࿐དེ་ཡང་རྒྱལ་སྨན་སློབ་དཔོན་ཆེ་མོ་གོ་འཇོ་དབང་འདུས་མཆོག་གིས། ཉམ་ཐག་དབུལ་འཕོངས་ལ་སྨན་སྦྱིན་གནང་རྒྱུའི་ལམ་ལུགས་ནི། ༧མི་དབང་པཎྜི་ཏ་སངས་རྒྱས་རྒྱ་མཚོའི་སྐུ་དུས་ནས་སྲོལ་བཙུགས་པ་དང་། དེ་ནས་རིམ་བཞིན་ལྕགས་རི་རིག་བྱེད་གླིང་ལ་བརྒྱུད་ཅིང་། དེ་ནས་ལྷ་ས་སྨན་རྩིས་ཁང་ལ་བརྒྱུད་པ་དང་། ད་ཙམ་བགྲང་བྱ་སུམ་རྒྱ་ལྷག་ཙམ་གྱི་ལོ་རྒྱུས་ལྡན་པའི་དམིགས་བསལ་གྱི་སྲོལ་བཟང་ཞིག་རེད་ཅེས་གསུངས་པ་བཞིན། ངེད་ནྱ་གྲོ་ཏ་བོད་སྨན་ལག་ལེན་ཚོགས་ཆུང་གི་རྡོ་རྗེ་སྤུན་གྲོགས་ལྔ་པོ་རེ་གཟའ་པ་སངས་ཀྱི་ཕྱི་དྲོ་བོད་མིའི་འབྱུང་གནས་ཡར་ཀླུངས་རྩེད་ཐང་ནས་རྡོག་ཐོན་བྱས་ཏེ། ཡར་གཞི་ལྷ་ཡི་ཐེམ་སྐས་ཡར་འབྲོག་སྒང་པའི་ཆར་གཏོགས་ཀྱི་མདོ་ཆོས་གཞུང་དུ་བསྐྱོད། ལམ་བར་དུ་གཡུ་འབྲུག་སྔོན་མོ་ས་ལ་འཕོས་པ་འདྲ་བའི་ལུ་གུ་ལ་མོ་བརྒལ་ཞིང་། འབྲོག་སྡེ་ཆེན་མོ་མཚོ་སྨད་བྲག་རྩ་དང་ཡར་འབྲོག་སྐར་མ་གླིང་གི་དཀྱེལ་ཡངས་ཁྲ་ཆུང་མིག་གི་གོང་བུར་གླན་ཏེ། སྣུབས་མཚོ་ཆེ་མོའི་རླབས་སྒྲར་སེམས་རྩ་གཉོམ་པོས་རྣ་བ་བླག་ཞོར་ཆུ་ཚོད་བཞིའི་རླངས་འཁོར་གྱི་བགྲོད་ཞུད་འོག་ཡུལ་མདོ་ཆོས་ག་ལ་བ་འདིར་འབྱོར། ནུབ་གཅིག་མདོ་ཆོས་ཤང་ཐོག་ཏུ་ཞག་སྡོད་བྱས་རྗེས། རེ་གཟའ་སྤེན་པའི་ཉིན་མོ་སྟེ། རྒྱལ་བ་ལྷ་ལས་བབས་པའི་ཁྱད་འཕགས་ཀྱི་དུས་ཆེན་ཉིན་མོར་མདོ་ཆོས་ཤང་གདོང་རྒྱ་གྲོང་ཚོར་སྨན་སྦྱིན་གསོ་བཅོས་ཀྱི་ཞབས་ཞུར་བསྐྱོད། སླར་ཡང་ཡུལ་འདིའི་མང་ཚོགས་ཀྱི་ལྷད་མེད་ཀྱི་འཛུམ་མདངས་དང་། ཁ་ཞེ་གཉིས་མེད་ཀྱི་སྨན་པར་ཡིད་ཆེས་དང་བློ་གཏད་ལིངས་བཅོལ་གྱི་སྐོམ་པ་ཆུ་འདོད་ལྟ་བུའི་རེ་སྒུག་གི་མིག་ཟུང་། བཅོས་མིན་ལྷག་བསམ་འདི་དག་མིག་གི་མཐོང་ཞིང་། སེམས་ཀྱིས་ཚོར་དུས། ཕྱིའི་འབྱུང་བཞི་འཁྱགས་པས་བསྡམས་རུང་། ནང་སེམས་པ་དྲོད་ཀྱིས་གཏམས་སོང་ལ། ད་ཐེངས་ཀྱི་སྨན་སྦྱིན་