ꑸꑽꂷꉂꐪ
-ꁮꒀ
ꆎꆹꈁꋽꅱꋽ，ꈪꑌꇔꍣꍈꉬ
ꊾꂿꇁꇬꒈꌠꃅꊾꀠꏲꇬꎷ
ꈍꄮꇬꉬꀋꐚ
ꉠꉌꂵꂶꌠꍯꅽꊂꈹꁧ
ꆎꂿꑎꏦꄉꈌꑽꉐꑽꈌꉉꅇꀋꐛꇬꎷ
ꈍꃅꉂꇁꑟꅇꄜꆎꇰꂯ
ꆏꒉꇁꇬꂙꃨꌟꃅꎔ
ꉠꉌꃀꄚꐊꂄꅜꉈꅞ
ꈍꃅꆏꀋꉂꂯ
ꂓꀋꐥꌠꉂꊿ
ꉡꆹꄸꈐꉂꅇꌧꆎꇰꂿꉂ
ꆎꐊꄉꊫꂫꉂꇗꊪꑟꉂ
ꀋꄸꄷꉡꆹꅽꏯꉢꆎꉂꄷꇬ
ꆏꑴꌠꀋꇷꋠꄷꄡꄹ
ꊾꑭꁬꃷꌡ，ꋧꃅꋍꒈꒊ
ꉂꐪꈝꃀꆹꆼꑐꇨ
ꈍꃅꂱꆓꑲꆀꆎꋒꇁꄎꀋꐚ
ꀋꄸꄷꆎꑌꉡꉂ
ꄚꄉꈜꑽꈢꋒꁧꇬꆹ
ꊂꑋꐮꉂꇁꇬꌋꐓꑓꁴꇬꇉꑌꌠꎮꑑꅉ
ꀋꄸꄷꆎꆹꉡꉌꀋꃹꄷꆏ
ꉂꐪꆹꏟꈯꃅꀨꎹꄉ
ꊂꑋꌞꌌꆏꉂꌠꌺꄿꁵ

ꀊꌱꑘ(ꋍ)
ꎔꇁꃨꌠꁦꀑꂙꃨꐥ，
ꂙꃨꀕꇬꁧꇁꇉꈽꅪ，
ꉜꇊꎔꇊꑟꑵꄸ。
ꐔꇁꑌꌠꉷꃅꎬꐚꐥ，
ꋠꅉꐓꅉꑟꑵꄸ。
ꑌꇁꃘꌠꁮꑟꃘꌺꐥ，
ꅱꅉꌑꅉꑟꑵꄸ。

ꀊꌱꑕꑘꑠꍈꑌ，
ꅇꉉꑖꈈꀕꍈꄸ，
ꌗꅐꁦꉘꀕꍈꄸ，
ꃢꌌꈚꌌ꒾ꆺꀮꍈꄸ，
ꇴꌌꆸꌊꍝꇖꀕꍈꄸ。

ꀊꌱꑕꑘꑟꍈꑌ，
ꁧꇉꅩꀱꀕꍈꄸ，
ꅲꐧꎵꑳꀕꍈꄸ，
ꅲꂷꉨꊝꀕꍈꄸ，
ꂱꀯꁠꍠꀕꍈꄸ，
ꎐꂷꐍꊭꀕꍈꄸ，
ꑓꂡꆈꏍꏐꍈꄸ，
ꑓꊏꆗꁍꀕꍈꄸ，
ꑓꂷꀯꆫꍅꍈꄸ，
ꊴꏶꆈꄿꀕꍈꄸ，
ꊴꁠꇪꉾꀕꍈꄸ，
ꆹꄱꏁꐥꀕꍈꄸ，
ꆧꁨꏁꅝꀕꍈꄸ，
ꇇꏸꊯꁻꀕꍈꄸ，
ꑭꆹꀟꁸꀕꍈꄸ，
ꑭꏸꊯꍠꀕꍈꄸ，
ꑅꎸꏦꍠꁮꂮꌡꍈꄸ，
ꃚꋒꉼꉹꃬꋓꌡꍈꄸ，
ꌱꈌꌱꑓꆹ，
ꎸꄓꈧꌺꌡꍈꄸ，
ꌱꀑꌱꑊꆹ，
ꆧꁨꅂꐛꐎꌠꌡꍈꄸ。

