སྙན་ངག་གི་རིན་ཐང་གླིང་བ་འཇུ་སྐལ་བཟང་།

སྙན་ངག་གི་རིན་ཐང་།
ཐོ་ཤོར་གྱི་མེ་ལྕེ་ཁ་ཚ་མས།།
འདོད་སྲེད་ཀྱི་ཅོ་ནས་བཟུང་གྱུར་ཏེ།།
རྒྱལ་ཁམས་འདི་འུར་གྱིས་གང་བའི་དུས།།
ངུ་དགོད་ཀྱི་གཏམ་དེ་སུ་ལ་སྒྲོག།

གྲང་ལྷགས་ཀྱི་མཚན་མོ།
གངས་འཁྱགས་མལ་དུ་གནག་ཕྱུགས་སོ་སྒྲ་འཆའ།།
སྒོ་ཁྱི་ཟུག་པའི་གཅོང་སྐད་རླུང་གིས་འཁྱེར།།
སྦྲ་ནག་གོང་ཁ་རལ་བའི་བུ་ག་ན།།
ལྷགས་པས་འཇུམ་པའི་སྐར་མ་ཁོང་འདར་བྱེད།།

ལེ་འདེད།
མི་གཉའ་མི་ཡིས་ཞོན་པ་མི་གཤིས་སུ་གོ་ནས།།
གནག་སེམས་གཡོ་སྒྱུའི་གྲི་གུག་ཡང་ཡང་དུ་ཕྱར་ཡང་།།
དབང་མེད་རུས་པ་སྙི་མོའི་སྤར་ཁ་དེ་གྱེས་པ།།
མདོ་ཤོར་ཕ་རྒན་སྤྲེའུའི་བསླབ་པ་དེས་ཉེས་སམ།།
མི་ངོ་མི་ཡིས་འཚོ་བ་མི་ཆོས་སུ་འདུག་སྙམ།།
ངོ་སྲུང་བཅོས་མའི་སྐྱི་འཛུམ་ནན་ཏུར་གྱིས་བསྡུས་ཀྱང་།།
བཅོས་མེད་པགས་པའི་རྩ་རྒྱུས་རང་ས་རུ་ལྷོད་སོང་།།
རིགས་ངན་ཨ་མ་སྲིན་མོའི་རང་གཤིས་དེས་ལན་ནམ།།

བག་ཆགས།
ནམ་ཞིག་རྟེན་མེད་རྣམ་ཤེས་འཁྱམ་པོར་གྱུར་པའི་ཚེ།།
ཁྱོད་དང་འུ་གཉིས་དུར་ཁུང་གཅིག་ཏུ་སྦས་གྱུར་ན།།
ཁྱོད་ཀྱིས་དེ་རུ་གསེར་གྱི་སྒོར་མོ་ཁྲོག་ཁྲོག་བརྩི།།
ཁོ་བོས་ད་དུང་ལེགས་ཉེས་དགེ་སྐྱོན་འབད་པས་དཔྱོད།།

རྩྭ་ཐང་གི་དགོང་སྲོད།
སྲོད་ཁའི་ཉི་མས་གྲིབ་མ་རིང་དུ་བསྲིངས།།
གཡང་དཀར་མ་བུ་ཕྲད་པས་འབའ་སྒྲ་སྒྲོག།
ཨོང་སྒྱེ་ཕྲག་པར་གཟར་བའི་གཞོན་ནུ་མས།།
རྡུལ་རླུང་འཐིབ་པའི་ལམ་ལ་རྒྱང་མིག་ལྟ།།

དབྱར་གཞུང་གི་རྩྭ་ཐང་།
སྔོ་ལྗང་དབྱར་གྱི་རྦ་རླབས་གཡོ་བའི་ཁར།།
མཐིང་ནག་སྦྲ་ཡི་ཚོམ་བུ་གཡེང་ཞིང་འཕྱོ།།
འོ་མའི་ངད་ཁ་ལྡང་བ་དུ་བའི་སྤྲིན།།
རྒྱང་རིང་རི་བོའི་མགུལ་ན་ལྷོད་དུ་ཆགས།།

རེབ་གོང་བཅའ་སྡོད་སློབ་གྲྭ་གཉིས་པའི་སློབ་མ་སྙིང་དཀར་བཀྲ་ཤིས་ཀྱི་འཚོ་བའི་ཁ་གསབ་རོགས་དངུལ། 同仁市隆务第二寄校娘尕扎西同学的3月份生活补助提前到他的卡上了。感谢深圳王昱程先生 祝您在新的一年里，平安健康，扎西德勒 @暖流计划同仁驿站 https://t.cn/R2WxDqi

རྫུན་དང་རྫུས་མའི་འཇིག་རྟེན་འདི་དང་མི་རྐང་རུལ་པའི་སྤྱི་ཚོགས་འདི་ནས་ཁྱེད་ཀྱི་གངས་རི་དང་རྩྭ་ཐང་གིས་བཞེངས་པའི་བརྩམས་ཆོས་རེ་རེ་ནི་ནང་སེམས་གསོ་བྱེད་ཁོ་ནའོ།།