བརྩེ་ཆེན་བདུད་རྩིའི་ཐིགས་ཕྲེང་རེ་རེས་ཀྱང་།།
འགྲོ་བའི་སྡུག་བསྔལ་མ་ལུས་གཙང་སེལ་བའི།།
མཁའ་འགྲོ་ཀུན་གྱི་གཙོ་མོ་ཏཱ་རེ་མས།། སྐུ་གསུང་ཐུགས་ཀྱི་དངོས་གྲུབ་སྩོལ་མཛོད་ཅིག།——འོད། https://t.cn/R2d2dME

ཁཱར་བྷེ་ཁཎ་གྱི་གློག་བརྙན་<ཞའོ་ལའོ་ལིས་ཀྱི་ཁུ་བོ་ལྷ་སྤྲེལ།>ཞེས་པར་བལྟས་ཤིང་། དེ་ནི་པ་ཁེ་སི་ཐཱན་དང་རྒྱ་གར་གཉིས་ཀྱི་འཐབ་རྩོད་ལ་རྒོལ་བ་གཏོང་བ་བརྗོད་གཞིར་བྱས་པའི་སྒྱུ་རྩལ་གློག་བརྙན་ཕུལ་དུ་བྱུང་བ་ཞིག་ཡིན་ཞིང་། གློག་བརྙན་གྱི་མགོ་མཇུག་བར་གསུམ་ཀུན་ན་འཐབ་རྩོད་དང་ཞེན་ཁོག་ལ་ཅོ་འདྲི་བའི་མཁའ་དབུགས་ཤིག་གིས་ཁྱབ་ཏེ་ཡོད་ཅིང་། ཏག་ཏག་མི་སེམས་ཤིན་ཏུ་རབ་ཏུ་གཡོ་བར་བྱེད་པའི་ཕ་བུའི་བརྩེ་བ་དང་ཡིད་རྟོན་།བརྩེ་དུང་གིས་ཕྱུག་པའི་ནང་སེམས་ཀྱི་མཛེས་སྡུག་རེད། གློག་བརྙན་ཧྲིལ་བོའི་བར་མཚམས་སྦྲེལ་བྱེད་ལྟ་བུ་རུ་གྱུར་ཡོད་པའི་ཁ་ཆེའི་ཆོས་དཔོན་དེའི་བློ་གཤོག་ཡངས་པོའི་འོད་ཟེར་གྱིས་ཁོ་ཚོའི་ནང་སེམས་ལ་དྲོད་ཁོལ་བསྩལ་ཅིང་། སྟོད་ཀྱི་ཁག་ནའང་འུ་ཐུག་ཐབས་ཟད་དུ་གྱུར་བ་རེ་འགའ་ཡོད་པ་དེས་ད་གཟོད་ནང་སེམས་ཀྱི་བརྩེ་དུང་དང་སྙིང་རྗེ་ལ་སུས་ཀྱང་བསྒྲུན་དུ་མེད་པ་མཚོན་ལ། ཡང་བསྐྱར་མཆོང་ལྡིང་གཅིག་གིས་མཇུག་ཏུ་ཐོན་ལ་བརྙན་མིག་གི་བཀོད་པ་ཆེས་ལེགས་ཤོས་ཡང་དེ་རུ་ཡོད་སྙམ་སྟེ། ཁུ་བོ་བཙོན་ལས་ཐོན་ཏེ་མི་ཚོགས་ཀྱི་ཀི་སྒྲའི་ཁྲོད་མཐའ་མཚམས་ཀྱི་ཆུ་བོ་བརྒལ། སྔོན་ན་བསུ་མ་ཡོད་ཅིང་རྗེས་ན་སྐྱེལ་མ་ཡོད། མི་རེ་རེ་ཞི་འཇམ་དང་སྙིང་རྗེས་བརླམས་ཏེ་ནང་སེམས་ལྷོག་ལྷོག་ཏུ་གདུ། སྐད་ཅིག་མ་ཡི་ཡུན་དེ་ལ། སྐྱེལ་མར་ཡོང་བའི་བུ་མོ་ཆུང་ཆུང་དེ་མཐའ་མཚམས་ཀྱི་ལྕགས་དྲར་འཐམ་ནས་ཁ་ཤ་ཤུགས་ཀྱིས་འགུལ། གློ་བུར་མི་ཚོགས་ཀྱི་སྐད་སྒྲ་ཇེ་དམའ་ནས་ཇེ་དམར་གྱུར། བུ་མོ་དེའི་ཤེད་ཤུགས་ཀྱི་གསེང་ནས་སྐད་སྒྲ་ཕྲ་ལ་རིང་བ་ཞིག་ཐོན། ཁོ་མོས་རང་གི་མགྲིན་པར་རེག་ཙམ་བྱས། ཁོ་མོས་ཡང་བསྐྱར་ཤུགས་ཀྱིས་བོས། ཁུ་བོ། ཁུ་བོ། ལྷ་ལའོ་མའོ་ཁྲི་ལོར་ཤོག

