༄༅།།མེ་ཏོག་ཇི་ལྟར་མཛེས་ཀྱང་མཐའ་མར་རྙིད།།
འདས་པའི་དུས་ཚོད་ཕྱིར་ལ་འཐེན་ཐབས་མེད།།
གཅེས་སུ་འོས་རྣམས་ད་ནས་གཅེས་པར་རིགས།།
བསྒྲུབ་འོས་དོན་རྣམས་མྱུར་དུ་སྒྲུབ་ན་ལེགས།།

༄༅།། ​ནང་ཆེན་རྫོང་རིག་གནས་ཡུལ་སྐོར་ལས་ཁུངས་དང་འབྲོང་ཤོག་ཤང་མཉམ་འབྲེལ་གཙོ་སྒྲུབ་བྱས་ནས་སྐབས་གཉིས་པའི་མཐོ་སྒང་གི་སྲོལ་རྒྱུན་རིག་གནས་རྙུ་སྒ་འཁྱག་སྒར་ལས་འགུལ་དང་འབྲོང་ཤོག་ཤང་འབྲོག་པའི་རིག་གནས་བྱ་འགུལ་ལེགས་གྲུབ་བྱུང་སོང་།
囊谦县文旅局和着晓乡联合举办的第二届高原传统“牛嘎”冰雪运动节暨着晓乡游牧文化活动圆满成功！

