ་པ་པོ།

རྨེ་སྤྲུལ་བསྟན་འཛིན་རྒྱ་མཚོ།
ཡིད་འོང་དབེན་པའི་རི་ངོགས་བྱང་ཆུབ་ཀྱི་དགོན་པར།།
མཚར་སྡུག་ཡིད་འཛིན་བུ་མོའི་དུངས་སེམས་ཀྱི་མེ་ཏོག།
ཁྲེལ་ལྡན་གཞུང་བཟང་བུ་ཡི་སྙིང་ག་རུ་བཞད་པས།།
ཅི་ཞིག་ལྟར་ན་བརྩེ་དུང་འདབ་བརྒྱ་དེ་གྲོལ་སོང་།།

རིགས་གཟུགས་ལང་ཚོ་གནམ་སའི་བར་ཐག་གིས་བཅད་ཀྱང་།།
མཉེན་གཤིན་སེམས་ཀྱི་འདུན་མ་གཞི་གཅིག་ལ་འབྲེལ་བའི།།
མི་ཡུལ་རྣམ་ཤེས་ཟུང་གི་སྐྱིད་སྡུག་གི་ལས་བསྐོས།།
སེམས་ཆུང་ཤུགས་རིང་འབྱིན་པའི་རྒྱུ་རྐྱེན་དུ་གྱུར་འདུག།

སྡུག་སྣང་སྐྱིད་དུ་ཚོར་བའི་འདོད་གདུང་གི་བཟི་ཁ།།
རྗེས་ཆགས་དྲོད་ཁོལ་འབར་བའི་ལང་ཚོ་རུ་སིམ་སྟེ།།
མངར་སྐྱུར་བྲོ་བ་འདྲེས་པའི་འཇིག་རྟེན་གྱི་འཚོ་བ།།
གཞོན་ཆུང་མི་ཚེའི་སྙིང་གི་བདུད་རྩི་རུ་ཐོབ་ཀྱང་།།

མ་བཅོས་སྙིང་གི་གསང་གཏམ་ཟུར་མིག་ལ་འཁྱུད་ཅིང་།།
ལུས་སེམས་འོ་ཆུ་འདྲེས་པའི་ཉམས་དགའ་ཡི་སྣང་ཤས།།
དབང་ཆེན་དཔོན་པོའི་སེམས་ཀྱི་ཚེར་མ་རུ་མཐོང་ནས།།
མཐའ་མེད་ཆགས་སྒོ་འབོད་པའི་གཡབ་མོ་རུ་གྱུར་སོང་།།

འབྲལ་ཁའི་གདུང་བ་དྲག་པོ་སྙིང་ཁ་རུ་ཟུག་པས།།
སེམས་ཀྱི་རྨ་ཁ་གསར་བར་ན་ཚ་ཞིག་བསླངས་ཏེ།།
དབང་མེད་བཙན་གྱིས་དེད་པའི་གྱེས་བྲལ་གྱི་གདུང་བ།།
ཉམ་ཆུང་ཚེ་སྲོག་འཕྲོག་པའི་གཤེད་མ་རུ་ཆས་སོ།།

བཏབ་པའི་བྲོ་ཚིག་བོར་བའི་བརྡ་འཕྲིན་དེ་འབྱོར་བས།།
རེ་ཐག་བྲལ་བའི་སེམས་པ་ངེས་འབྱུང་ལ་ཕྱོགས་ཏེ།།
མགོ་སྐྱེས་ལྕང་ལོ་བྲེགས་པའི་གཙུག་ཕུད་ཀྱི་ཟར་བུ།།
ཡིད་གཅུགས་བུ་མོའི་སེམས་ཀྱི་དྲན་རྟེན་དུ་བསྐུར་སོང་།།

ཆར་ཞོད་ཆེ་བའི་མཚན་མོའི་སྨག་རུམ་གྱི་ཁྲོད་ནས།།
མཛའ་བོའི་མིང་ནས་འབོད་ཅིང་གདུང་ཡུས་ཀྱིས་མནར་བཞིན།།
འགྱེལ་མ་ལང་གི་གོམ་སྟབས་དབེན་རི་ལ་བསྒྱུར་ཡང་།།
དཀའ་ཐུབ་བརྟུལ་ཞུགས་བླངས་པའི་སྙིང་གྲོགས་དེ་མ་མཐོང་།།

ན་ཆུང་སེམས་ཀྱི་མེ་ཏོག་མི་ཡུལ་ནས་བྲལ་ཁར།།
བརྩེ་གདུང་མཆི་མ་འཁྱིལ་བའི་ཤི་མིག་གི་འོད་ཞགས།།
རྒྱང་རིང་འཇིག་རྟེན་ཕྱི་མའི་ཞིང་ཁམས་སུ་གཏད་ནས།།
ཚེ་རྟིང་མཉམ་འཛོམས་འོང་བའི་ལས་འཕྲོ་ཞིག་བསྒྱུར་ཡོད།།

མལ་གྱི་ཐ་མར་མནལ་བའི་ཉམ་ཆུང་གི་བུ་མོས།།
ཤི་གསོན་བར་དུ་སྤྲིངས་པའི་དུང་སེམས་ཀྱི་ཡིག་ཆུང་།།
ཕྱི་ཐག་རིང་བའི་གྲོགས་ཀྱི་སྤྱན་ལམ་དུ་འབྱོར་ཚེ།།
དྲན་གདུང་སྤུ་གྲིས་སྙིང་ག་འགས་སྙམ་ཞིག་ལོས་བྱེད།།

བག་དྲང་ལས་ཀྱི་རླུང་དམར་དྲག་པོ་ཡིས་བདས་པའི།།
སྐྱོ་མོའི་སྣང་བ་ཡད་ཡུད་ཕྱད་ཕྱོད་ཀྱི་ངོགས་ནས།།
ཤི་གསོན་ངོ་འཕྲད་བྱུང་བའི་དགའ་སྐྱོ་ཡི་མིག་ཆུ།།
བར་དོའི་འཇིག་རྟེན་ཁམས་ཀྱི་རི་ཀླུང་དུ་བབས་སོ།།

མི་ལོ་བརྒྱ་སྟོང་དུ་མའི་བར་ཐག་གིས་བསྐལ་ཡང་།།
འགྲོགས་པའི་ལས་སྐལ་སྒུག་པའི་བརྩེ་དུང་གི་སྐྱོར་གར།།
སྐྱེ་ཤིའི་ཕྲེང་བ་བརྒྱུད་པའི་ལམ་ཕྲན་གྱི་ངོགས་ནས།།
ད་དུང་ཕྱི་མིག་བགྲད་ན་ཐེངས་གཅིག་ལ་ལྟ་ངེས།།