ꀊꌱꑕꑘꑠꍈꑌ，
ꀍꃓꏧꇁꆏꅑꈜꀕꋽ，
ꉑꀮꆼꆣꆹꈧꌩꑭꆸꈈꈩꂷꌡ，
ꃢꎔꈚꎔꆏꈚꈜꀕꋽ，
ꎺꑌꃱꇌꅐꍒꂪꍔꇀꂷꌡ;
ꏂꐎꏂꃴꆏꈚꈜꀕꋽ，
ꇉꅶꈹꀮꅔꅐꅏꇤꂩꇤꇀꂷꌡ，
ꂃꏂꂃꆧꆏꈚꈜꀕꋽ，
ꒉꃴꉜꏂꀜꆗꏿꌠꌡ;
ꇇꀘꆏꅑꈜꀕꋽ，
ꃅꃴꏷꌺꏹꍀꄓꌠꌡ，
ꁯꇲꅻꊪꆏꊐꈜꀕꋽ，
ꁮꈧꆧꈩꇁꌠꌡ。

ꀊꌱꑕꑘꑠꍈꑌ，
ꇤꐮꑌꇬꇤꉎꁨꍈꄸ，
ꑌꂾꑌꇬꇣꁁꁨꍈꄸ，
ꁦꀑꐺꇬꎔꒌꁧꐧꆚꍈꄸ，
ꅶꁉꐺꇬꎔꒌꍤꁆꆚꍈꄸ，
ꁧꎏꅐꇬꆧꌺꁨꍈꄸ，
ꅔꊂꉆꇬꇉꊂꎔꍈꄸ，
ꅔꐎꈴꇬꁯꆮꃯꍈꄸ，
ꁦꀑꉆꇬꉨꌋꋼꍈꄸ，
ꁧꐧꈴꇬꁦꒌꄀꍈꄸ，

ꀊꌱꑕꑘꑠꍈꑌ，
ꈁꃅꈁꑽꑻꈭꀕꍈꄸ，
ꀆꐒꀊꌱꇸꌠꆹ，
ꐛꁮꆣꒉꅿ;
ꈾꃚꀊꌱꃅꌠꆹ，
ꎬꐚꂸꄤꐔ;
꓂꒜ꀊꌱꃴꌠꆹ，
ꑾꌺꀑꆊꅿ;
ꑸꑽꀊꌱꏬꌠꆹ，
ꃬꏿꀕꏂꅿ;
ꋚꅪꀊꌱꃅꌠꆹ，
ꉐꀑꉨꏵꀕ。

ꀊꌱꑕꑘꑠꍈꑌ，
ꇇꀺꇇꑳꇇꅖꍈ，
ꈷꑟꀊꌱꈷꌠꆹ，
ꁯꆮꏭꃰꏿꌠꌡ;
ꀍꃓꀊꌱꈷꌠꆹ，
ꁱꂷꌕꇱꅐꌠꄸ;
ꋶꅪꀊꌱꍹꌠꆹ，
ꃅꃴꌊꀕꏡꌠꌡ;
ꃢꈜꀊꌱꈪꌠꆹ，
ꈁꉜꈁꋽꀕꌠꄸ;
ꃮꁮꀊꌱꉘꌠꆹ，
ꌕꑍꃮꀠꐛꌠꄸ;
ꃬꊭꀊꌱꉘꌠꆹ，
ꌕꉖꃬꎶꐛꌠꄸ;
ꆚꈈꀊꌱꌬꌠꆹ，
ꄸꉺꍽꅪꄓꂷꄸ;
ꉊꈯꀊꌱꒇꌠꆹ，
ꌿꉘꉏꇓꁠꌠꌡ;
ꐂꇓꀊꌱꃴꇬꆹ，
ꉑꀮꏪꈜꄝꌠꌡ。 https://t.cn/R2Wx1Vs

《ꆈꌠꀋꃋ》
girl nuosu
ꁰꊿ：ꐊꂾꃴꆾ·ꁭꅐꌺ
author：qomo vutliep bdure
ꎔꌠꆎꂷꐥ，ꆈꌠꀋꃋꌺ。
ꑘꃅꋚꑣꉌꃀꁨꅽꑠꂷ，
ꆏꎔꆎꃨꁦꉘꂙꃨꌡ。
ꉡꆹꉌꃀꈍꃅꆏꂶꌦꀋꉂ？
ꃅꍵꃹꇁꃲ，ꆎꉂꇀꌦꃲ。
ꉂꌠꆎꀃꑍꋋꄮꐥꌑꌒꀋꐚ，
ꉂꌠꆎꆹꃅꃴꃅꏸꂶꌦꆏꆎ。
ꑋꈌꁏꇁꃲ，ꌩꃨꀕꇁꃲ。
ꌩꃨꂾꆏꉌꃀꑌꆎꉂꇁ，
ꊿꎔꊾꃨꆈꌠꀋꃋꐥ，
ꉷꃅꇓꈓꅽꀋꏭꌠꆹꇬꀋꐥ。
ꆎꉂꈍꃅꂯ？ꈝꂿꇢꅉꎴ，
ꑿꆫꃮꆫꈪꑌꇔꍣꆈꌠꀋꃋꌺ，
ꉡꆹꐥꋊꐥꍂꃅꆏꂶꌦꀉꄂꉂ。