གསོ་བཅོས་ཀྱི་བགྱི་བ་འདི་ཆུད་ཟོས་སུ་སོང་མེད་པར་མང་ཚོགས་ཀྱི་ཚོད་མཐོའི་གདེང་འཇོག་དང་། མང་ཚོགས་དང་ངེད་ཅག་གི་སེམས་པ་འོ་ཆུ་གཅིག་ཏུ་འབྲེལ་བ་དེ། རྒྱུད་ལས་གསུངས་པའི་གསོ་བྱ་གསོ་བྱེད་བསོད་ནམས་ལས་ཀྱིས་འབྲེལ། ། ཞེས་གསུངས་པ་ཇི་བཞིན་འདི་ནི་རང་རེའི་ཚོགས་ཀྱི་ཚེ་རབས་དུ་མའི་ལས་འབྲེལ་དང་བསོད་ནམས་ཀྱི་འབྲས་བུ་ཐེངས་འདིར་སྨིན་པར་སེམས་སོ། ། རྒྱལ་སྲས་ཆེན་པོ་ཞི་བ་ལྷའི་ཞལ་སྔ་ལས། འགྲོ་བ་ནད་པ་ཇེ་སྙེད་པ། །ནད་སོས་གྱུར་གྱི་བར་དག་ཏུ། ། སྨན་དང་སྨན་པ་ཉིད་དག་དང་། ། དེ་ཡི་ནད་གཡོག་བྱེད་པར་ཤོག ། ཅེས་གསུངས་པ་བཞིན། མ་འོངས་སྨན་དོན་གྱི་ལམ་བུར་སེམས་བསྐྱེད་དང་སྨོན་ལམ་འདི་འདྲ་བར་རྟར་དྲང་ཏེ་འགྱོད་མེད་གདེང་ཚད་ལྡན་པའི་ངང་ནས་ཆས་པར་བྱའོ། །#སྨན་སྦྱིན་ལེའུ།##义诊服务# https://t.cn/z822Mu0
࿐སྟོན་པ་འཇིག་རྟེན་ཁམས་སུ་བྱོན་པ་དང་།།
བསྟན་པ་ཉི་འོད་བཞིན་དུ་གསལ་བ་དང་།།
བསྟན་འཛིན་བུ་སློབ་བཞིན་དུ་མཐུན་པ་ཡིས།།
བསྟན་པ་ཡུན་རིང་གནས་པའི་བཀྲ་ཤིས་ཤོག།
བསྟན་པ་ཉི་འོད་བཞིན་དུ་གསལ་བ་དང་།།
བསྟན་འཛིན་བུ་སློབ་བཞིན་དུ་མཐུན་པ་ཡིས།།
བསྟན་པ་ཡུན་རིང་གནས་པའི་བཀྲ་ཤིས་ཤོག།
࿐འཇིག་རྟེན་ཕོ་མོའི་བརྩེ་དུང་ནི་ཕྱི་ཚུལ་ནས་བལྟས་ན་དམ་བཅའ་རི་ལས་བརྟན་ཅིང་ཚ་ཚ་འུར་འུར་གྱི་རྣམ་པ་ཞིག་སྟེ། མི་ཡུལ་གྱི་ཆེས་མཛེས་སྡུག་ལྡན་པ་དེ་ལོས་ཡིན་སྙམ་པ་ལྟར་ཡིན་རུང་། དོན་དངོས་སུ་བརྩེ་བ་ཡོད་པས་ཐོབ་ཤོར་དང་། རེ་དོགས་སྲིད་པ་དང་། དུང་བ་ཡོད་པས་སེམས་ཁྲལ་དང་འཇིགས་སྣང་ཡོད་པ་རེད། དེ་ཡང་བཅོམ་ལྡན་འདས་ཀྱིས་མདོ་མྱང་འདས་སུ།འདོད་པས་ཡིད་ནི་འཁྲུག་འགྱུར་ཅིང་། ། འདོད་པས་འཇིགས་པ་འབྱུང་བར་འགྱུར།། འདོད་པ་དག་དང་བྲལ་བ་ན།། འཁྲུགས་དང་འཇིགས་ལས་ཐར་བར་འགྱུར།། ཅེས་གསུངས་པ་ལྟར་རོ།། ___མཁན་བསོད་དར་རྒྱས་ནས།
✋热门推荐