ཆུ་བོ་དེའི་དཀྱིལ་ནས་ཕྲད་ཅིང་། ལྷ་ལའོ་མའོ་ཁྲི་ལོར་ཤོག སྐད་སྒྲ་དེས་ནམ་མཁའ་དེ་ཧར་གྱིས་བཅད། སྐད་སྒྲ་དེས་འཐབ་རྩོད་ལ་གྱེས་བརྡ་བཏང་། དེ་ནི་སྒྱུ་རྩལ་གྱི་ཉིང་བསྡུས་རྩལ་ལས་བྱུང་བའི་ལྷུན་ཆགས་མཛེས་སྡུག་གོ།།/འབྲོང་བུ། https://t.cn/R2dbnWW

ཆོས་བོན་ཕྱག་རྒྱ་བཞི་ཡིས་གཅིག་ཏུ་བཅིངས།

དེའང་སངས་རྒྱས་ཤཱཀྱ་ཐུབ་པས། བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་ཐེག་པ་ཚེན་པོའི་མདོ་ལས།

ཆོས་ཐམས་ཅད་ནི་དེ་བཞིན་གཤེགས་པས་བསྡུས་ཏེ་ཆོས་ཀྱི་མདོ་བཞིར་འདུས་པར་བྱས་སོ། །བཞི་གང་ཞེ་ན། འདི་ལྟ་སྟེ། འདུ་བྱེད་ཐམས་ཅད་མི་རྟག་པ་དང་། འདུ་བྱེད་ཐམས་ཅད་སྡུག་བསྔལ་བ་དང་། ཆོས་ཐམས་ཅད་བདག་མེད་པ་དང་། མྱ་ངན་ལས་འདས་པ་ཞི་བའོ། །ཞེས་གསུངས་ཤིང་།

སྟོན་པ་གཤེན་རབ་མི་བོ་ཆེས། ཐུགས་རྗེ་སེམས་དཔའི་ཐེག་པ་བསྟན་པ་ལས།

འདུས་བྱས་ཐམས་ཅད་ཀྱི་མདོ་མི་རྟག་པ། ཟག་པ་དང་བཅས་པ་ཐམས་ཅད་ཀྱི་མདོ་སྡུག་བསྔལ་བ། མྱ་ངན་ལས་འདས་པ་ཐམས་ཅད་ཀྱི་མདོ་ཞི་བ། བོན་ཐམས་ཅད་ཀྱི་མདོ་བདག་མེད་པའོ། །ཞེས་གསུངས་ཏེ།

དེ་ལྟར་བན་བོན་གྱི་སྟོན་པ་སོ་སོས། རང་རང་གི་བསྟན་པ་སྡོམ་བཞིར་བསྡུས་ནས་གསུངས་ཤིང་། སྡོམ་བཞིའི་ཚིག་རིས་ཅུང་ཙམ་རེ་མི་འདྲ་བ་ལས་དོན་གནད་གཅིག་ཏུ་བབ་འདུག་པར་རིགས་པས་གྲུབ་སྟེ།

མི་ཕམ་འཇམ་དབྱངས་རྣམ་རྒྱལ་རྒྱ་མཚོ་མཆོག་གིས། སྲིད་པ་འཕྲུལ་གྱི་ཇུ་ཐིག་གི་དཔྱད་དོན་སྣང་གསལ་སྒྲོན་མེ་ལས།

གདུལ་བྱ་རང་རང་སྣང་ངོ་རུ།  །ཕན་བདེ་མཛད་པའི་སྤྲུལ་སྐུ་ལ།  །སོ་སོའི་སྟོན་པ་ཉིད་དུ་བཟུང༌།  །བན་དང་བོན་ཞེས་སོ་སོར་དབྱེ།  །ཀུན་རྫོབ་རྒྱུ་འབྲས་བསླུ་མེད་དང༌།  །དོན་དམ་བདེན་མེད་གནད་ཀྱིས་ནི།  །མི་འགལ་ཕྱིར་ན་དགོངས་པ་གཅིག  །རྒྱལ་པའི་རྣམ་འཕྲུལ་བསམ་མི་ཁྱབ།  །

ཅེས་བོན་ནང་པས། ཀུན་རྫོབ་རྒྱུ་འབྲས་བསླུ་མེད་དང་། དོན་དམ་བདེན་མེད་དུ་གསུངས་པ་དེས། བོན་ནང་པ་ནི་བསྟན་པ་རྣམ་དག་ཏུ་རིགས་པས་གྲུབ་པར་བཞེད་པ་ལྟར་ཡིན་ནོ།།

༢༠༡༧/༡༠/༠༥ སྟེ་རྒྱལ་སྤྱིའི་དགེ་རྒན་དུས་ཆེན་དུ་གྲགས་པའི་ཉིན་གངས་ཆབ་ཀྱིས་སྤེལ།