བུང་བས་བསྐོར་བའི་སྙན་ངག

.

_

གཉན་ཆེན་སྲས་བུ།

གང་གིས་སྲིད་པའི་དྲྭ་བ་ཡོངས་སུ་བཅད།།
མུ་སྟེགས་གཟེབ་ཀྱི་ཚོགས་ཀྱང་གྲོལ་བར་བྱས། །
སྡེ་བཅས་བདུད་ཀྱི་དཔུང་ཚོགས་ཡོངས་བཅོམ་པའི།།
བྱང་ཆུབ་རྒྱལ་སར་བདེ་བར་གཤེགས་པར་གྱུར།།

གང་གིས་ཉི་མའི་འོད་སྣང་ཡང་ཡང་འདྲེན།།
གདུལ་བྱར་དེ་ཉིད་དག་ནི་གསལ་བར་མཛད།།
ཀུན་སྤྱོད་པདྨའི་བཞིན་ལ་འོ་ཡང་བྱས།།
རྣམ་འདྲེན་ཞི་བའི་གདན་སར་འཁོད་པར་གྱུར།།

གང་གིས་དཀའ་སྡུག་གཙང་བོའི་མཐར་བརྒལ་ཏེ།།
སྐྱེས་རབས་མདོ་ཡིས་བཤད་པ་རྟགས་སུ་བཀོད།།
རྒྱབ་ལྗོངས་གསེར་ནག་རི་འདི་ཁེན་སར་བྱས།།
དད་པའི་སྒོ་ནས་ངག་གི་མེ་ཏོག་འབུལ།།

སེར་སྐྱའི་གྲོང་སྒོར་བུད་དེ་ནགས་སུ་བྲོས།།
འདོད་ཡོན་ནོར་གྱི་གདོང་ལ་ཐལ་བ་བཏབ།།
རྒྱལ་བྱེད་ཚལ་ན་སྙོམས་ཆུང་ཚུལ་གནས་པ།།
ཞི་བའི་དྲང་སྲོང་ཆེན་པོ་ཤཱཀྱའི་སྲས།།

གཞན་ཕན་སེམས་ལས་བྱང་ཆུབ་ཆར་སྤྲིན་འཁྲིགས།།
གདུལ་བྱའི་མེ་ཏོག་ཡང་ནས་བསྐྱར་གསོས་པས།།
དྲང་སྲོང་ལྷུང་བའི་ནགས་ཀྱི་དགེ་སྦྱོང་ལ།།
ཕྱོགས་ཀྱི་བུང་བས་བསྐོར་ཞིང་གླུ་ཡང་ལེན།།

༢༠༢༢/༡༡/༡༥སྟེ་ལྷ་བབས་དུས་ཆེན་ལ།

དེ་རིང་སྟེ་བོད་ཟླ་དགུ་པའི་ཚེས་ཉེར་གཉིས་ཉིན་ནི། སྔོན་སྟོན་པ་ཤཱཀྱ་ཐུབ་པ་མཆོག མངོན་པར་རྫོགས་པའི་སངས་རྒྱས་ནས་དགོང་ལོ་ཞེ་གཅིག་ལ་སླེབས་པའི་ཚེ། ཡུམ་སྒྱུ་འཕྲུལ་མ་ལྷ་ཡུལ་དུ་སྐྱེ་བ་བཞེས་པར་མཁྱེན་ནས། ཆོས་གསུང་ཕྱིར་སྟོན་པ་འཁོར་དང་བཅས་པ་ལྷ་གནས་སུམ་ཅུ་རྩ་གནས་སུ་དབྱར་གནས་མཛད་པར་མ་ཟད། ལྷ་ཡི་རིས་ཀྱི་གདུལ་བྱ་རྣམས་ལ་ཆོས་སྟོན་བཞིན་བཞུགས། དེའི་དུས་སུ་རྒྱ་གར་ཡུལ་དབུས་ཀྱི་རྒྱལ་པོ་གཟུགས་ཅན་སྙིང་པོ་གཙོས། རྒྱལ་པོ་གསལ་རྒྱལ་ལ་སོགས་པ་རྣམས་ཀྱིས། རྫུ་འཕྲུལ་ཅན་འཕགས་པ་མོའུ་འགལ་བུ་ཁྱེད་ཀྱིས། བཅོམ་ལྡན་འདས་འཛམ་གླིང་དུ་སྤྱན་དྲོངས་རོགས་ཞེས་གསོལ་བས། མོའུ་འགལ་གྱི་བུས་དེ་ལྟར་གསོལ་བ་བཏབ་པས། སྟོན་པ་མཆོགས་གིས་ཀྱང་ཞལ་བཞེས་གནང་ནས། ལྷ་མིའི་འཁོར་དང་བཅས་ཏེ་རྫུ་འཕྲུལ་གྱི་སྐས་འཛེག་ལ་བརྟེན་ནས། འཕགས་ཡུལ་གསལ་ལྡན་གྱི་གྲོང་ཁྱེར་དུ་བྱོན་ཏེ། སེང་གེའི་ཁྲིའི་སྟེང་དུ་བཞུགས་ནས། འགྲོ་བ་མཐའ་ཡས་པ་ལ་སྐལ་བ་དང་འཚམ་པའི་ཆོས་བསྟན་ནས། ཐར་བ་དང་སྨིན་གྲོལ་གྱི་ལམ་དུ་འགོད་པར་མཛད་པའི་དུས་ཆེན་ཁྱད་པར་བ་ཡིན་པས། ཉིན་འདིར་བྱང་ཆུབ་ཀྱི་སེམས་ཉམས་ལེན་བྱེད་པ་དང་། ཕྱག་མཆོད་དང་དགེ་འདུན་ལ་བསྙེན་བཀུར། ངན་སློང་ལ་སྦྱིན་གཏོང་སོགས་རྣམ་དཀར་དགེ་བའི་ལས་ལ་འཇུག་པ་ཤིན་ཏུ་གལ་ཆེ་བས། ཀུན་གྱིས་གོ་སྐབས་མ་ཤོར་བ་མཛད་པར་ཞུའོ།།

མི་རིགས་རེ་ལ་འདྲ་མིན་དུས་ཆེན་རེ།།

དུས་ཆེན་རེ་ལ་འདྲ་མིན་རིན་ཐང་རེ།།
རྒྱུ་འབྲས་དྲང་བདེན་རིན་ཐང་འཛིན་པ་ཡི།།
གངས་ཅན་བོད་མས་སྟོན་པའི་དུས་ཆེན་རོལ།།

བདུད་ཀྱི་མཚོན་ཆ་རྩུབ་མོ་དག་ལ་མཇམ་མཉེན་མེ་ཏོག་ལན་དུ་སྦྱིན།།
ལྷས་བྱིན་ཁྲོས་པའི་སྒྱོགས་རྡོ་འཕངས་ཚེ་མི་སྨྲའི་བརྟུལ་ཞུགས་དང་དུ་བླངས།།
རང་གི་དགྲ་ལ་སྡང་མིག་ཙམ་ཡང་བལྟ་བར་མི་ནུས་ཤཱཀྱའི་སྲས།།
འཇིགས་རུང་འཁོར་བའི་དགྲ་ཆེན་སྐྱོབས་པའི་གྲོགས་སུ་ཤེས་ལྡན་སུ་ཡིས་བཀུར།།

———དགེ་འདུན་ཆོས་འཕེལ་ནས།