༄༅། །མགར་རྩེའི་མཚམས་རྒན་ནས་གཅོད་སྨྱོན་ཀུན་

首页发布

༄༅། །མགར་རྩེའི་མཚམས་རྒན་ནས་གཅོད་སྨྱོན་ཀུན་བཟང་ཡེ་ཤེས་ལ་གདམས་པ།
མགར་རྩེའི་མཚམས་རྒན་ཀརྨ་ལྷུན་གྲུབ་རིག་འཛིན།

（1882-1956）

༈ཨེ་མ་དམ་ལྡན་སློབ་བུ་ལེགས་པར་ཉོན། །སྙིང་ནས་དམ་པའི་ལྷ་ཆོས་བྱེད་འདོད་ན། །ཐུན་མོང་ཕྱི་ནང་ལམ་གྱིས་རྒྱུད་སྦྱངས་ནས། །ཐེག་ཆེན་བླ་མེད་ངེས་གསང་སྙིང་པོར་སྤྱོད། །ལྟ་བ་མ་བལྟ་ལྟ་མཁན་གཉིས་འཛིན་ཡིན། །སྤྱོད་པ་མ་སྤྱོད་སྤྱོད་བྱེད་བློ་བཅོས་ཡིན། །འབྲས་བུ་ཐོབ་འདོད་ཡོད་པ་རེ་ལྟོས་ཡིན། །ལྟ་བ་ཡེ་ཡིན་ཡིན་ནོ་གཅོད་སྨྱོན་ལོ། །སྒོམ་པ་ངང་བཞག་ཡིན་ནོ་གཅོད་སྨྱོན་ལོ། །སྤྱོད་པ་བླང་དོར་བྲལ་ལོ་གཅོད་སྨྱོན་ལོ། །འབྲས་བུ་རང་གྲོལ་ཡིན་ནོ་གཅོད་སྨྱོན་ལོ། །མི་ལྟ་མི་འཛིན་མི་སེམས་འདི་གསུམ་ནི། །ལྟ་བའི་མདོ་འགག་ཡིན་ནོ་གཅོད་སྨྱོན་ལོ། །མི་གཡེང་མི་གནས་མི་འགྱུ་འདི་གསུམ་ནི། །སྒོམ་གྱི་ངོ་བོ་ཡིན་ནོ་གཅོད་སྨྱོན་ལོ། །མི་སྤྱོད་མི་གཡེང་མི་ལེན་འདི་གསུམ་ནི། །སྤྱོད་པའི་མཚན་ཉིད་ཡིན་ནོ་གཅོད་སྨྱོན་ལོ། །མི་ཐོབ་མི་སྒྲུབ་མི་འདའ་འདི་གསུམ་ནི། །འབྲས་བུ་མཐར་ཐུག་ཡིན་ནོ་གཅོད་སྨྱོན་ལོ། །ལྟ་སྒོམ་སྤྱོད་འབྲས་བཞི་གསུམ་བཅུ་གཉིས་འདི། །འདི་བཞིན་ཉམས་སུ་ལོངས་དང་གཅོད་སྨྱོན་ལོ། །ད་ལྟ་ཡིན་ལུགས་ཚུལ་བཞིན་མ་ཤེས་ན། །སྟོང་ཉིད་སྟོང་པ་སྒོམ་པ་ཆད་མཐའ་ཡིན། །གསལ་བ་འགག་མེད་བསྒོམས་ཀྱང་རྟག་མཐའ་ཡིན། །ཟུང་འཇུག་ཡེ་གྲོལ་ཡིན་པ་ཤེས་པ་གནད། །བཟོ་མེད་རང་རིག་ཤུགས་བྱུང་ཟང་ཐལ་འདི། །བཟོ་བཅོས་རྟོག་པས་མ་བསླད་གཅོད་སྨྱོན་ལོ། །བཅོས་པ་མེད་པའི་རང་བྱུང་ཡེ་ཤེས་འདི། །བཅོས་མའི་གཟེབ་ཏུ་མ་འཇུག་གཅོད་སྨྱོན་ལོ། །བློ་འདས་རིག་པ་རྒྱ་ཡན་ལྷོད་གྲོལ་འདི། །བློ་ཡིས་འཛིན་པ་སྤོངས་ཤིག་གཅོད་སྨྱོན་ལོ། །རྣམ་རྟོག་འགྱུ་བ་སྤང་ལས་ཆུ་བརྡོལ་བཞིན། །དེ་ཡང་བཀག་པས་མི་ཁོག་གཅོད་སྨྱོན་ལོ། །འགྱུ་བ་རང་ཤར་བྱ་ལམ་རྗེས་མེད་འདྲ། །དེ་ལ་རྗེས་དཔྱོད་མ་བྱེད་གཅོད་སྨྱོན་ལོ། །དུས་གསུམ་འགྱུ་བ་མ་བཅོས་རང་གྲོལ་ངང་། །རང་གར་ཡན་པ་ཡིན་ནོ་ཤེས་པར་མཛོད། །ཀ་དག་སྟོང་པའི་ཆ་ཡིན་ཆོས་ཀྱི་སྐུ། །ལྷུན་གྲུབ་སྣང་ཆ་ལོངས་སྤྱོད་རྫོགས་པའི་སྐུ། །ཟུང་འཇུག་ཐུགས་རྗེའི་སྒྱུ་འཕྲུལ་སྤྲུལ་པའི་སྐུ། །སྐུ་གསུམ་དགོངས་ཀློང་མངོན་གྱུར་རྣལ་འབྱོར་ལ། །འཁོར་འདས་རྟོག་གྲོལ་ལྟད་མོ་ནང་ན་མངོན། །མི་རིང་གདོད་མའི་གཞི་ལ་དབུགས་དབྱུང་མཛོད། །བཀྲ་ཤིས། ཞེས་སྩལ་ལོ། ། https://t.cn/R2WxDGB

༈ ཆུ་སྟག་གནམ་ལོ་གསར་བའི་ནང་། །བླ་མའི་སྐུ་ཚེ་བརྟན་པར་ཤོག །
སེམས་ཅན་བདེ་སྐྱིད་ལྡན་པར་ཤོག །སངས་རྒྱས་བསྟན་པ་དར་བར་ཤོག །
བོད་འབངས་བདེ་ཞིང་སྐྱིད་པར་ཤོག །འཛམ་གླིང་ཞི་བདེ་ཡོང་བར་ཤོག །