༄༅།། ཨ་རིག་པཎ་ཆེན་བླ་མའི་རིང་བསྲེལ་མྱོང་གྲོལ་རིལ་བུའི་རྣམ་བཤད།
ལྔ་རིག་ཤེས་བྱའི་ཆོས་ཀུན་མ་འདྲེས་གཟིགས།།
ཚུལ་མིན་ཉེས་སྤྱོད་ཕྲ་མོའི་སྐྱོན་ལས་གྲོལ།།
རྒྱལ་བསྟན་གཞིར་བཞེངས་བསླངས་བའི་མཛད་བཟང་ལྡན།།
འབྲེལ་ཚད་དོན་ལྡན་བླ་མའི་ཕྱག་གིས་སྐྱོངས།།
སྐབས་འདིར་གང་གླེང་བར་བྱ་བ་ནི།རིགས་དང་དཀྱིལ་འཁོར་ཀུན་ཀྱི་ཁྱབ་བདག སྙིགས་དུས་རྒྱལ་བསྟན་གསལ་བའི་སྣང་བྱེད། མཁས་གྲུབ་ཡོན་ཏན་རྒྱ་མཚོའི་མཛོད་འཛིན།འབྲེལ་ཚད་དོན་ལྡན་གྱི་དམ་པའི་སྐྱེས་བུ་ཆེན་པོ། ཐུགས་རྗེ་དང་བཀའ་དྲིན་མཚུངས་པ་མེད་པའི་མངའ་བདག ཀུན་གཟིགས་མཁན་ཆེན་བླ་མ་༧པདྨ་ཚེ་དབང་ལྷུན་གྲུབ་དཔལ་བཟང་བོ་གང་ཉིད་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་བརྙེས་པའི་འབྲས་རྟགས་སུ། ཕྱི་རབས་གདུལ་བྱའི་རྟེན་སྐལ་དུ་ཤར་བའི་ངོ་མཚར་བའི་མཛད་པ་རྒྱ་ཆེར་སྣང་བའི་ཆ་ཤས།ཡུངས་འབྲུ་ལྟ་བུའི་རིང་བསྲེལ་བདུན་ཆ་གཅིག་གིས་གཞིར་བྱས། སྐུ་གདུང་རིང་བསྲེལ། གཟུངས་ཆུའི་རིང་བསྲེལ། སྐུ་བལ་རིང་བསྲེལ་སོགས་ཀྱི་སྐོར་ལ། གདུང་ཚྭ། གདུང་རུས། གདུང་ཁྲུས་རིལ་བུ། ཤངས་ཁྲག སྐུ་ཤའི་དུམ་བུ། སྐུ་མཚལ། དབུ་སྐྲ། ན་བཟའ། སྐུ་ཆིངས། ཕྱག་འཕྲེང་སོགས་དམ་རྫས་གཞན་གྱིས་བསྲེ་བསླད་གང་ཡང་མེད་པར་རྗེ་ཉིད་ཀྱི་སྐུ་ཆས་ཡོ་བྱད་སོགས་རྟེན་སྣ་སུམ་ཅུ་ལྷག་ཙམ་ཕྱོགས་གཅིག་ཏུ་བསྡུས་ནས་སྲེག་སྦྱོང་བྱི་དོར་གྱི་བྱ་བ་རྣམས་ཚུལ་བཞིན་དུ་བྱས་ཤིང་། གཞན་ཡང་དུག་རིགས་མ་འདྲེས་པའི་སྨན་སྣ་བཟང་དྲུག གེ་སར་གསུམ། འབྲས་བུ་གསུམ། སྲོ་དམར། སེ་འབྲུ་ལ་སོགས་པའི་སྦྱོར་སྡེ་ཚད་ལྡན་བྱས་པ་ཡིན། དེ་རྗེས་མྱོང་གྲོལ་དམ་རྫས་ཀྱི་ཕུང་པོ་འདི་ཉིད་ཀུན་གཟིགས་མཁན་ཆེན་བླ་མའི་གཟིམས་ཆུང་ནང་དུ་གདན་དྲངས་ཏེ། ཚད་མའི་སྐྱེས་བུ་དམ་པ་གང་མང་རེས་བྱིན་ཕབ་བྱིན་བརླབས་ཀྱི་ལས་རིམ་མང་ཙམ་བྱས་ཡོད། གདན་ས་སྔ་འགྱུར་ཨ་རིག་ཆོས་གྲྭའི་རྒྱུད་ལུགས་འཇམ་དཔལ་ཞི་བའི་སྒྲུབ་པའི་སྐབས་སུ་ཚུལ་བཞིན་སྒྲུབ་པར་མ་ཟད། ཕྱིས་སུ་དམ་གཙང་ཚུལ་ལྡན་གྱི་སློབ་བུ་འགས་ཞག་ལྔ་ལ་སྨིན་ལུགས་རྡོ་རྗེ་སེམས་དཔའི་སྒྲུབ་པ་དང་། མྱོང་གྲོལ་དམ་རྫས་སྒྲུབ་ཐབས་ཀྱི་ལས་རིམ་ལ་བརྟེན་ནས་ཚུལ་བཞིན་སྒྲུབ་པ་ཡིན། ཀུན་གཟིགས་མཁན་ཆེན་བླ་མའི་མྱོང་གྲོལ་དམ་རྫས་ཕྱོགས་བསྡུས་འདི་ཉིད་ཐུགས་སྲས་བུ་སློབ་དམ་པ་མཁན་ཐུབ་བསྟན་སྨོན་ལམ་གྱིས་ཐོག་མཐའ་བར་གསུམ་ཀུན་ཏུ་ཐུགས་བཀོད་གནང་ཞིང་། རྗེས་དྲན་འདས་མཆོད་ལས་སྒྲུབ་ཁང་གིས་གཙོ་སྒྲུབ་མཛད་པ་ཡིན། འདི་ལྟ་བུའི་མྱོང་གྲོལ་རིལ་བུ་འདི་ཉིད། རིས་སུ་མ་ཆད་པའི་འགྲོ་བ་དག་གི་ཁར་སོང་ན་དགོས་པ་ཤིན་ཏུ་ཆེ་ཞིང་འབྲེལ་ཚད་དོན་དང་ལྡན་པར་འགྱུར་བ་ཡིན་ཏེ། གྲོལ་ལམ་གྱི་མན་ངག་ལས། དེ་ལྟ་བུ་ཡི་དམ་རྫས་དེ།། གང་གིས་ཟོས་པས་ཉམས་ཆགས་སྦྱོང་།། དམ་ཚིག་དངོས་གྲུབ་ཀུན་ཐོབ་ནས།། འཕོ་མེད་བདེ་ཆེན་འགྲུབ་པར་འགྱུར།། ཞེས་སོགས་རྒྱ་ཆེར་གསུངས་ཡོད་པའི་ཚུལ་ལ་ངེས་ཤེས་བསྐྱེད་པར་བྱའོ།།

རྣམ་དཀར་བསོད་ནམས་བྱེ་བས་ཡོངས་གྲུབ་པའི།།
མྱོང་གྲོལ་བདུད་རྩིའི་རིལ་བུ་ཡིད་བཞིན་ནོར།།
གང་གི་ཁར་སོང་སྒྲིབ་པའི་འཆིང་ལས་གྲོལ།།
བྱང་ཆུབ་མཆོག་གི་གོ་འཕང་ཐོབ་གྱུར་ཅིག།
ཀུན་གཟིགས་མཁན་ཆེན་བླ་མའི་འདས་མཆོད་ལས་སྒྲུབ་ཁང་གིས་སྤེལ། ༢༠༢༤