བརྩོན་པ་མེད་པའི་རྨི་ལམ་འཇའ་མཚོན་བཞིན།།
སྒྱིད་ལུག་ཆེ་བའི་རེ་བ་སྟོང་བསམ་ཙམ།།
མྱ་ངན་མགོ་ལ་ཁུར་བའི་ས་མཐའི་བུ།།
སྐྱོ་སྐྱོ་ཅི་ཙམ་གནང་ཀྱང་སུ་ཡི་ཤེས།།

དད་པ་ཆུང་བས་བློ་མིག་མུན་པས་བསྒྲིགས།།
ཤེས་རབ་མེད་པའི་བླང་དོར་འབྱེད་ཐབས་བྲལ།།
བློ་གྲོས་མེད་པའི་སྐྱོ་སྡུག་ཁུར་དུ་ལྕི།།
བྱང་ཁོག་སྟོད་ཀྱི་སྐྱོ་བ་སུ་ལ་བཤད།།

མི་ཁའི་རྦ་རླབས་འཁྱིལ་བའི་གཞན་ཡུལ་ན།།
དྲོད་འཇམ་བྱམས་བརྩེ་སྟེར་བའི་ཕ་མ་མེད།།
འཚོ་བའི་དམིགས་ཡུལ་བྱེ་མ་ཡི་འཆང་བུ།།
དགའ་སྐྱོ་འདྲེས་མའི་སྣང་བ་ཞིག་སྐྱེས་བྱུང་།།

༥/༡༦ ____

ཅི་ཡང་མི་འཁྱུངས་ཤིང་གང་ཡང་མི་ནུས་པའི་གནས་བབས་འདི་ལ་ང་དངོས་གནས་སུན་ནས་བྱུང་། ཆ་རྒྱུས་དབེན་པའི་ཐར་ལམ་གང་ཞིག་གི་ཆེད་དུ་རང་ཉིད་ཀྱི་མི་ཚེ་འདི་ལྟར་བསྐྱལ་དགོས་པ་དྲན་ན་རང་སེམས་ལ་མི་འོས་པ་དང་འདང་མི་ཕོགས་པའི་ཚོར་བ་གང་མང་ཞིག་འདུག ཡིན་ཡང་མི་མང་དག་ཅིག་འདི་ལྟར་འཚོ་བར་རིག་ན་རྒྱུན་ལྡན་ཞིག་གི་རྣམ་པར་མངོན་ཞིང་རང་སེམས་ལ་དང་ལེན་བྱེད་དགོས་པའི་སྐུལ་མ་ཡང་བྱེད་ཀྱིན་འདུག གང་ལྟར་ང་རང་ལམ་འདི་ལ་མི་དགའ་བ་མ་ཡིན་པར་སྤྱི་ཚོགས་འདི་དང་བསམ་གཞིག་མང་དག་ཅིག་གིས་ང་རང་ལྷོད་པོ་འདུག་ཏུ་མི་འཇུག་པ་འདྲ།

མི་ཆེན་དཔོན་པོ་ཡིན་ཡང་སྐྱོན་ཆ་ཡོད།།
མི་གཡོག་ཁོལ་པོ་ཡིན་ཡང་དགེ་མཚན་ལྡན།།
དགེ་ཚན་ཁོ་ནས་བརྒྱན་པ་དཀོན་ཀྱང་དཀོན།།
སྐྱོན་ཆ་རྐྱང་པས་གཏུམས་པ་ག་ལ་ཡོད།།

གྲོགས་པོ་ཡིན་ཡང་བརྩེ་བ་ལྷད་ཅན་ཡོད།།
དགྲ་བོ་ཡིན་ཡང་གུས་བཀུར་སྲོལ་ཡོད་སྲིད།།
ལྷད་དང་འདྲེས་པའི་བརྩེ་བའི་གཡོ་མདངས་ལས།།
ཆགས་སྡང་གསལ་ཆ་བསྟེན་པའི་དགྲ་ལ་དད།།

ང་དགའ་ཁྱོད་ཡག་བྱུང་ན་ཧ་ཅང་ལེགས།།

ང་མཛེས་ང་གཅེས་ཟེར་ན་མི་ཆོག་ཅི།།

ཁྱོད་ངན་ཁྱོད་ཞན་ལབ་ལབ་མང་དྲགས་ན།།
མཚོན་མེད་གཏམ་གྱིས་གཟུགས་མེད་བློ་ཁ་རྨ།། https://t.cn/R2Wx665