ཐུགས་རྗེའི་སྤྱན་ལྡན་རྩ་གསུམ་སྲུང་མའི་ཚོགས། །
ཕ་བཟང་བུ་ཡི་གྲོགས་སུ་ད་བྱོན་ལ། །
བར་ཆད་བདུད་ཀྱི་གཡུལ་ལས་རྒྱལ་བ་དང་། །
མཐུན་རྐྱེན་ལེགས་ཚོགས་ཆར་དུ་འབེབས་པར་མཛོད། །

[合十][合十][合十]

བླ་མ་ལ་སྐྱབས་སུ་མཆིའོ།།སངས་རྒྱས་ལ་སྐྱབས་སུ་མཆིའོ།།
ཆོས་ལ་སྐྱབས་སུ་མཆིའོ།།དགེ་འདུན་ལ་སྐྱབས་སུ་མཆིའོ།།
__________________________
ན་མོ་བུད་དྷཱ་ཡ། ན་མོ་དྷརྨ་ཡ། ན་མཿསཾ་གྷཱ་ཡ། ཐར་མདོ་ལས།
南無佛陀，南無達摩，南無僧伽。 《聖大解脫經》
____________________________
སྡིག་པའི་ཆོས་ནི་སྤང་བར་བྱ། དགེ་བའི་ཆོས་ནི་འཕེལ་བར་བྱའོ།། ཐར་མདོ་ལས།
恶法可离。善法可崇。《聖大解脫經》
དུས་ཆེན་སུམ་འཛོམས་ཀྱི་ས་ག་ཟླ་བར་ཅི་ནུས་ཀྱིས་དགེ་བ་ལ་བརྩོན་པར་བྱའོ།།

དཀར་ཟས་ཟླ་བ་བསུ།

གཡོ་འཕྲུལ་སྒྱུ་མའི་འདུ་ཤེས་སྣ་ཚོགས་ངང་།།
ཚེ་དང་སྲོག་ལ་རྔམ་པའི་གདུག་སྤྱོད་ཀྱིས།།
ཤ་ཁྲག་ཟས་ལ་སྲེད་པའི་སྡིག་ལྟུང་ཉིད།།
སྤང་ནས་དཀར་ཟས་འཚོ་བ་བསྟེན་པར་བྱ།།

རྣམ་གསུམ་ཆོས་གོས་གྱོན་པའི་ཨོ་ཟོབ་དང་།།
རལ་བ་གཟན་དཀར་འཆང་བའི་མངོན་རློམ་གྱིས།།
ཚེ་སྲོག་སྣང་མེད་བྱས་པའི་ཤ་སྤང་ནས།།
ཆོས་མཐུན་ཁ་ཟས་གཙང་མ་བསྟེན་པར་བྱ།།

རང་དབང་འདྲ་གླེང་བཞིན་དུད་འགྲོ་ཡི།།
ཚེ་དང་སྲོག་ལ་དངོས་སུ་རྒོལ་བ་ཡི།།
ཆོས་མེད་ཀླ་ཀློའི་བསམ་སྤྱོད་དོར་བྱས་ཏེ།།
ཤ་ཁྲག་ཟས་ཀྱི་སྡེར་ཁ་སྤང་བར་བྱ།།

ས་ག་ཟླ་བ་ཤར་རུང་མ་ཤར་རུང་།།
སྲོག་ལས་གཅེས་པའི་དངོས་གཞན་མ་མཆིས་པས།།
སྡིག་སྤྱོད་སྐྱེ་བོའི་ངག་ལ་མི་ཉན་པར།།
འཇིགས་རུང་སྡིག་ཟས་འཚོ་བ་སྤང་བར་བྱ།།

བདག་ཀྱང་ཤ་ཁྲག་འཚོ་བ་སྤང་བྱས་ནས།།
མི་ལོ་བཅོ་བརྒྱད་ཙམ་ཞིག་ལོན་གྱུར་ཀྱང་།།
སླར་ཡང་ཚེ་སྨད་ལུས་སྲོག་ནམ་ནས་བར།།
དཀར་གསུམ་ཟས་ཀྱི་འཚོ་བས་རྟག་འཚོ་ཤོག།

སྡིག་སྤྱོད་སྲིན་པོ་ཁྲོས་པའི་ཧམ་སེམས་ཀྱིས།།
ཉམ་ཆུང་དུད་འགྲོའི་སྲོག་ལ་རྔམ་པ་ཡི།།
མི་གཟུགས་འདྲེ་སེམས་མངའ་བའི་གཡོ་འཕྲུལ་ལ།།
ཚེ་རབས་ཀུན་དུ་འཇུག་པར་མ་གྱུར་ཅིག།

ཐེག་ཆེན་བསྟན་པའི་སྙིང་པོ་བྱང་ཆུབ་སེམས།།
ཚུལ་བཞིན་རྒྱུད་སྐྱེས་རྟག་ཏུ་ཉམས་མེད་པར།།
བསྟན་དང་འགྲོ་བའི་ཁུར་ཆེན་ཁུར་བ་ལ།།
རྒྱལ་དང་རྒྱལ་སྲས་འདྲ་བར་བདག་གྱུར་ཅིག།

ས་ག་ཟླ་བ་འཆར་ལ་སྐབས་སུ་དཀར་ཟས་ཀྱི་འཚོ་བ་ལ་རོལ་བའི་གྲྭལ་མཐར་གནས་པ་གུ་རུ་ཉི་མར་འབོད་པ་དེས་སོ། ། 2021 5

11